Dei SPD versöcht dei Quadratur des Kubus — oder so ähnlich

Quo vadis, SPD?
Dei düütsche Wenn'

vun Behrend Böckmann

Dei düütsche Kaiser hett schlåpen, as dei Grotmächt dei Welt ünner sik updeilt hemm' — un so würn Grünn' söcht un funnen, üm dorgägen uttaudeilen, un twors in Schlachten up'e See. So wunnert dat ok nich, dat an'n 2. Dezember 1914 dat düütsche Parlement bet up einen Mann taustimmt, dat fief Milljarden Rieksmark för den Krieg locker måkt warden. Un dei alleinig Gägenstimm' keem von den sozialdemokrat'schen Afkåten Korl Liebknecht (1871-1919), dei dissen Maut mit'n Dod betåhlen mösst.

Otto Wels. Sühst glieks an sien Gesicht: Dei Tieden wiern iernst

Düütschland gewinnt nich den Krieg, Lännerien gåhn verlustig, dei Uplågen von'n Versailler Verdrach sallen Düütschland in Schach hollen. Un denn geiht dat mi dei Wirtschaft barchaf, väle Minschen hemm' kein Arbeit un låten sik von dei brune Bewägung blennen, dei dorbi is, dei Macht an sik tau rieten. Un sei schaffen dat ok mit den "Führer", von den dei Dichter Bertold Brecht eins säd: "Kinner, dor is doch wat fuul — 'n lütter Bort un denn son'n grotet Muul". Un disse Minsch kreech in Düütschen Rieksdach dörch Gesetz dei Vullmacht, "Not von Volk un Riek" aftauwennen (Ermächtigungsgesetz). Bet up dei Düütschen Sozialdemokraten hemm' all in't Parlement taustimmt. Otto Wels (1873-1939), dei all den schikanösen Ümgang mit dei KPD-Maaten nå den dei Kommunisten ünnerschåben Rieksdachbrand beläwt harr, begrünnt mit väl Maud nu as Sozialdemokrat an'n 23. März 1933 vör't Parlement för dei 94 Sozialdemokraten in'n Rieksdach, worüm dei SPD gägen disse Vullmacht is.

Üm 1930 weer de SPD noch geel

Dat bringt in, dat dei SPD verbåden wür, väle Genossen afwannerten un mit roden Winkel in Dachau, Neuengamme un annerswo schinnern mössten. Un disse Kierl mit den lütten Bort un dat grote Muul bröcht dei Welt as "arischer Herrenminsch" Krieg un Älend. In fief Johr 2. Weltkrieg keemen 60 Milljonen Minschen üm ehr Läben, dorünner 27 Milljonen Sowjetbörger. Inne gröttst Not hett sik denn Amerika mit dei SU tausånmendån un in'n Mai 45 mösste Düütschland kap'tulieren, wür von vier Siegermäche besett't, in't Afkåmen von Potsdam dei Grenzen nie treckt, Nürnbarger Prozess, Marshallplan, Reparatschonen, Koller Krieg, Berliner Muer, Kneifall von den Sozialdemokraten Willy Brandt (1913-1992) in Warschau, niege Ostpoletik, Kohl un Gorbatschow sitten tausåmen inne russ'sche Sauna un beschluten, dat Düütschland wedder eins warden künn, wenn dei NATO kein Truppen achter dei Oder in Richtung Moskau statschoniert.

Üm 1970 woor dat Logo wat moderner

"Gorbi", dei Mann von Glasnost und Perestroika, sorcht dorför, dat sien Verspräken wohr ward, un nå un nå hålt hei sien Miltär inne Heimat taurüch. 50.000 Amerikaner blieben hengägen in Düütschland un stüern von Rammstein ut militärsche Operatschonen in'n Irak un in Afghanistan. All dei düütschen Kanzlers ståhn tau dei Bündnisplicht inne NATO un ünnerstütten ok af 1990 dat geopolitische Janken, Russland as Rest vonne Sowjetunion wieder tau ümzingeln, un måkt allens, dat dei einstigen Ostblockstaaten un sogor dei baltischen Sowjetrepubliken EU- un NATO-Länner warden. Man krüppt ümmer dichter an den bösen Russen ran, dei USA as dat NATO-Land spält sik taun Weltgendarmen up ünnerhöllt dortau mihr as 1000 Stützpunkte in alle Welt, dormit ehr abendlännisch Frieheit, Demokratie un Minschenihr œwerall Faut fåten kann.

