Knuuflook
Bild: Wikimedia Commons/Donovan Govan

Lecker Eten

vun Anke Nissen


Wi weern bi Vetter Harald in Heiligenhafen. He is 85 Johr olt worrn Veel Familie, vele Vettern un Kusinen, veel Snacken un Ümarmen! Wi hebbt en richtig schöön Fest fiert, un mi hett ganz besünners goot gefullen, dat dat en wunnerbor normaal Eten geev.

Ik weer nämlich kortens up enen annern 85. Geburtsdag. Dor harrn se en Catering-Service (ik weet nich mal, wo een dat schrifft) bestellt, de vele hübsch dekoreert Häppchen un so anbaden hebbt. As ik mi vun de schnippelt Wörteln (Möhren) upfüll, dor snupper ik un meen:
"De Wörteln rüükt aver gor nich as Wörteln."
"Nee," wörr ik upkloort, de sünd je ok de hele Nacht in en Knuuvlook-Lake inleggt west."
"Äh ..., Wörteln, de na Knuuvlook rüükt?!?" Oh nee, de sünd för mi nich to eten, mien Magen fangt dull an to brennen, wenn he Knuuvlook kriggt, faken so dull, dat ik mi vör Smarten dalkrümm. Also leet ik de avordig rüken Wörteln up den Töller liggen un keek mi wieder üm.


Gefüllte Poggenstöhl. Bild: Wikimedia Commons

"Gefüllte Champignons"! Sehgen goot ut, as lütte Frikadellchen. Ik wull graad henlangen, dor stopp mi de Kööksch:
"Oh, nee, in de Füllmass is en lüttsneden Knuuvlook-Zehe in."

Na, goot — de Swien-Filets sehgen ja ok bannig appetitlich ut. Na en fragen Blick up de Kööksch müss ik de Finger ok dorvun laten.

Ok de Hühnchen mit Salbeiblatt weern mit Knuuvlook würzt, Zucchini-Schieven, Tomatenschieven jüst so. Dat stell sik rut, dat dor nix — reinweg nix — bi weer, wat ik — ahn Magenpien to kriegen — eten kunn.

Braden. Bild: Romy 2004/Pixelio
Braden. Bild: Romy 2004/Pixelio

En beten bedrippst heff ik mi denn an den Kääs ranmaakt. Dor stünn en Platt mit Kääs-Stücken, de weern mit Pieker fein rutputzt un de wörrn mi bestimmt smecken. Doch stopp! Wat seggt de Kööksch?
"Disse Kääs-Stücken heff ik drei Daag in en Sooß trecken laten, in de weer ok en beten — würklich blots en beten — Knuuvlook."
Ja, is dat denn to faten? Kennt denn de Köökschen hüüt blots noch Knuuvlook as Gewürz? Fallt se dor nich mal wat anners in! —


Bild: Maren Beßler/Pixelio

Toletzt fünn sik denn doch noch en Kääs, de ahn Knuuvlook bleven weer. Dorto eet ik fein smecken Wiendruven, de harr de Kööksch mit ehre Knuuvlook-Sucht nix andoon kunnt.

Süh — un nu kann doch wohl jedereen verstahn, wo dull ik mi freut heff, dat dat bi den 85. Geburtsdag vun Vetter Harald ganz normal Eten geev: Frische Supp, Braden mit Gemüüs un bruun Sooß un achteran Ies mit hitt Kirschen. Lecker...!


9.11.2008


na baven