OSIRIS-REx besöch den Asteroid Bennu

van Ludgerd Lüske

OSIRIS-REx (Origins Spectral Interpretation Resource Identification Security — Regolith Explorer) is eine Ruumsonde van dei NASA, dei an'n 8. September 2016 mit eine Atlas-V-Rakete starten dö. OSIRIS-REx schall van den Asteroid (101955) Bennu — de Nummer in Klammern höört tau den Naom — Proben nao dei Eern trüggebringen. Bennu is ein Asteroid van den C-Typ. Dei bestaiht ut väl Käöhlenstoff un hätt dorümme einen düster laoten Bodden. Bennu hätt einen Dörmäter van 494 m.

Asteroid Bennu. Bild-Daoten: Wikipedia. Dor kannst den Asteroid bi't Roteiern taukieken, denn hei woor van alle Sieden opnaohmen.

Dei Gröttste is hei jüst nich: Grötte van Bennu. Bild-Daoten: NASA (afännert)

OSIRIS-REx flög an'n 8. September 2016 los. Dornao flög hei ein Johr lang up eine Baohn üm dei Sünne. An'n 22. September 2017 köm dit Ruumfohrtüüg in dat Gravitationsfeld van dei Eern. Dormit kreeg et eine neie Fleigbaohn nao den Asteroid Bennu hen. Dei Floogmanöver woorn ok as Swing-By-Manöver bruukt.

In'n August 2018 stüerde OSIRIS-REx up Bennu tau. Dei Ruumsonde bruukde dorbi eine Riege lüttke Raketenstraohlers. So köm dei Sonde sachte up dei Baohn van den Asteroid mit dei süftige Geschwinnigkeit. An'n 3. Dezember 2018 dröpen sick Asteroid un OSIRIS-REx.

Nee, mit dei Flünken sleit hei nich, dat sünd Sünnenseils: Dei Sonde in'n Anfloog up Bennu. Bild: Nasa

Don füng OSIRIS-REx mit dat Vermäten van Bennu an. Dit Wark duurde äöwer ein Johr. Dorbi söchde man nao Lande-Stäen, dei läöter, in'n Dezember 2019, faste stünnen.

In'n Oktober 2020 schall dei Ruumsonde kort up den Bodden van Bennu upstöten un eine Boddenprobe upnähmen. Dei Probenarm werd dorbi 5 Sekunnen lang mit den Bennu-Bodden Kontakt häbben. Dorbi werd ein Stickstoff-Raketen-Straohl Bodden-Materiaol un Felswark hoochpuußen. Dat werd mit einen Trichter infungen. So kann dei Apparaot drei Proben van 60 bit 2000 Gramm upnähmen.

ORIRIS-REx in dei NASA-Warkstäe. Bild-Daoten: NASA (afännert)

In'n März 2021 giff et ein Fenster för dat Trüggereisen van OSIRIS-REx nao dei Eern. Dor schall dat Ruumfohrtüg in'n September 2023 ankaomen. Dei Proben-Kapsel spring van OSIRIS-REx aff un landet up dat Utah Test- un Training-Gelände in dei USA.

In dei Johre 2023 bit 2025 werd dei Proben bi dei NASA ünnersöcht. 75% van dei Proben werd bi dei NASA inlaogert, so kann läöter weltwiet dormit wieder forschket wern.