De Erlkönig

vun J.W. v. Goethe, Platt vun Katja Renfert


Welkeen ritt so laat dörch Nacht un Wind?
Dat is de Vadder mit sien Kind;
He hett den Jungen wull in'n Arm,
He faat em seker, he höllt em warm.

„Mien Söhn, wat bargst du so bang dien Gesicht?“ —
„Sühst, Vadder, du den Erlkönig nich?
Den Erlkönig mit Steert un Kroon?“ —
"Mien Söhn, dat is vun’n Nevel kaam'n."

„Du leves Kind, kumm, gah mit mi!
So schöne Speele speel ik mit di;
Mennig bunte Blomen blöht an'n Strand;
Mien Modder hett mennig gülden Gewand.“

„Mien Vadder, mien Vadder, un höörst du nich,
Wat Erlkönig mi liesen versprickt?“ —
„Bliev ruhig, bliev ruhig, mien Kind;
In dürre Bläder süselt de Wind.“

„Wullt nich, fien Jung, du mit mi gahn?
Mien Döchter nehmt sik üm di an;
Mien Döchter föhrt den nächtlich Reegn
Un warrt mit Danzen un Singen di wegen.“

„Mien Vadder, un sühst nich den düstern Oort,
wo Erlkönigs Döchter op mi luurt? —
„Mien Söhn, mien Söhn, ik seh dat genau;
De olen Wischen schient so grau.“

„Ik leev di, mi kettelt dien schöne Gestalt;
Un büst du nich willig, so bruuk ik Gewalt.“ —
„Mien Vadder, mien Vadder, nu faat he mi an!
Erlkönig hett mi en Leid andaan!“

Den Vadder gruust dat, he ritt geschwind,
In sien' Arms höllt he dat stöhnende Kind.
Kummt an den Hoff mit Möh un Not,
In sien' Arms dat Kind weer dot.


Düsse Ballade hett Johann Wolfgang von Goethe 1782 schreven. Franz Schubert, en Bewunnerer vun Goethe, hett alltohoop 58 Balladen vun Goethe as Leder komponeert, de Ballade vun den „Erlkönig“ al mit 18 Johren, also 1815.

Vör 100 Johren is Ursula Querner in Dresden op de Welt kamen. 1950 hett se ehr Atelier in Hamborg inricht. 1964 hett se as eerste (!) Fru den Edwin-Scharff-Pries Hamborg kregen.

In de fröhen 1970er Johren is de Grootwahnsiedlung Hamborg-Neuwiedenthal buut worrn. Siet 1968 steiht dor ehr Skulptur ut Bronze, de „Erlkönig“. Een Johr later is Ursula Querner denn, mit man blots 48 Johren, storven. Bronze-Skulpturen vun ehr ut de Mythologie sünd uk woanners in Hamborg to sehn; ton Bispeel „Aurora“, „Pan“, „Daphnis un Chloe“, „Orpheus un Eurydike“.


Literatur: „Die schönsten deutschen Gedichte“, Hrsg. von Adreas Simon, Verlag Die Bibliothek, Gesamtherstellung Welsermühl, Wels, o.Jg.;
Heinz Spielmann, „Bildhauer in Hamburg, 1900 – 1972“, Hans Christians-Verlag, 1972;
„Oper, Operette, Konzert – Komponisten und ihre Werke“, Büchergilde Gutenberg, Mosaik Verlag GmbH, München 1979

Mehr vun Katja Renfert hier
Anner Översetten vun Ludgerd Lüske: hier
5.9.2021

trüch


na baven


na't Flack

na de Startsiet