Uroma as junge Fru. Klick up to'n Vergröttern!

Miene Uroma

vun Anke Nissen


Een vun uns Enkeldeerns, uns Lene, will Hebamme warrn. Al vun lütt up an weer dat ehr Wünschen. Süh, un dor is mi denn enerwegens mal infullen, dat wi in uns Familie al mal en Hebamme harrn, mien Ur-Grootmudder, Lenes Oma mit dree "Ur".

Johanna Wilhelmine Petersen is an'n 14. April 1849 in Oldenburg in Holstein as Wilhelmine Landt up de Welt kamen.
Verheiraadt weer se mit Matheus Petersen ut Vadersdorf up Fehmarn. (Dat weer de Vadder vun mienen Opa, Detlef Nikolaus Matheus Petersen.) Wilhelmines Mann harr toletzt en Buurnstell in Burg, Süderstraat. (Later weer dor Schlachter Gäbel in.) Bi de groot Sturmfloot in'n November 1872 hett ehr Mann holpen, de Lüüd vun Burgtiefe to redden. Dor hett he en Lungenentzünden bi kregen un is dor an dood gahn.
Wilhelmine bleev mit ehre veer lütten Kinner alleen. Se hett de Landstell in Burg verköfft un hett up Hebamme lehrt. Se hett denn vele, vele Johr up Fehmarn as "Mudder Griepsch" arbeidt. Se hett ok 1905 mienen Vadder (Karl Ludwig Joachim Dittmer) un 1906 mien Mudder (Agnes Wilhelmine Juliane Petersen) up de Welt holpen.

Bi Thomas Sävert heff ik över de Ostsee-Sturmfloot leest:

An'n 13. November 1872 güng de See mit verheeren Wirken an Land. Vörteken för disse Naturgewalt geev dat al an'n End vun'n Oktober. Dor is dat Water ut de Nordsee dörch harten Wind ut West/Süüdwest mank Dänemark un Norwegen in de Ostsee rin dreven worrn. Hier stau sik dat Water denn tehmlich hooch.
Vun'n 10. November an hett de Wind denn düütlich nalaten, hett veel vun sien Wucht verloren. Sull dit villicht de "Ruhe vör den Storm" bedüden? De Fischlanner up'n Darß harrn so'n Vermoden. Un denn keem de Nordost. In de Nacht vun'n 12. to'n 13. November wörr de Wind to'n Storm un de Storm to'n Orkan. De toov mit Geschwindigkeit von 120 km/h und mehr un smeet gewaltige Waterbülgen gegen de Küst un över Land.

En anner Bericht, dütmaal vun'n Zingst, steiht hier bi Plattpartu.

Disse Sturmfloot is to'n eersten Mal hydrologisch un meteorologisch nehger ünnersöcht worrn. No nie harrn de Lüüd bet dorhen en so groot Sturmfloot beleevt, noch nie harrn se vun en so groot Stormfloot an de Ostsee höört. De Scheitelwaterstand leeg bi 3,50m över NN. So an de 18 Stunnen is dat Water över de Marke vun 2,00m över NN bleven. De Storm hett groot Pien över de Lüüd an de Küst bröcht, he hett slimmen Schaden anricht't ok in't Land binnen. 271 Minschen kemen to Dood, un 15.160 Lüüd harrn achteran Help nödig, 2.850 Hüüs un Schünen weern twei.


Uromas Ehrenuurkunn. Klick up to'n Vergröttern!

Vun de Insel Fehmarn weer so üm un bi en Viertel bet en Drittel ünner Water, 53 Wahnhüüs weern total twei, 366 Hüüs harrn veel Schaden afkregen, se müssen repareert warrn, oft sogoor afreten un nie buut warrn.

Klor, ok hüüt köönt so harte Seen kamen, kann en Sturmfloot de Küst bedrängen. Dat bedüüdt: Küstenschutz is ganz, ganz nödig, ganz, ganz wichtig!
Hüüt leevt veel mehr Lüüd in dat Rebeet vun de Ostseeküst. Mien Urgrootvadder hett 1872 villicht so 10 Lüüd vun de vörlagert Landtung Burgtiefe rünnerhaalt. Hüüt leevt dor Hunnerte.

Mien Urgrootmudder hett ehr Leven trotz dat groot Unglück in'n Griff kregen. Se hett ehre egen Kinner groot maakt un se hett vele, vele Babys up de Welt holpen. Dat gifft noch en Heft — en Ort Kladde — in dat se all de Geburten upschreven hett:


Klick up to'n Vergröttern!


Klick up to'n Vergröttern!


Klick up to'n Vergröttern!

Dit Bild — upnahmen 1913 — wiest de Hebamme Wilhelmine Petersen mit 5 Enkelkinner. De lüttste Deern (rechts), de is later mien Mudder worrn.


Klick up to'n Vergröttern!


14.7.2013


na baven