Oostfreesland-Klenner 2022 |
|
Düt Bild wiest de Evenburg in de ruge Vörjohrsküll. Op den Rasen vörn sünd man de eersten Krokus to sehn, de Allee is noch kahl. De Evenburg is en Waterslott bi uns in Leer. Dat Slott driggt hüüt en typische Butensied vun en Historismus-Bu. De Spitzbagen-Finster, Treppengevels un de lustige Toorn wiest ahn Twievel op den neogotischen Stil. Aver den Toorn hett dat Slott eerst siet rund 10 Johr wedder, un de enge lütte Slottinsel wiest op en veel öllere Wehranlaag. De eerste Evenburg woor in de Tied vun'n 30-jöhrigen Krieg buut, de Stil weer dormalen Barock. Dorvun is meist nix mehr över, utnahmen de Anlaag as Waterslott. Dormalen müss sik nu mal jedeen Besitt gegen Fienden wohren, un en Watergraven mit Toogbrüch weer en begängsches Middel dorto. Buun leet dat de dormalen Stadtkommandant vun Emden he hett dat na sien Fru Eva nöömt. De ole Bu verfüll avers mit de Tied un in't 19. Johrhunnert leet de dormalen Huusherr Graf vun Wedel dat Slott nieg buun, so as dat nu wedder to sehn is, un ok en Park anleggen. Man ok düsse Bu woor na un na schedderig un dat neogotische Dack verswünn mitsamt den Toorn, den Schiefer hebbt se versilbert. 1975 keem dat Slott endlich in apentliche Hannen, de Stadt hett dat köfft un vun 2004 an in sien uursprünglichen Stil restauriert. Hüüt is dat apentlich togänglich för Hoochtieden, Utstelln usw. Sünnerlich in'n Lent is de Slottanlaag en beleevte Frietiedrevier mit den waterrieken Park, de grote Allee, dat Torhuus mit Café, de Kreismusikschool un de smucke Burg. Dat Highlight in'n Park sünd de uurolen Magnolienbööm, kann ween, dat de so oold sünd as de Borg. Regelrechte Blomenteppiche bedeckt denn de Rasenflachen. Ik wahn hüüt man bloots en poor Minuten vun dor weg. Mit beten Glück dreepst dor Watervagels op de Jagd, de schönen Mandarin-Aanten, de in den Borggraven leevt, en Iesvagel orr eenfach en smuck Bruutpoor, dat sik op de Brüch na de Borginsel knipsen lett. vörjohr de wind geiht ruug, üm fasten grund |
|
3.4.2022 |