Oostfreesland-Klenner 2022
Maimaand: De Pünte

Biller un Text vun Thomas Seemann, Verse vun Marlou Lessing

An'n eersten Mai warrt tradischonell de Pünte för den Sommer in Bedreev nahmen. Dat gifft elkmaal en richtige Fier mit Gottsdeenst, Musik un Bundswehr (wi hebbt ja en Sanitätsbattallion hier in Leer).

De Pünte — dat is de Naam vun de lütte Fähre in't Bild. Se föhrt ganz nehg bi de Evenburg över de Jümme. Un twoors, wenn de Forschung recht hett, al siet tominnst 460 Johr.

Kann angahn, dat sik siet de 460 orr mehr Johr nix an de Bedreevsaart verännert hett: Dat slichte Fährponton warrt mit de Hand langs en Reep trocken, dat dwars över den Flussgrund liggt — bloots mit Muskelknööv, ahn Stroom orr Diesel. Een, twee Lüüd langt, dor köönt aver ok mehr trecken. Dormit is de Pünte de öllste Fähre vun düssen Typ, de dat in Europa noch gifft. De Stell is heel idyllisch, dat Bild is vun de Noordsiet maalt, 'neem en ole Gaststeed liggt, un wiest, wo dichtbi de Jümme (dat Water, dat vun linkerhand kümmt) in de Leda flütt.

De Naam "Pünte" betekent eentlich en eenfachen Schippstyp vun Holt, de keen egen Andreev harr, sünnern langs en Water treidelt woor. Later woor de Naam in ganz Oostfreesland ok för Fähren bruukt, de nich langs, sünnern dwars över so'n Water trocken, also treidelt woorn. En Handvull Pünten sünd hüüt noch in Bedreev, deelwies histoorsch, deelwies sogor nieg. Dat Prinzip is ja ideaal för en Verkehrsmiddel, dat bloots bi Bedarf fohrn mutt un vun de Lüüd, de dat bruukt, sülven in Gang sett warrt.


Histoorsches Foto vun de Pünte

Dorbi woor de Pünte in fröher Tieden teemlich veel bruukt, för Minschen, Kutschwagen un sünnerlich för Veh, dat in de depen Wischen güntsieds de Jümme to'n Grasen bröcht woor. Dat änner sik in niege Tieden, un 1974 woor de Pünte vun'n Landkreis dichtmaakt. Dor keem aver fix en Vereen ingang, de de Pünte redden un 1988 wedder in Bedreev nehmen kunn — tominnst in'n Sommer löppt se nu. Siet 2002 is de Pünte ok endlich as Denkmal schuult.

Köh warrt hier hüüt nich mehr veel översett, avers sommers mennig Drahtesel un ok Motorrööd, natüürlich ok Wannerers, Touristen un Utflööglers. Autos köönt ok transporteert warrn. Muttst man jümmers orrig trecken.


vun hier na dor

maak den övergang licht.
nimm en eenfachen prahm,
nimm dien hart in dien hand
un kaam!

sett dien foot op dat holt.
süh, de fluss is noch sied,
un dorbinn löppt en reep,
dat nüms süht.

allens treckt, kennt sien weg.
ok dien hart, ok dien hand
faat dat reep, un dien knööv
findt land.


1.5.2022


trüch


na baven


na't Flack

na de Startsiet