Bloots noch Football

De Football-Walzer
vun Cord Denker — Melodie: Schneewalzer


Bloots vun Football ward noch snackt,
jedeen Wogen is beflaggt.
Freid un Frogen hebbt ehr Tied:
Wannehr is dat denn so wied,
dat de letzte Schuss mol fallt
un de grote Jubel schallt,
de uns seggt, de Meister steiht,
üm den sick denn de Sportswelt dreiht:

De Football danzt un kullert öber't Gröön...
Alle Mann — achteran!
Se söökt mit Kraft, mit Tricks un mit Geschick
dat wunnerbor grote, dat Weltmeister-Football-Glück.

Wat so'n Foot doch allens kann!
He driggt Fru un driggt ok Mann,
he kann Hinkepoot un Danz...
Man de allergröttste Glanz
is, wenn he den Football hett
un in't Tor dor dröben pett.
Denn seggt wi, de Foot hett Sott,
un uns is, as kick dor een Gott:

De Football danzt un kullert öber't Gröön...
Alle Mann — achteran!
Se söökt mit Kraft, mit Tricks un mit Geschick
dat wunnerbor grote, dat Weltmeister-Football-Glück.

Ümmer wedder kiekt wi to,
koomt noch lange nich to Roh,
denn dat gröne Football-Feld
is för uns de ganze Welt.
Un wi schunkelt sportbeglückt,
harrn de Jungs dor ünn'n geern drückt:
Hüüt ward Glück un Wunner wohr,
fallt de Ball nich in't falsche Tor!:

De Football danzt un kullert öber't Gröön...
Alle Mann — achteran!
Se söökt mit Kraft, mit Tricks un mit Geschick
dat wunnerbor grote, dat Weltmeister-Football-Glück.



na baven