vun Behrend Böckmann

So as uns Fjodor Dostojewski (1821-1881) in sien'n Roman "Dei Bräuder Karamasow" mit den mit anner Minschen mitfäuhlenden Dmitri, den œwerklauken un nådenklichen Iwan, den Klosternovizen Alexej un den Bastard Pawel bekannt måkt, so künn sik villicht ok 'n Schriewersmann finnen, dei sik dei vier Russen taun Ogenspeigel nimmt un mit 'n Bestseller "Dei Bräuder Pantisano" äbenso bekannt ward as Fjodor Dostojewski. Dat keem mi so in'n Sinn, as mi tau Uhren un ünner dei Ogen keem, dat Luigi Pantisano vonne Linkspartei — Maat in'n Bundsdach un siet por Dåch Linken-Co-Baas näben Ines Schwerdtner — allens dorför daun will, dat dei Faschisten nich anne Macht kåmen; un dat hei meint, dat dat gor keinen Ünnerschied twüschen dei faschistisch Poletik vonne CDU un dei Faschisten vonne AfD gifft. Is dat Gesinnung orrer hett hei sik blot inne Wurtwåhl vergräpen? Wat is dat för 'n Minsch un woans kümmt hei up so böse Gedanken?

Luigi is dei Lüttst von vier Bräuder, dei Kinner von Maria un Guiseppe Pantisano,
dei 1966 as Gastarbeider ut'e italjen'sche Stävelspitz Kalabrien nå Düütschland keemen un in Waiblingen (Baden-Württemberg) bi den Schaulbaukproduzenten Klett Anstellung fünnen, Bäuker fabrizieren, dei's giern sülben läsen wullen, doch dat Düütsch wier noch nich gaut nauch. As Maria Pantisano 1967 mit 19 Johr ehrn iersten Sœhn Cataldo kreech, leet sei em von Größing in Kalabrien uptrecken. Nå twölf Johr bi Größing un fief Johr in'n Internat kümmt hei wägen Drogenhannel achter Trallen, un dei Fomilie gifft em up; keinein weit, wo un ob hei noch läwt.
Leonardo, dei tweite Sœhn, läwt mål bi Größing in Kalabrien, mål bi dei Öllern in Düütschland, Anfang dei achtiger Johren keek hei noch eins tau Wihnachten in Waiblingen in. Denn is von em nix mihr tau hürn un tau seihn.

Alfonso (Johrgang 1975), dei drüdde öllere Brauder von den Linkenpoletiker un vierten Pantisano mit den Nåmen Luigi, keem ok noch in'n Internat, ward œwer ok in Düütschland grot, kümmt mit dei Schaul taurecht, verdeint as Moderator un Model sien Geld un wür so nå un nå Poletiker. Ja, dat is hüüt ein gråde Wech: halv Moderator (mit Hühn un Perdühn schnacken, bäten glattschnacken, Pointen gaud präsenteern) un halv Model (sik vonne Schockelådensiet wiesen) — fertig is dei Poletiker!

Hei höll äbenso as Wowereit un anner Sozialdemokraten nich dormit achtern Barch, sik tau sien sexuelle Orientierung tau bekennen. As dei Öllern dat mitkreegen, dat hei "schwul" is, schmieten s' em rut. Doch hei måkt sienen Wech, un nådem dei SPD 2017 dei "Eh för all" dörchkreech, wür hei SPD-Maat un kreech ok 'n Posten. Hei wür dei Offizielle Queerbeauftragte för Berlin un dormit Referent in'n Berliner Senat un wier von 2020—2024 mål dei persönliche Referent vonne SPD-Vörseddersch Saskia Esken orrer dei Senatorin för Binnenangelägenheiten Iris Spranger.

Luigi (Johrgang 1979) läwte blot korte Tiet bi Größing in Kalabrien, hei näumt sik ok "Schwabe" mit italjenisch Wöddeln, dei as "Makkaronifräter" œwer'n tweiten Billungswech upsteech, Architektur in Stuttgart un Tokio studiert, grünnt 'n Fomilie un hett twei Kinner, finnt as Architekt Anstellung, is Maat inne Architektenkåmer, un as linker politischer Aktivist in'n antifaschistischen Kring (VVN-BdA) un bi ver.di organisiert. 2017 ward hei Maat vonne Linkspartei un so denn ok wetenschaplicher Mitarbeider von den Linken-Vörsidder Bernd Karl Riexinger (Johrgang 1955), dei tausåmen mit Katja Kipping (Johrgang 1978) von 2012 bet 2021 dat Gespann von "Dei Linke" wier.

