|
Bannigen Klamauk hebbt wi opstunns in München;
an 'n Bahnhoff staut sik de elennigen Lüd ut Syrien, blots mit
'n Büdel Saken un 'n Lüttkind anne Hand; un op de anner
Siet fiert se dat Oktoberfest, mit de Gäst vun wiet weg, bet
ut Australien, un ut Amerika warrt de Lüd, de sik dat leisten
köönt, för veeruntwintig Stünn mit de Airbussen
her- und denn total duhn un apathisch wedder aftransporteert.
Ik mutt ju seggen: dat paßt nich recht tohoop!
Un wenn mi een fragen schull, wat ik mit em na de Theresienwiese hengahn
wull, denn segg ik …. man nee, ik heff dor düt Riemel vun
maakt:
As Hinnerk 'n beten drömelig
so an 'n Stachus steiht,
doar kümmt sien Fründ Korbinian bi:
"Kimmst mit auf 'd Wiesn heit?
De großen Fahrgeschäfte san
da letzte Schrei für mi,
da Vogl-Jakob pfeift mi o,
zwoa Maß stellt's Madl hi,
a Kraut dazua, a Haxn aa,
un nachat geht's zum Schiaßn,
i bitt di, Hinnerk, laß mi net
allein do higeh miaßn!"
Mien Hinnerk schufft sien Piep in't Muul
eerstmal op 'd anner Siet,
denn kleit he sik an 'n Achterkopp:
"Wat schall ik mit so'n Schiet?
De Wiesn heet op Plattdüütsch "Wisch",
un geiht Klock söß mien Wecker,
warrt fix wat eten, un den rop
op mienen olen Trecker!
De Wisch hett Arbeit noog för mi,
doar töövt mien Arsenal:
de Meßkoor, Ploog, de Melkmaschien
— Köh hebb ik 'n ganze Tahl;
an 'n Knick, doar steiht mien Immentuun,
den mutt ik ok versorgen,
denn geiht't an't Meihn; an wecke Daag,
da meih ik fix dree Morgen!
Fiev Stünnen later steiht de Sünn
al aasig hoch an 'n Heven —
ik denk, nu schull ik mi doch mal
so 'n ganz wat Lüttet geven:
'n Knuust vun Swattbrot, güstern backt,
'n dägten drögen Schinken,
un denn — kiek eis, wat hebbt wi doar?
Ick finn echt wat to drinken!
Ik ligg in 'n Schatten ünnern Boom,
heel liesen hör ik Larken,
un sachen fallt mi 'd Ogen to,
denn mööd bün ik vun't Warken.
Wo still dat is! Keen Achterbahn,
keen Ballern, Gröhlen, Scheten —
op miene Wisch, da kannst dat fix
un allemal vergeten!
Wees mi nich bös, Korbinian,
denn dat weet ik förwiß,
dat miene Wisch een annner Saak
as Münchens Wiesn is!“
|
