Truerspeel

vun Heinz Tiekötter


Wenn du dörch uns scheunet Sleswig-Holsteen op Tuur büst, denn kiek di jümmers ok mol de Karken an, an de du vörbi koomst. Kannst veel vun uns Geschicht bi rutfinnen. Wi weern lestens in Angeln, dat Land twüschen Schlie un Flensborger Föörd. Uns öllste Söhn leevt dor.

In een lütt Gemeende stunnen wi op'n Karkhoff vör en Kriegerdenkmol. Dorop weern de Nomen vun de gefullenen Suldoten ut den ersten un den tweten Weltkrieg to lesen. Wenn du vör so'n Steen steihst un kiekst di mol de Nomen an, de dor inhaut sünd, denn warst du wies, wat dat Leben de Minschen hart mitspelen kann. Dor stoht Geschichten op. Du muss blots mol henkieken. Een kann dor solk Truerspele opdecken, dat he Twiefel an uns Leben Gott kriggt.

De Steen, vör den wi annerlest stunnen, vertell, dat en Johann Kruse in de Ardennen fullen is. Op de Welt is he 1885 komen un dootschoten hebbt se em 1917. Tweeundottig Johr is wisslich keen Oller. Johann Kruse harr wull grod noch dat Glück, to beleven, dat siene Fro em twee Jungs schenkt hett. Wat hett he doon, dat se menen, he is old noog worrn? Un wat hebbt Fro un Kinner to dat Unglück seggt, in dat anner Lüüd se rinstött hebbt?

Wieder ünnen op den Steen weern de opfeuhrt, welk ut den tweten Weltkrieg nich trüchkomen sünd. Dor stunnen wedder de Nomen vun twee Mannslüüd, de ok Kruse heten hebbt. In so'n lütt Dörp is dat doch keen Tofall. Weern dat an Enn de beiden Söhn vun Johann Kruse. Een hett Artur un de anner Albert heten un se weern een Johr utenanner. Albert is 1942 in Frankriek för Gott un Vadderland fullen un Artur 1943 in Stalingrood. Wat, wenn dat würklich de beiden Jungs von Johann Kruse west sünd? Hett hier een Modder beleevt, dat ehr nu ok de Jungs nohmen sünd, nodem dat se ehren Mann in den ersten groten Krieg all verlorn harr?

Wenn ik sowat lees, mool ik mi ut, woans de Modder dormit trechkomen is. Eerst den Mann un denn de beiden Kinner. Un denn packt mi de Wut op all de, de ehre Fingers nich vun den Striet loten köönt orrer dormit ehr Geld verdeent. Un ik stell mi vör, dat ik de Waffenfabrikanten un de Politikers in de Fingers krieg. Lüüd, de meent, de Krieg is blots en annere Form vun Politik. Ik wurr jem frogen, worüm se nich sülmst 'n Knüppel in de Hannen nehmt un sik ehrn Profit sekert orrer ehre Differenzen klärt. Een mutt sik mol vörstellen: Dor sünd alleen dree Millionen Minschen 1943 op beide Sieden in Stalingrood storben; dree Millionen Minschen! Man de sünd nich eenfach storben. De sünd dootscheten worrn, de sünd verhungert un erfroren. Un de poor, de dor rutkomen sünd, kunnen ninich wedder vergeten, wat se beleevt harrn un süllmst sik un anner Lüüd andohn hebbt. Un doröber snacken kunnen se all lang nich.

Un vundoog snackt de Politikers bit hen to uns Bundespräsidenten wedder vun uns internaschonole Plichten un dat wi Verantwortung öbernehmen mööt. Wenn wi uns Produkte in de hele Welt schicken wüllt, denn süllt wi, nödigenfalls mit Waffengewalt, de Verkehrswege freeholln. Dat hett de vörige Bundespräsident Köhler 2010 ok all seggt. Also wüllt all wedder Minschen, de noch ninich in ehr Leben eene eenzige warme Mohltied versüumt hebbt, junge Lüüd, de se nich kennt un de jem ok piepegol sünd, jichtenswo in Utland an irgendeen Front schicken. Denn so stiegt dat Bruttosoziolprodukt un jemmer Börsenkurse orrer wat weet ik. Un de Politikers, de sik ehrn Wohlkampf mit veel Geld ünnerstützen loten, un de Medien, bi de se ehren Schmuus veröffentlicht, de vertellt vun Krise, vun Krieg un vun Konjunktur un wüllt uns wies moken, dat wi oprüsten mööt, dormit wi vun den Feind nich ünnerbuddelt ward. Un dat wi uns nich allens gefallen loten köönt; dat uns Wohlstand, uns Sekerheit un uns Demokratie in Gefohr is, wenn wi nu nich opstoht. Un dat de düütsche Verdeedigung an'n Hindukusch anfangt. Ik find, wer sowat seggt, de hett Rotten op'n Böhn.

De uns dat wiesmoken un intrichtern wüllt, dat sünd nich uns Frünnen. Wi süllt jem blots de Kastonien ut dat Füer holen, in dat se de sülmst rinleggt hebbt.


Foto Statue: Katja H. Renfert, renfert.net

13.11.2016


na baven