Oldtimer-Scheep bi Holtenau

Op ole Weeg un Brüchen:
De Ole Eiderkanal — En Waterstraat

Deel 2
vun Antje Heßler


Na Deel 1
Na Deel 3
Na Deel 4

Na Deel 5
Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Bald weern wi wedder ünnerwegens. Dat hett uns keen Roh laten. Wi müssen doch de noch vörhannen Relikte vun den Eiderkanal ankieken. Dittmal güng dat na Holtenau, na den Tiessenkai. De Kai hett sien Naam 1976 na den Schippsutrüster Hermann Tiessen kregen. An den Kai liegt ümmer allerhand Ooldtimer. An't Enn vun den Kai steiht de ole Lüchttorm vun 1895. He hett de Scheep de Infohrt vun den Kaiser-Wilhelm-Kanal wiest. Hüüt heet he Noord-Oostsee-Kanal oder kort Kiel-Kanal.


Blick op de Förde


Dat Lüchtfüür vun Holtenau

De ole Eiderkanalinfohrt in Holtenau wöör dörch twee ut Granitsteen behauen Obelisken markeert. De een stünn in't Water un de anner vör dat Packhuus. Beide exesteert nich mehr. Vör dat Packhuus steiht hüüt ene 7,5 Meter hoge Nabillung ut Sandsteen mit de Inschrift:

PATRIAE
ET
POPULO

(Dat heet: För Vaderland un Volk.)

Dat Kanalpackhuus Holtenau wöör tosamen mit de Packhüser in Tönning un Rendsborg in Updrag vun de Dänisch Kroon as Lagerhuus för de up den Kanal tranporteerten Woren buut.


Kanaalpackhuus mit Obelisk


Oldtimer-Schipp bi Holtenau

Dat Holtenauer Kanalpackhuus hett uns goot gefullen. Dat Huus is restaureert un is nu en richtig smuckes Huus woorn. Dor is hüüt ok ünnen en Gasthuus bin. Dor sünd wi glieks inkehrt un hebbt uns dat eerstmal smecken laten. Neven dat Packhuus steiht dat fröhere Huus vun den Slüsenwärter.

Frisch verhaalt möken wi uns up den Trüchweg. Na den Tiessenkai kemen wi an ene Slüüs. Dat weer aver nich de ole Slüüs vun den Eiderkanal. De weer nich mehr to sehn. Över de Grundmuern weer de eerst Slüüs vun den Kaiser-Wilhelm-Kanal buut woorn. Vun den olen Eiderkanal is blots noch de "Entwässerungsgraben", de dode Arm twischen de Slüseninsel vun den Kaiser-Wilhelm-Kanal un dat Över vun Holtenau to sehn. De Slüüs is nich mehr in Bedreev. Över de Slüüs geiht en Brüch, de Weg na de grote Slüseninsel vun den Kaiser-Wilhelm-Kanal. Dor kümmst blots mit en Genehmigen rup.


De Slüseninsel vun'n Kiel-Kanal


Dat smucke Slüsenwärterhuus blangen dat Packhuus (in'n Achtergrund)


Hermann Tiessens Geschäft, dat den Tiessenkai sien Naam geev

Up den Entwässerungsgraben swömmt ümmer veel Holtbalken. Dor sitt geern Aanten un Graugöös up.


Lebennige Aanten un dodes Holt vör de dode Slüüs


De Slüüs mit Klappbrüch in Bedreev, histoorsche Opnahm

Unse Söök güng nu wieder na de tweete, de Knooper Slüüs. Aver ok dor weer nix mehr to sehn. Blots en Steen vun de Knooper Slüüs steiht hüüt up dat Gelänn vun de Rathmannsdörper Slüüs. Ik heff noch twee ole Biller vun de Knooper Slüüs, dat Knooper Gutshuus un den olen Eider-Kanal. Up dat ene Bild warrd en Schipp treidelt. Dat Knooper Gutshuus is ut den Klassizismus in Schleswig-Holstein un hett sogoor den letzten Krieg överstahn. Vun de Goornsiet ut kannst goot de Schippfohrt up den Kiel-Kanal ankieken.


De Front vun Knoop, dat prachtvulle Herrnhuus


Herrnhuus Knoop vun de Kanalsiet in en histoorsche Dorstelln


De Slüüs vun dat Bild, beten grötter


Dor liggt de Wirtschap vun "Maruschka"

Bi "Maruschka", en lütt Wirtschaft an den Kaiser-Wilhelm-Kanal, güng unsen Weg an den Överloop vun den olen Eiderkanal un up den olen Treidelweg na de Rathmannsdörper Slüüs. An den Överloop vun den Eiderkanal na den Kaiser-Wilhelm-Kanal hebbt wi as Kinner geern speelt. Sünd dor ümmer över den lütten Waterfall jumpt. Dat weer en richtig Wettspringen. Hüüt is de Överloop mit grote Steen verkleedt. Dor kannst nich mehr röver jumpen!

Ümmer wedder bün ik vun dat Natuurparadies üm den olen Eiderkanal begeistert. Ok anner Minschen, Spazeergänger, Angler un Maler, deelt mien Freud över den olen Kanal. Bi mi hängt in'n Flur en Aquarell vun den Eiderkanal. Dat erinnert mi jeedeen Dag an den Kanal.


Mien Aquarell

Dittmaal wullen wi uns nu wat genauer de Rathmannsdörper Slüüs ankieken. De weer in de letzten Johrn restaureert woorn. Up dat Slüsengelänn stünn ene Schautafel mit den Grundriss vun een vun de söss Slüsen.


Klick up to'n Vergröttern!

Na düssen Plan weern alle söss Slüsen buut woorn.


De Rathmannsdörper Slüüs...


...is doch recht hooch

Dat weern allens Tweekamerslüsen. De grote Kamer weer 35 m lang un 7,8 m breet. Se weer för Scheep bit to 160 Tonnen Ladegewicht. Mit de lüttere Friekamer wöör de Waterstand reguleert. De twee Slüsentore ut Eekenbahlen wöörn mit Winden upmaakt un vun den nalopenden Waterdruck wedder slaten. De dicken Wänn vun de Kamern weern ut Tegel un de Halterung vun de Schaneere ut Bornholmer Granit. Dat weer en ganz stabil Buwies.


Resten vun't Door


Scharnier vun Granit un de Slüüs vun de anner Siet


Ole Hubskala

Över de Knooper un de Holtenauer Slüsen güngen holländisch Klappbrüchen. De Slüsen weern ünner Leit von de Gebröder Holler ut Wilster na Vörbild vun de Hollänner buut. De Rathmannsdörper Slüüs harr keen Klappbrüch.


Ole Peerstation, schöön renoveert

Mit Help vun de söss Slüsen hebbt de Scheep den tein Meter Höhenünnerscheed twischen de Kieler Förd un de Eider överwunnen. As de Eiderkanal 1784 fardig weer, kunnen de seegahenden Scheep up den Kanal bit Rendsborg un up de Eider wieder bit Tönning fohrn. Se brukten nicht mehr üm dat Kategatt.


Denksteen mit Johrstall MDCCLXXXI (dat heet: 1781) bi Knoop

Wi hebbt uns denn noch wedder de Muern vun de Slüüsenkamern ankeken. De weern doch recht dick un hoch. Un dat Water dormaank weer recht deep. Ik kann hüüt verstahn, dat wi as Kinner nich alleen na de Slüüs sullen. Man harr Angst, dat wi in't Water fullen. Nu weern wi neeschierig up de Slüüs vun Königsförde.


Harvstnatuur an'n Eiderkanal



na baven