Frugens un Mütter måken Geschichte

vun Behrend Böckmann

Dat wiern Odin bi uns nuurdischen un Svantovit bi uns slawischen Vöröllern, dat wiern Ares bi die Athener un Mars bi dei Römer, dei inne Götterwelt läwten un Malligkeiten up Ierden mit 'n Schweert tau Lief güngen. Un so gåhn Mannslüd inne Geschicht in: Nero as Kaiser von Römisch Riek, dei fränkisch König Karl der Große, Dschingis Khan as mongol'scher Herrscher orrer Mahmud von Ghazi as persischer Sultan. Œwer in't Middelöller keemen ok all Frugens anne Macht. Dat best Bispill dorför is, dat dei kinnerlose reformierte inglische Königin Elisabeth I. (1533-1603) inne kathool'sche schott'sche Königin Maria Stuart (1542-1587) 'n Gefohr seech denn Maria Stuart 'n Anschlach up ehr Läben ünnerschüfft, wägen Hochverrat achter Trallen bringt un 1587 'n Kopp körter måken leet. Maria Theresia (1717-1780), dei as Erzherzogin von Österriek un Königin von Böhmen un Ungarn in 18 Johr 16 Kinnner kreech un ehr Soldaten inne Schlesischen Kriege un dei Österrieker Arffolgekriegen trecken leet, harr ok Maless mit ehr 15. Kind Maria Antonia (1755-1793), dat dörch Heurat dei Fru von denn franzöös'schen König Ludwig XVI. wür un 1793 as Marie Antoinette ünner't Fallbiel lannt. Katharina dei Grote von Russland harr as Prinzessin von Anhalt-Zerbst düütsche Wöddeln, ward nå St. Petersborg verfriecht un nimmt mit Hülp von Frünn bald ehrn "Geleiwten" dei Kron af un sett sei sik sülben up'n Kopp. Sei måkt Russland taun Macht in Europa un hannelt tau glieken Tiet Buern in't Land noch billiger as Schwien un Hunn'. As Pugatschow (1726-1775) den Upstand waacht, lött's em fangen, foltern un åhn Gerichtsverfohren up'n Roden Platz von Moskau richten.

Maria Theresia hett Poletik nich bloots as Fru, sünnern ok as Mudder maakt —
se hett bookstäävlich de Produkte vun ehrn Uterus in de Poletik insett

Disse emanzipierten Regentenmüdder gåhn mi so dörch'n Kopp un låten mi an männig Frugensminsch von hüt denken. Dor föllt mi gliek dei kathool'sche gäle Marie-Agnes Strack-Zimmermann (Johrgang 1958) in, dei as Mudder von drei Kinner un as Größing up 'n Motorrad in'n "Verteidigungsutschuss" von'n Bundsdach Wurtführer is un in schwore Waffen för den ukrainschen Oligarchen Selenskyj dei Reddung von uns åbendlännisch Frieheit un Demokratie süht.

Un denn bün ik all bi uns Kriegsministerschen "Flinten-Uschi", AKK un dat Strickliesel.

Dei evangel'sche Flinten-Uschi (Johrgang 1958) as Dochter von den CDU-Poletiker Ernst Albrecht (1930-2014) wür mit fief Bräuder grot, ward Dokter, verfriecht sik mit 'n Minschen ut 'n noblen Stand hett denn sülben sœben Kinner. Näbenbi kladdert's up'e Poletikerledder: von'n Ratsmaat in'n Heimaturt sticht's œwer dei Landsregierung in Hannover in'n Bundsdach un un Bundsregierung taun Arbeits-, Fomilien- un Kriegsministersch in Berlin up un ward 2019 Präsidentin vonne EU. Sei lött sik Kledåschen inne unkrainschen Landsfarwen blåch un gäl schniedern un deit allens, dat dei Ukraine noch ihrer as dei Türkei EU-Maat ward.

AKK hett de Nees vun en Fuuldeert — en echte Deertennees

AKK — dei röm'sch-kathoolsche Annegret Kramp-Karrenbauer — löst Flintenuschi af. Sei harr ok dei politisch Tippel-Tappel-Tour von'n lütt Amt in't Saarland œwer Ministerposten un denn Ministerpräsidenten nå ganz båben schafft. Sei hett Politik un Recht studiert, ward CDU-Maat in jungen Johren, friecht un is bald Mudder von drei Kinner. Sei höllt nicks vonne Eh för all, måkt tau Fastnacht 'n Witz taun Transgenderlokus un ward dorför mit den "Negativ"-Pries "Miss Homophobia" ihrt. In Berlin ward sei denn Kriegsministersch, sotauseggen ok as Siedeninstieger, un sei ward dei Bundsbaas vonne CDU. Doch dei Thüringer Frünn' måken ehr dat Läben schwor un sei gifft dissen Posten up. As Kriegsministersch hett s' allens dån, dat dei düütsche Säkerheit ok an'n Hindukusch verteidigt wür! As in Mali Putschisten anne Macht keemen, dunn wür ehr dei russ'sche Pistol up'e Brust sett't.

