Duersåm taun Valentinsdach schenken!

vun Behrend Böckmann

An'n 14. Hornung is't wedder so wiet, œwer Blaumen, Schokelor un Rükels sallen nich mihr taun Valentinsdach dat sien, wat's mål wiern, ok wenn dei Hannel dormit giern dat Geschäft twüschen Wihnachten un Ostern beläben will. Dat gräune Denken hett nich blot dei Gräunen tau mihr Anseihn un sogor inne Regierung verhulpen, sonnern bringt ok männig Minschen dortau, sik in Richtung Gräun tau wanneln, vegetaar'sch orrer vegan tau läben, unverpackt intauköpen, Kledåschen ut Flass, Linnen orrer Kattun antautrecken, Bioeier inne Pann tau schlågen, Mell un Netteln as Willkrut wassen låten un dorgägen aünd, dat 'n Madding as Köder up'n Angelhåken treckt ward.

Duersåmkeit (Nachhaltigkeit) is dei Devis', dat minschlich Daun sall wedder för'n lang Tiet vörhollen un so duerhaftig sien as dei Frädenswor tau Kaisers Tieden. Wind-, Sünnen- und Wåderenergie ersetten Atom- un Kohlestrom, Ierdwärme den Åben, Sojabohnen un Lupinen warden tau gräune Schnitzel upfidummt, Håwermelk löst dei Kauh af — un so möten nu ok dei Leiwesgåwen taun Valentinsdach bäten biogräun warden.

Œwer wat för duersåme Gåwen åhn böse Kåhlendioxid-Warmhus-Gase sall hei ehr un sei em nu so anbeiden, dat dorbi ok noch Freud un Vergnäugen upkümmt? Vörschlääch sünd taun Bispill: Dor Mannslüd Jäger un Sammler sünd, sall sei för em 'n Schnitzeljagd in Hus un Gorn organisieren un hei dorbi por "Bio-Gautschiens" finnen, dei hei nå un nå inlösen kann. Hei hengägen künn mit ehr Lütten Meddach inne Puuch äten, mit ehr ünner dei Dusch hüppen un sei dornå inne Puuch massieren. 'N Gautschien för 'n Kinobesäuk, för 'n Iesbåhn un 'n "Bungeejumping" orrer por Wellnessdach in'n Bio-Hotel wiern ok denkbor, äbenso sülben 'n Kauken backen orrer 'n "Candle-Light-Dinner" anrichten. Man kann sik ok gägensiedig mit 'n Billerbauk orrer 'n Musiksticken œwerraschen, 'n Tasch för Ackerschnacker prünen orrer as Fådenkünstler Biller as Erinnerung rutsäuken, upfädeln un sichtbor anbringen.

As Vörschlåch heff'k denn noch den Henwies up duerhaftig Biowäsch funnen. För em dortau 'n ümweltfründlichen Haut orrer Mütz ut olle Kaffesäck un för sei 'n ümweltfründlich Handtasch ut Amsterdam, ok ut 'n ollen Kaffesack. Äbenso gifft dat Henwies up wunnerschöne Kattun-Ünnerwäsch orrer Alpaka-Decken. Nich tauletzt warden 'n Pop-Art-Portrait ('n målt't Bild von'n Aflichtung) un 'n romatisch 3D-Hartlamp ut'e Lüchtenwelt vörschlågen.

So beseihn, helpen disse duerhaftigen Gåwen taun Valentinsdach ok, dat dat 2015 up'e UN-Klimakonferenz in Paris fastlecht 2 Gråd-Enn' för dei Ierderwarmung mœglich ward.

duersåm = plattdeutsches Wort für "nachhaltig"