Dat Bawhuus, Deel 13:
Dei Meesterhuus-Siedlung in Dessau

Van Ludgerd Lüske

Van den Bawhuuskomplex ut is man tau Faute nich lange unnerwägens, denn steiht man vör dei Meesterhuus-Siedlung an dei Ebertallee. Bi Sünnenschien, moje tüschken Bööme staoht lüchten dei witten Hüüser van dat greune Gress inraohmt. Nu lööten wi dei Geschichte up us taukaomen:

Dei Meesterhüüser van Walter Gropius (1925 - 1926)

Tau den Plaon van den Bawhuuskomplex hörde uk dei Upbau van de Meesterhüüser. Dat wörn drei Dubbelhüüser för dei Bawhuusmeesters un ein einkeln Huus för den Direkter Walter Gropius. Dat Grundpand dorför ligg in einen lüttken Fuhrenbuschk an dei vandaoge so neumten Ebertallee. 1926 kunnden Gropius un dei Bawhuusmeesters Lázló Moholy-Nagy un Lyonel Feininger, Georg Muche un Oskar Schlemmer un uk Wassily Kandinsky un Paul Klee mit ehre Familjen intrecken.

Ansichtsplaon, van dei Ebertallee ut seihn

Meesterhüüser in Baukassenformaot

Gropius wull bi disse Siedlung mit industriell vörfardigte, einfache Bauelemente, so as ut'n Baukassen, dat ratschionelle Bawen ümmesetten unner Infaoten van dei Architektuur un den Baw-Afloop.

Dit Normeeren van dei Baudeile lööt sik wägen dei bit dorhen fählen Techniken blots deils maoken.

Dei Hüüser kreegen ehr Utseihn dör ineinanner sette, verschieden hoge kubischke Bauformen. Hochkant loopen Glasbänder an dei Siedenfassaoden sorgt för dat Lecht bi dei Treppenupgänge. Dei Straotenansichten van dei Dubbelhüüser füllen up dör dei groot anleggten Atelierfensters. Blots dei Fassaode van dat Direkterhuus was updeilt dör asymmetrischk insette Fensters.

An dei Achterfront leegen dei grooten Terrassen un Balkons. Dei Hüüser sünd hell sträken, dei Fenstersieten, dei Balkonunnersieten, Fallreuhers un annere Deile sünd in Farve settet.

Dei Dubbelhüüser sünd dörgaohns baugliek un dei einkeln Huushälften hebbt den süftigen Grundplaon, aover speegelt un üm 90° dreiht. Blots in dat tweide bäöverste Stockwark scheed sik dei Huushälften — ümmer dei Westdeil hett hier twei Rüüme mehr.

Alle Hüüser wörn mit modernet Huushold-Redschup utstaffeiert, tüschken dei Anrichte un den Ätruum as uk Schlaopkaomer un Atelier wörden Inbau-Schäppe inbawet. Gropius un Moholy-Nagy richten sik heel mit Möbelwark van Marcel Breuer in. Dei annern Meesters bröchden ehre eigen Möbel mit. Uk bi dei Farvgäbung harrn dei Künstlers eigene Ideen, dei tau'n Bispill bi Klee un Kandinsky eng tausaumehüngen mit ehr Kunstwarken.

An den Oost-Timpen van dei Siedlung wörd 1932 dei "Trinkhalle" upbawet. Disse lüttke Bau was dei einzigste realiseerte Bau van Ludwig Mies van der Rohe in Dessau un wörd 1970 wedder afräten. Dei Grundplaon dorvan is blots noch as Plaoster anleggt.

1932 wörd dat Bawhuus schlaoten un in dei Hüüser trücken annere Mieters in. In dei Kriegstied bleeven van dat Direkterhuus blots dei Sockel un dei Garage äöver. Up dit Fundament bawede man 1956 ein Einfamiljenhuus mit Saddeldack. Wat dor nu ut wern schall, werd noch äöverleggt.

Van dat Huus van Moholy-Nagy güng don, 1945, alls kott. Dei äöverbläben Meesterhüüser wörden siet 1992 reell saneert. Dat Meesterhuus van Kandinsky/Klee hett binnen siene b'sünnere Farvigkeit deils hollen of wedderkrägen.

Nao dit Beläven wörn wi ümmer noch neiwinnig up noch mehr Architektuur. Dat Körnhuus-Lokaol ligg nich alltauwiet af van dei Meesterhuus-Siedlung. Dei Utsicht up dei Elbe un up ein kommaudiget Verhaolen trück us dor nu hen.

Huus Muche / Schlemmer, Panoraoma-Bild ('n bäten vertrocken)

Links:

• Meesterhüüs
• Hier werd väle Saoken tau dat heele Bawhuuswark wieset