"Warr ik denn jümmers piepsen, wenn ik an de Kass vörbidackel?"

Chip-Plicht för Katten un Hunn

vun Behrend Böckmann

Af 1979 ward dat Europäisch Parlement mit Sitz in't franzöös'sche Straßborg as dat gesetzgäbend Organ vonne EU wählt un måkt Gesetze, dei denn dörch Order von'n EU-Ministerrat in't belgisch Brüssel inne EU-Länner ümsett't warden.

"Versöök mal, mi 'n Chip intausetten, wenn ik nich will!"

Dat gifft Gesetten tau väle grote Såken in Wirtschaft, Hannel, Banken... Schullen un Kredite... wecker möt Geld nå Brüssel gäben un wecker kricht Geld ut Brüssel...

Un näben disse groten Såken kümmert man sik ok üm den Eikstrich an'n ierden Bierseidel in Bayern, üm dei Grött von Lümmeltüten (Präservative) un Bananen, üm grade un krumme Gurken, dorüm, wennihr 'n Kaukenbasar up'n Schaulhoff stüerplichtig is, dat in'n Wirtschaft Semp, Mayo orrer Ketschup nich mihr in'n 10g Plastehüll utgäben ward (vunwägen den Müll), sonnern as Klacks ut 'n Tittenspenner up dei Knackwust orrer Tüffelsticken drückt ward. — Disse Geschichten sünd dat Wåder up'e Mœhlen von Minschen, dei mit disse Oort EU nich väl an'n Haut hemm'.

"Ik will nich den lieken Chip as so'n verflixte lusige Katt!"

"Wosaken hett dei Hund mi näumt?! Lusig?! Na dei truut sik wat!"

Un nu kümmern s' sik ok noch üm Katten un Hunn un sünd dorbi, 'n Chip-Plicht för Katten un Hunn dörchtausetten, dormit Katten un Hunn in Düütschland bäder läben as 'n SDF (franzöösch "sans domicil fixe" — dat heit "sünner fasten Wohnsitz") ünnern Eiffeltorm orrer an't Äuwer vonne Seine. Dörch disse Chip-Plicht kåmen dei Veihdokters tau gaude Innåhmen, denn mit den Chip ward dei Katt orrer dei Hund in'n Datenbank upnåhmen un is so ümmer wedder erkennbor. Man gifft vör, dordörch Kriminelle dat Handwark tau leggen, dei Tucht von Hunden tau kontrollieren, Krankheiten fixer tau erkennen, den illegalen Welpenhannel un dat Kupieren von Stiert un Uhren tau ünnerbinnen, Tierheime tau helpen un den Internethannel mit Katten un Hunn dörchsichtiger tau måken. —— Un denn kåmen wedder dei Fristen un Utnåhmen. Wat hett noch fief un wat noch teihn Johr Tiet un dat 'n Musfänger up'n Buernhoff wiederhen åhn Chip läben dörf...

"Könen wi mit den Chip nich leiwer Apporteern spälen?"

"Ein Geschäft witter ik sünst ok — man bloots ein Geschäft ut Pipi un Kaka!"

Un denn möten all dei EU-Maten sik eins sien, dat sei dat mit dei Chip-Plicht för Katten un Hunn so hollen willen, as Brüssel dat vörschlööcht. Un wiederhen sall dörch dei Chip-Plicht dei In- un Utfuhr ut in Nich-EU-Länner rägelt warden. Inne EU sallen nå dei Statistik mihr as 72 Milljonen Hunn un 83 Milljonen Katten läben un sik dei Hannel mit disse Dierten — un dat mierstendeils dörch Internet — up 1,3 Milljarden €uro belopen. Wat för 'n Geschäft!!!

Uns Nåwersch ehr Katt sitt af un an bi mi in'n Gorn un luert 'n Musbråden up — un ik heff mien Freud doran, wenn s' denn taulangt, mit'e Muus in't Muul aftreckt un mien Nåwersch den Bråden up't Süll lecht.