Villicht is sei froh, dat nu ünner dei rod-gäl-gräune Regierung dei evangel'sche Anwältin Christine Lambrecht (Jahrgang 1965), dei sik as SPD-Maat*in von ünnen nå båben strampelt hett, dei drüdde düütsche Kriegsministersch in Folge is. In'n Volksmund hett sei den Ökelnåmen "Strickliesel" krägen, wieldat sei giern kåkt, Kåkbäuker schrifft, nå'n Uteinannerlopen allein ehrn Sœhn Alexander uptreckt un bemuddert un em mit up Deinstreisen nimmt, dei sik giern präsentiert. Hett sei tauierst Stahlhelms inne Ukraine liefert, organisiert sei nu den Panzerringtusch för dei Ukraine un dei Liewerung von schwore Waffen un äbenso dei Liewerung von warme Ünnerbüxen för dei ukrain'schen Soldaten.

Dat Larmen un Lamentieren œwerlött sei dei gräune evangel'sche Mücht-giern-Kanzlersch un nu Ministersch för Butenangelägenheiten Annalena Baerbock (Johrgang 1980), dei dat taun grotorrig Trampolinhüppersch näben ehr Politik- un Rechtsstudien bröcht hett. As ierste Fru in dit Amt verklort sei dei Welt, dat's as Mudder von twei Mätens, dei noch tau Schaul gåhn, as Spitzenpolitikerin 'n gaude Mudder sien un blieben will un dat's, ok wenn ehr Wählers sik nich insichtig wiesen,
dei Ukraine mit Wafffenliewerungen taun Sieg œwer Russland verhelpen will. Sei benimmt sik inne Welt nich anners as dei ukrain'sche Botschafter Melnyk in Düütschland.

Un denn sünd dor noch twei kinnerlose Frugens, dei sik up ehr Oort för uns abendlännisch Kultur insetten: Claudia Roth (Johrgang 1955) un Eva Högl (Johrgang 1969). Dei von Geburt kathool'sch Claudia Roth — sei hett ehr Kark verlåten — studiert as Jungdemokratin Theoterweiterschap, Geschicht un Düütsch, wannelt denn tau links-gräun, flötert mit Muskanten von "Ton, Steine, Scherben" un lött denn doch dei Kierls susen. Sei will ok nich allein as Mudder 'n Kind upfaudern un so ward dei Poletik ehr leiwstes Kind. Sei kladdert as WG-Bewåhner dei Politledder rup un hett dat hüt bet taun Kulturstaatsministersch bröcht. Sei fäuhlt sik sihr för humanitäre Hülp taustännig un is dorför, dat dei Ukrain denn Kandidatenstatus för dei EU kriecht. As Koalitschonspartner in't niege Tietöller höllt sei nich mihr an ehr einstigen Vörstellungn von "Fräden schaffen åhn Waffen" fast. Sei glöwt ok, dat dei westlichen Wiertvörstellungen blot mit schwore Waffen siegen kœnen un dat ehr humanitäre Hülp gägen dei Moskauer Propagandamaschin dit Anliggen ünnerstütten deit.

Un denn löppt mi noch dei evangel'sche Afkåtin Eva Högl (Johrgang 1969) œwern Wech. Ehr Lopbåhn begünn bi dei JuSos un œwern Maat*in Bundsdach ward sei denn dei Kummerkasten för Soldaten. Sei is verfriecht, kinnerlos un hett taun Bispill den Insatz an'n Hindukusch ümmer taustimmt. Sei jubelt œwer dei 100 Milljarden "Sonnervermœgen", versorcht dei düütschen Soldaten in't Baltikum mit warme Ünnerwäsch, is "Rechtsextremen" inne Bundswehr up'e Spur un hett nicks dorgegen, dat dei Wehrplicht wedder inföhrt ward...

Wenn Aktivistinnen von disse Oort dat Scheitiesen äbenso as Kinner leiwen, denn künnen s' doch in Anlähnung an dei Klimaikonen Greta Thunberg un Lisa Neubauer ok as "Flintenikonen" inne Medien hoffiert warden.

An Bomb, Rakeet, Pistool un Flint
hemm' Fru un Mann kein Freid!
Dei Freden is en zaartes Kind,
dat brukt dei Öllern beid!