Anke Nissen
Toxisch Planten


Na Folg 1, Folg 2, Folg 3, Folg 4, Folg 6, Folg 7, Folg 8, Folg 9, Folg 10, Folg 11, Folg 12, Folg 13, Folg 14, Folg 15


Küchenschelle (Pulsatilla vulgaris)

Besünners giftig: de ganze Plant
Gift: Protoanemonin, reizt Huut un Sliemhuut

De Naam vun düsse Plant hett nix mit de Köök to doon, sünnern mit de Koh: Dat is de Küh-chen-Schell, also de Glockenbloom vun de lütte Koh. Vunwegen ehr smucke sülverig-fedrige Bläder un Samenstänn is se beleevt in uns Goorns, sünnerlich ok in Buerngoorns. Se blöht fröh, vun März bet April, faken bet rin in'n Maimaand. Man Wohrschuug: De ganze smucke Plant is dull giftig! Ehr Gift, dat Protoanemonin, brennt op de Huut un de Sliemhäute, de Huut sleit Blasen, entzündt sik un deit aasig weh. Wenn een Delen vun de Plant sogor versluckt, kann dat to Krämpe föhren bet hen to dat Verklaamen vun't Zentraalnervensystem. Dat kann mit'n Dood utgahn.

As mennig anner Giftplanten ok, woor de Küchenschell fröher ok as Heilplant bruukt — t.B. de Dörchblöden vun bestimmte Huutpartien to föddern. Hüüt warrt dat nich mehr maakt.

Fingerhoot (Digitalis purpurea, lanata)

Digitalis is een vun de wirksamst plantlich Arzneimittel un warrt ok in de moderne Medizin veel bruukt.
Sien wirksam Inhaltsstoff: Herzglykoside, as Digitoxin, Digoxin, ß-Acetyldigoxin.
Al heel lütte Mengen hiervun — 2 bet 3 Bläder — bringt den Dood!

Symptome:

  • Övelsien
  • Brechreiz
  • Een kann nich mehr goot kieken
  • Dood dörch Stillstahn vun't Hart

Eerst Hölp: Medizinisch Kohle un Natriumsulfat to'n Afföhren.

De Fingerhoot is en rechte Sommerplant vun Buerngoorns un Woolden. Ik heff hier op Plattpartu al doröver schreven. Liekso hett Ludgerd Lüske över en typischen Gendefekt vun düsse Blomen schreven. Wichtig to weten is, dat de ganze smucke Plant giftig is. 2007 weer se sogor de Giftplant vun't Johr (ja, dat gifft't). Dat Hartgift vun düsse Plant maakt den Hartslag stärker, avers ok langsamer; kriggt een to veel dorvun, blifft dat Hart stahn.

Also: Nienich düsse Plant ahn ärztlich Ünnerwiesen bruken!


Fotos: Anke Nissen
29.6.2021


na baven