vun Behrend Böckmann

2015 verkünnt Jens Spahn, dat hei, as Kierl, annersrüm un Christ, sik nich dormit anfründen kann, 'n frömden Frugensbuk tau hüern, üm åhn bitaukrupen Vadder tau warden. Dat verlangt väl Demaud, un hei weit nich, ob hei dei upbringen künn. 2017 friecht dei Bankkoopmann un CDU-Maat in'n Bundsdach Jens Spahn (Johrgang 1980) den Journalisten un Menätscher Daniel Funke (Johrgang1981); Hochtied warrt up Schloss Borbeck in Essen fiert.

För Spahn güng't ümmer vörwarts. 2001 höllt hei dat IHK-Tüüchnis inne Hand, utmustert sitt hei 2002 all in'n Bundsdach, bringt dat dor taun Minister un tauletzt taun Frakschonsbaas. Inne Coronatied hett hei den Arger mit dei Corona-Masken œwerståhn; hei harr för den Bund 5,7 Milliarden Corona-Masken för 5,9 Milljarden Euro köfft un blot twei Milljarden Masken verdeilt — un so mihr as dei Hälft dörch 'n Schostein jacht. Doch hei is noch mit'n blåch Ooch von afkåmen.

Dei välen Johren inne Poletik hemm' em 'n Vermögen von ca. 3,2 Milljonen Euro inbröcht, hei hett nauch Geld un ok den nödigen Maut, un hei is sik upstunns mit sienen Daniel eins, sei willen 'n Fomilie warden, 'n Kind uptrecken. Un dor s' nauch inne Kniep hemm', sünd sik dei beiden eins, 'n Leihmudder antauhüern, 'n Fru, dei 'n Kind utdrächt, 'n Jungen, von den Daniel dei biologisch Vadder is, denn Spahn gifft dei Bildtiedung tau verståhn "Mein Mann ist Papa geworden, und ich mit ihm."

Œwer dat Poor wull kein Kind taun "Schnäppchenpries" von 39.900 Euro ut 'n ukrainsche Babyfabrik mit Geld-taurüch-Garantie, wenn't nich klappen süll. Ne, œwer 'n Vermiddlungsbüro (Vermittlungsagentur) finnen's in Kalifornien dei Klinik un dei Fru, dei ehrn Wunsch nåkümmt. Dor is dat mœglich, wenn 'n schwulet Poor sik 'n Kind wünscht, wenn bi 'n Poor dei Kinnerwunsch utblifft orrer wenn man — so as Paris Hilton un Nicole Kidman — dat Publikum nich mit Kind ünner dei Schört ünnerhollen will. Man möt an Kosten för dat Büro, dei hüert Mudder un dei Fruchtborkeitsklinik blot twüschen 110.000 Euro un 170.000 Euro henblädern. Hentau kümmt, dat in Kalifornien dei Gesetzen so sünd, dat dei Fru, dei dat Kind utdräächt, nich as Mudder gellt un dat Kind nich as Amerikaner tau Welt kümmt, sonnern in'n Fall von unsen düütschenSamenspenner von Geburt an Düütscher is — Grund för Spahn, tau verkünnen "Mien Mann is Papa worden un dormit ik ok."

Un Papa un Papa schuben all mit Georg Spahn-Funke in'n Kinnerkutsch œwer dei Mattschief. — Un nu dei Upschrie, dorbi hemm' all in'n Prilmånd Hendrik Streeck as CDU-Maat in'n Bundsdach un sien Ehemann Paul Zubeil verkünnt, dat ehr Läben dörch dei œwerglücklich Geburt von ehrn Sœhn 'n ganz niegen Sinn kreech. Dei beiden stöten biologisch bedingt an Grenzen, 'n Kind inne Welt tau setten. Œwer sei wullen 'n Fomilie warden un hemm' sik mit väl Geld, dat's as 'n schwulet Poor nich mal as besonners grote Belastung vonne Stüer afsetten kœnen, den Kinnerwunsch in Amerika erfüllt. Un dat geef keinen Upschrie as nu bi Papa Spahn un Vadder Funke, harr sik dei CDU doch ierst in'n Hornung (Februar) 2026 up ehrn 38. Parteidach gägen jedwed Form von hüert Frugens utspråken, dei för anner Lüd Kinner ünner dei Schört utdrägen.

Wat Spahn as CDU-Frakschonsbaas mit sienen lütten Büxenschieter — döfft up den Nåmen Georg nå den Opa Spahn — måkt hett, dat rüddelt anne CDU-Festung un sien Partei höllt dat för politsch fatal, ok wenn dat minschlich tau verståhn is. Hett Spahn wirklich dacht, hei wüür dormit dörkåmen? As in'n Hornung dei CDU-Parteidach in Stuttgart leep un dei Besluss gägen Leihmoderschap fåten wüür — dor fullen Wüür as "Utbüden vun Fruuns", "christlich Minschenbild", "Minschenwöörd" un sogor "Slaaverie" — as dei Besluss fåten wüür un Jens Spahn tau allens Ja un Amen secht un allens afnickt hett: dor wier dei Verdrach mit dei Leihmoder in dei USA al lang verhannelt un utarbeidt un dei Leihmoder wier ok al lang swanger! Wenn hei dat tauvör ok as Privåtsååk ünner dei Deek hollen harr, wier nu op den Parteidach doch dei letzte Momang, dat åpen tau maken. Laatstens hier harr Spahn vör sien Lüüd treden un seggen müsst: "Leven Lüüd, ut persöönliche Grünnen mutt ik mi dütmaal vonne Stimm enthollen, ik heff mit mien Mann beslåten, dat wi dat sülven in Ansprook nehmen willn, ja wi daun dat al in düssen Momang." Denn harr hei noch mit Ehren dor rutkåmen kunnt — so hett hei einfach hüüchelt. Orr dach hei, Regeln gellen nich för em?! — Den Shitstorm, dei öwer em rinbråken is, den hett hei sik redlich verdeint!

Mach man von em hollen, wat 'n will, œwer hei hett dei Signale gau verstahn un schmitt den Posten as Frakschonsbaas hen — nich ganz von sik ut, dor hett woll ok Merz an't Telefon ein Wuurt tau secht. Nu is hei, dei Super-Ehrgiezige, miteins ganz Familienminsch un verkünnt "Mien Fomilie is mi dat Allerwichtigste". För Spahn, dei 'n CDU-Beschlut in't Utland ümgüng, ward sien Privatgeschicht taun politisch Geschicht, taumål hei un sien Mann ehr Vadderglück grot inne "Bild"-Tiedung utpalawert hemm' un dornå denn alle wichtigen Posten tau trudeln anfüngen. — Wo giern wier Spahn sülwen Kanzler wuurn! Hei harr sik al up Merz sienen Platz seihn... nu is dat dei Platz an dei Wickelkommod'. Man wisslich dröömt hei dor al von niege Karriereschreed nå ein lütte "Anstandspaus". Dor wier hei ja nich dei Ierste. Man ik weit nich, wat ik so einen as Kanzler hemm wull, dei denkt, Regeln un Gesetten sünd för em ganz unverbindlich... All Minschen sünd gliek, oewer hei is glieker... In Amerika hemm sei ja al so einen un sünd nich ganz glücklich.

Nu heit dat för Frakschonsbaas Miersch von SPD — hei läwt ok mit 'n Mann tausåmen — uppassen, dat hei nich ok noch taun Jubel vonne Oppositschon in son'n Fettpott pedden deit!