Gerhard Schröder — dei drüdde sozialdemokratisch' Kanzler nå Willy Brandt un Helmut Schmidt un vör den vierten Olaf Scholz — harr 2002 den Maud, sik mit den franzöö'schen Präsidenten Chirac un den russ'schen Präsidenten Putin gägen den Irak-Krieg tau verbünnen. Œwer Amerika hett sienen Kopp dörchsett't, un so hemm' mihr as 100.000 Minschen dissen Krieg nich œwerståhn. Schröder hett sik mit Putin verståhn, un dat hett em gaude Posten bi Rosneft un Gazprom inbröcht. Doch nu leggen dei sozialdemokrat'schen Genossen em dat tau Last un willen em dat Lock wiesen, dat dei Timmermann låten hett. Un dei sozialdemokratisch Kriegsministersch schasst Marine-Chef Vizeadmiral Kay-Achim Schönbach, wieldat hei in Indien von sik gäben dat, dat man mit Putin von Och tau Och schnacken süll, em den Respekt wiesen süll, den man sülben verlangt. Un SPD-Landsmudder Manuela Schwesig möt sik von'n ukrain'schen Botschafter Melnyk seggen låten, dat "ehr Hüchelie taun Kotzen" is, wenn's ehr Staatskanzlei inne ukrainschen Farwen anlüchten deit un in'n Stillen ümmer noch von Nordstream 2 drömt.

Putin hett in sien Räd vör'n Bundsdach an'n 25. September 2001 up Düütsch dorvon schnackt, dat em dat röcht un bewächt, vör't düütsche Parlement œwer dei düütsch-russ'schen Verbinnungen, dat einig Europa un dei internatschonale Säkerkeit tau schnacken. Œwer hei wür nich iernst nåhmen, NATO un EU krupen ümmer dichter an Russland ran; wat Kohl un Gorbi inne Sauna beschnackt hemm', dat gellt nich mihr. As dat Baltikum un dei Balkan 'n Upmarschrebeit för Amerika wiern, dor måkt 'n sik anne Ukrain, Georgien un Moldau ran un gifft väl Geld för dei Bewägungen ut, dei' n Taukunft mit 'n Westen willen, so väl, dat nu Putin den Respekt för Russland schwinnen süht un hei schlöcht üm sik.

Nu-Bundskanzler Scholz schnackt noch mit Putin. Doch dat is all väl tau låt, dei "militärsche Operatschon" — so näumt Putin dat — is all anschåben. Nu kümmt in Düütschland Bang up, dei NATO möt nu wiesen, dat's stark is. Un wiel dat allens fix gåhn möt, ward dei Bundsdach an'n Sünndach, den 24. Februar, tausåmentrummelt un Kanzler Scholz gifft 'n Regierungsverklorung af, dei hei wull gor nich so recht mit sien Gesossen beschnacken künn. Un so schnackt hei nu as ierster Sozialdemkrat inne düütsche Geschicht dorvon, dat wi näben dei bummelig 60 Milljarden NATO-Geller un gaut 50 Milljarden för dei Bundswehr in't Johr noch 'n Sonnerfong von 100 Milljarden inrichten un sik so dei Bundswehr un dormit Düütschland mit sien rod-gäl-gräune Regierung up dei Tiedenwenn' inne Welt instellt.

"Quo vadis, SPD?" — dat möt 'n sik un dei Genossen frågen, dei ümmer noch ludhals "Dem Morgenrot entgegen" singen.