Dat Kruut för'n Hornung:

Myrrhe

vun Anke Nissen

Gummi-resina Myrrha
Stammplant: verschieden Orten vun de Commiphora, besünners aver Commiphora molmol — Familie Burseraceae (Balsambaumgewächse)

Anner Namen:


Myrrha

Sammelt warrt:

rutfleten Harz

Wat da binn is:
25-40% Harz, 50-60% Gummi, ätherisch Öle

Warrt bruukt:

as Myrrhentinktur, gegen Entzünden in'n Mund
In de Kosmetik,
as Rökermittel

Myrrhe is dat Gummiharz vun mehrere Commiphora-Orten. Dat sünd lütte Bööm orrer ok Bööm, de bet 10 Meter hooch warrn köönt. Warrt de Rinde verletzt, kümmt en milchig Saft rut. Wenn de indröögt is, warrt de sammelt.

Myrrhe süht ut as höckerig orrer löcherig Klumpen, groot as Nööt. Se sünd geelbruun, rootbruun orrer bruun. Ik heff heel lütte Stücke sehen, un de weern so 'n beten dörchschienen, so 'n beten as Bernstein.

Myrrhe rüükt fien würzig un smeckt bitter kratzend. Se blifft bi 't Kauen an de Tähn backen.

Bi 't Hittmaken bläht sik Myrrhe up, smölten deit Myrrhe nich. Verbrennen deit dat mit lüchen rußen Flamm und dat rüükt denn richtig goot.

Tohuus is de Plant an 't Rode Meer, in Nordostafrika.

Medizinisch bruukt warrt blots Myrrha electa, de besteiht ut grote Stücke un is hell-farven. De düüstern-farven Stücke, de nich ganz rein sünd — "Myrrhe in sortibus" —, warrt technisch bruukt.

Wegen dat gode Rüken warrt Myrrhe geern as Tosatz to Röker-Mittel nahmen.

Ik kenn vun Kind an de Myrrhentinktur. De wörr bi uns bruukt, wenn wi Kinner Mundfäule harrn. De Tinktur wörr in'n Mund updragen un dat weer gor nich unangenehm.
Myrrentinktur wirkt gegen Entzünden, wirkt desinfizierend un desodorisierend.
To 'n Mundspölen warrt poor Drüppen vun de Tinktur in en lütt Glas Water drüppelt.
Ok gegen Besweer vun 't Tähnfleesch kann Myrrhentinktur helpen, wegen de adstringieren (tosamentrecken) Wirken.

In de Kosmetik warrt Myrrhe in Mund- un Tähn-Pleegmittel togeven.

Bi Hals- un Rachenentzünden

kann en Gurgellösung helpen, wenn de glieks bi 't eerst Kratzen un Sluckbesweer anwendt warrt. Ik laat mi in de Apotheek en Lösung herstellen ut lieke Dele

20 Drüppen vun disse Mischen warrt in ½ Glas Water drüppelt und dormit gurgelt.

Bi Entzünden in'n Mund

orrer Aphthen orrer Druckstellen dörch en Tähn-Prothese kann en Tinktur ut Myrrhe un Blutwurz helpen. In de Apotheek lett een sik en Mischen herstellen ut

  • 30 ml Blutwurz-Tinktur
  • 50 ml Myrrhentinktur

Bi Aphthen un entzündt Tähnfleesch warrt de Tinktur nich verdünnt un vörsichtig mit en Wattestäbchen updragen.
Bi licht Besweer gifft man 20 Drüppen in en Glas lauwarm Water un gurgelt dor denn mit.

In en oll griechisch Legende weer Myrrha ene Priesterin vun Aphrodite. Myrrha harr enen glöhnig Verehrer. Un dat de ehr nich to nah kamen kunn, wörr se vun Aphrodite in enen Struch verwannelt.

Myrrhe kümmt in de Bibel vör.
Psalm 45,9: "Vun Myrrhe un Aloe, vun Kassia rüükt all dien Tüüch."

Bi Jesus sien Geburt un ok bi sienen Dood leest wi vun Myrrhe. Myrrhe weer een vun de Geschenke, de de Weisen ut dat Morgenland mit bröchen.
Matthäus 2, 11: "Un se smeten sik dal, huldigen em, deen ehre Schätze up un bröchen em Gaven, Gold un Weihrauch un Myrrhe."
Bevör man Jesus an 't Krüüz slaan hett, wörr em Myrrhe geven (Markus 15, 23).
Un Nikodemus hett en Mischen ut Aloe un Myrrhe tohoop mit de linnern Döker bröcht, in de de Liev vun Jesus inhüllt wörr (Johannes 19, 39-40).

De Bibel snackt vun Myrrhe as en bannig wertvull Harz, as kostbor Bestanddeel vun 't Hillig Öl.
In Oldingstieden weer Myrrhe en Schönheitsmittel, wörr geern as Parfüm bruukt un ok as Heilmittel.
De ollen Ägypter harrn Myrrhe as Duftstoff in ehre Tempel un as Smuck för ehre Doden.


31.1.2010


na baven