Alternativet Wiehnachts-Riemel

vun Wolfhard Sauerbrey


Mien Wiehnachtsraatslag is för jeden:
Laat mit Geschenken mi tofreden!
Wohlstands-Gesellschopp — keen dor leevt,
de hett doch al, wat se em geevt!

Man: Hüütdaagsbörgers schenkt un schenkt,
dat blots keen anner vun jüm denkt,
se harrn nix in de Melk to krömen,
de annern kunn'n jüm giezig nöömen
se höörn nich to de annern Rieken —
de Minsch is jümmers an't verglieken!
Veel schenken — dat Gebot der Stunn',
un dormit geiht een vör de Hunn'n!

Mien leven Frünn'n, ik segg ju glieks:
vun mi kriegt ji to Wiehnacht nix!

Ik sett mi hen, poor Riemels schrieven,
un dorbi schall dat denn ok blieven!
Blots een Geschenk — dat gellt för jeden:
Weest doch, mit wat ji hebbt, tofreden!


24.12.2021


na baven