2020 kannidiert Luigi för den Burmeisterposten in Konstanz, doch dat wür wägen por Stimmen nix. Œwer hei kümmt bi dei Wählers an, denn hei verlangt, dat dei Wåhnungshüer nich ümmer wieder ansticht, dat lerrige Wåhnungen wedder Wåhnungen warden, dat sik dei Gesellschap solidarisch un klimafründlich verhöllt, dat kein Minsch wägen sien Herkunft orrer sien sexuellet Verhollen utgrenzt ward. Un mit disse In- un Ansichten is hei af 2025 Maat in'n Bundsdach un ward dor "Stelli" vonne Frakschonsvörseddersch Heidi Reichinnek (Johrgang 1988) mit dei linke Rappelschnut. Un 2026 hett hei up Wunsch von den kranken Jan van Aken (Johrgang 1961) den Maut, sik den Posten as Co-Vörsidder anne Siet von Ines Schwerdtner (Johrgang 1989) uptaunacken. Un dat klappt denn man gråd so mit 53 Purzent Taustimmung — denn hei harr kort dorvör dei AfD un dei CDU mit Faschisten un faschistisch Poletikers vergläken, un dat is em nu up'e Fäut follen. Sülfst ünner dei Linken sünd nich all mit em œwerein, denn sei hemm inseihn, dat sei den liberaleren Rand vonne Union up ehr Siet trecken möten, dei AfD in Schach tau hollen, statts sei alltauhoop mit Nazis in ein Pott tau smieten. Dat wier töffelig von Luigi.

Ok wenn dei Vörwiesmigranten — un dat sünd Alfonso un Luigi — ümmer noch dat Gefäuhl hemm', man will sei rünnermåken, so möten s' sik an Rägeln un Insichten hollen un nich ollen Groll gedankenlos utschüdden, ok wenn Luigi sik hüt noch argert, dat Minschen up em as "Makkaronifräter" so schuulten, as männig Düütscher argwöhnsch up den schult, dei 'n Privatfleiger hett. Ok wenn 'n Linker nich väl mit 'n rechten Poletiker an'n Haut hett, so süll hei as italjen'scher Migrant mit Billung in tweiter Generatschon doch weiten, wat inne Gaskåmern von Auschwitz, Buchenwald, Ravensbrück... afleep, wecker för dei Massaker von Guernica (Spanien), Lidice (Tschechien), Oradour (Frankriek), Sant'Anna di Stazzema (Italjen) un alltauhoop för rund 50 Milljonen Kriegsdode taustännig wier. Mit den Faschistenvergliek verprellt hei all dei demokratisch von't Volk wählten annern Parteien un sorcht so för 'n besünners dicke Luft twüschen CDU un Linkspartei. Nu hett hei sülben mitkrägen, dat hei wull tau wiet gåhn, dat em dat leid is un hei üm Vergäbung bidden deit. Blot nich alle willen vergäben.

Makkaroni passen doch gaud tau rode Sooß!

Dei holstein'sche Ministerpräsident Daniel Günther (CDU) verlangt, dat hei sienen Posten upgifft. Dei Linken-Frakschonsvörsiddersch Eva von Angern in't Magdeborger Landsparlement höllt dissen Schnack för unmœglich. För CDU-Generalsekretär Carsten Linnemann is dat mit "leid daun" nich afdån. Kai Wegner, CDU-Burmeister von Berlin, süht in den Schnack von Pantisano 'n Oort "Radikalisierung" un wohrschucht dei SPD un dei Gräunen, vonne Linken mihr Afstand tau nähmen. Steffen Bilger — dei CDU/CSU-Parlamentsgeschäftsföhrer in'n Bundsdach — secht, dat 'n dat, wat Pantisano so von sik gifft, nich annähmen un man sien Uträden nich glöben kann.

Anfangen künn dei Geschicht von "Dei Bräuder Pantisano" in't Johr 1955, as dei CDU-Bundsarbeitsminister Anton Storch un dei italjen'sche Minister för Butenangelägenheiten 'n Afmåkung uthannelten, dörch dat rund vier Milljonen Italjener as Gastarbeider nå Düütschland keemen un mit för't Wirtschaftswunner sorchten. 1962 wiern all so väl junge Gastarbeiders in Düütschland, dat Cornelia Froboess (Jahrgang 1943) mit ehr Lied "Twei lütte Italjener..." up Platz söss bi'n "Grand Prix Eurovision de la Chanson Européenne" keem. (So heit dei ESC fröher.) Doch feministisch Språkschandarmen mit ehrn "woken" Ogen von hüt frågen sik, worüm blot twei lütte Italjener, denn œwer vierdig Purzent vonne Gastarbeiders wier'n lütte Italienerinnen, dormang ok Maria un Guiseppe Pantisano.

Un ehr Geschicht geiht in ehr Nåkamen wieder.