Osiris-Rex schmeet Asteroid-Materiaol-Kapsel aff

van Ludgerd Lüske

Osiris-Rex Kapselrückkehr-Breifmarke. Bild-Daoten: NASA

Süh ok hier:
Osiris-Rex 1
Osiris-Rex 2
Osiris-Rex 3
Osiris-Rex 4

Dei NASA-Sonde Osiris-Rex, dei Materiaol van den Asteroid Bennu upnähmen dö, is an den 24. September 2023 wedder duune nao dei Ern trüggeflaogen. Hier hätt dei Ruumsonde dei Materiaol-Kapsel affsettet un up dei Ern in dei Wöste in Utah tau’n Landen bröcht. Dei baoben bläben Ruumonde gaiht nu up eine tweide Mission.

Sönndaogs freuh an’n Morgen, an’n 24. September 2023, was dei Osiris-Rex-Ruumsonde nao den Start, in dat Johr 2016, wedder duune an dei Erdatmosphäre. An Bord wörn 250 Gramm Steinmateriaol, dat dei Sonde in dat Johr 2020 van den Bennu-Bodden upnöhm.

Osiris-Rex-Sonde, ünnerwägens in den Weltruum. Bild-Daoten: NASA. Klick up tau'n Vergröttern!

Osiris-Rex flög nich langsaomer, at sei dei Materiaol-Kapsel in einen Affstand van 102000 Kilometer van dei Ern affsetten dö. Forschkers in dei Boddenstation harn dortau ein Signaol nao dei Sonde funket. Dei Kapsel wörd dorbi mit ehr Hitteschild nao dei Atmosphäre utrichtet. Twintig Minuten nao dit Affsetten stellde dei Ruumsonde kort ehre Driewarke an. So kunn sei an dei Ern vörbifleigen nao den Asteroid Apophis hen. Dor schall sei ünner einen neien Naomen use Sünnensystem wiederhen ünnerseuken: Osiris-Apex (OSIRIS-Apophis-Explorer).

Landestäe in Utah. Bild-Daoten: NASA, süh Video: Youtube. Klick up tau'n Vergröttern!

Stäe tau‘n Testen un Euwen van dat US-Verteidigungsministerium in Utah,
hier is dei Landestäe. Bild-Daoten: NASA. Klick up tau'n Vergröttern!

Naodem dei Kapsel veier Stünnen dör den Weltruum raosde kunn sei üm 14,42 Uhr (MESZ) 44500 km/h dör dei Erdatmosphäre fleigen. Bi dit Tempo geef et dör dat Riewen in dei Erdatmosphäre naug Energie, för einen äöwerhittden Füürball üm dei Kapsel tau. Mit ein Hitteschlid kunn man dei Temperatur in dei Kapsel so stüern, dat sei nich äöwer dei Temperatur at up den Asteroidbodden köm. Mit Fallscherme kunn dei Kapsel heile in dei Wöste in Utah up einen Militärplatz (14 x 11 Kilometer) landen. 13 Minuten nao dat Induuken in dei Atmosphäre was dei Kapsel nao säben Johre wedder up dei Ern.

Dei NASA-Uphaol-Mannschkup kummp bi dei jüst landete Materiaol-Kapsel an.
Vörne, neern ligg dei Landefallscherm. Bild-Daoten: NASA-Youtube

Van hier bröchde man dei Materiaol-Kapsel an ein langet Transportreip, gaut inpackt, mit einen Helikopter in einen provisorischken Reinruum up den Militärplatz. So schull et, so gaut at et güng, minne Kontakt mit den Erdbodden gäben. Nu kann dat Asteroid-Materiaol in dei Labore weltwiet ünnersöcht wern.

NASA-Projekt-Video
NASA SVS | OSIRIS-REx