Nudisten orrer Nackedeis

vun Behrend Böckmann


Wi hemm' dat ja schafft, wecker (m/w/d) nich arbeiten kann orrer dörp un ünner Ümstänn' ok kein Arbeit någåhn will un nich tau dei Gill vonne Hoppenbräuder tellt, dei hett ümmer noch 'n Inkåmen orrer 'n Geldstütt mit 'n lütten inräkent Bidrach, dei dorför dacht is, sik sülben verwürklichen tau kœnen. So fäuhlt sik dei Minsch frie un disse Frieheit måkt dat ok mœglich, dat hei nich butenvör blifft, wenn't üm't kulturelle Läben tau sien Sülfstverwürklichung geiht. Hei kann sik 'n Kurs Pöddern orrer Siedenmalerie gönnen, sik stäken un pierssen låten orrer süss wat måken orrer sik süss wat andaun. Un wecker nich sülben up dei Sprüng tau sien Sülfstverwürklichung kåmen kann, dei kann sik Bistand bi'n Kootsch säuken.

'n Kootsch, dat wier tau Grotöllerntieden dei Vörmåker in'n Turnerkring orrer dei Lœwenbänniger in'n Zirkus. Hüüt kann man dat Kootschen äbenso as dat Püüstern lihrn. Un so as dat 'n Pierflüsterer gifft, gifft dat ok 'n Kootsch för Hunn' un Hunnholler. 'n Kootsch bööcht anner bi, woans 'n sik verhollen un anstellen möt, üm grotorrig tau sien, wenn't üm't Verköpen von Woren un sik sülben geiht, üm mit sien verminschlicht Veihtüch ümtaugåhn orrer ok dorüm, woans man up Minschen taugeiht un den Gägenœwer för sik gewinnen kann. Dei Kootsch bööcht einen ok bi, woans 'n sik antrecken mööt, üm antaukåmen, woans man sik setten sall un wat 'n mit dei Bein ünnern Disch måkt. Ja, dat sall sogor 'n Sexkootsching gäben, woans dei Kootsch Minschen bibööcht, woans man Sex måken möt orrer kann. Un FKK-Kootsch bööcht tau Bispill Mannslüd bi, dat's taun Iersten nienich as 'n Schnieder sitten sallen, dormit nich alle Welt den Blick up denn Ödeldödel richten deit, un dat taun Tweiten dei Nåkelt wägen sien Rükels ümmer 'n Dauk up den Stauhl orrer Sitz leggen süll.


Hier fangt de FKK-Strand an! Foto Sigismund von Dobschütz/Wikimedia Commons

Rat kann'n sik dortau wull ok hålen, wenn so reklåmiert ward: "Ik heit di hartlich willkåmen up mien Reklåmesied Künstlicher Schlåp un Kootsching". (Ich heiße Dich herzlich willkommen auf meiner Homepage für Hypnose und Coaching)! Üm sik för son'n niege Arbeit utbillen tau låten, möt 'n sik nich as 'n Discher orrer Megatroniker œwer 'n Lihr un Gesellentiet taun Meister hocharbeiden, ne, mierstendeils lött sik dei niemoodsche Kunst äbenso von Minsch tau Minsch œwerdrågen as öltlings dat Bepüüstern von 'n Gürdelros' orrer von Wratten.

Uns Markwirtschaft, unse Demokratie un dei välverspräkend Minschenihr måken't mœglich, dat Düütschland äbenso as Amerika 'n Land is, wo dei Mœglichkeiten åhn Grenzen sünd. Hett einer nauch up'n Hupen, denn ward hei "Privatjäh", un anner setten sik in'n Sägelboot, måken 'n Kind, sägeln mit dat lütte Wörm üm'e Welt un gahn ierst wedder an Land, wenn dat Kind inne Schaul möt. Noch anner Minschen hemm' soväl up'e Kant, dat's sik 'n Sabbatjohr leisten kœnen orrer setten Gott un dei Welt in Bewägung, dat's ehr Kinner sülben tauhus ünnerrichten dörpen orrer as utlännischer Spezialist 'n "Greencard" för Düütschland kriegen. Noch anner sünd gägen dei hogen Flœgelstrommœhlen un grünnen 'n Horizonte-Partei un noch anner kieken siek von Greta Thumberg den Schaulstriek an'n Friedach af un böömen sik as Klimaredder gägen dei Ollen up. Nich œwer dei Wulken is dei Frieheit grenzenlos, ne, dat is sei ok hier ünnen. So wunnert dat ok nich, dat dei Freikörperkultur af üm 1900 von Sport- un Kulturgruppen plächt wüür un nå dei brune Tiet besonners in'n Osten as FKK-Baden wedder grot in Mode keem — un dat för väle Minschen Martin Grambauer un Ulrike Breithaupt ut den Verteller "De Heiden von Kummerow" von Ehm Welck 'n Ogenspeigel wier.

Œwer dat wier mål, denn hüt kümmt dat ein un anner Ünnernähmen up den Infall, up den Minschenwunsch intaugåhn, nåkelt wat tau beläben. So geef dat all 2017 up'e Reeperbåhn dei Nacht-Show "Adam sucht Eva", in Erfurt süll mål 'n Fleiger mit nåkelt Gäst an Burd nå Stockholm fleigen (dor hemm' sik œwer nich nauch funnen), dor jågen nåkelt Minschen Willschwien in'n Stadtpark, in'n Harz gifft dat Wannerungen in Wannerschauh für nåkelt Lüüd, dat gifft nåkelt golfen, nåkelt Tweiråd fohrn un nåkelt up Safari gåhn. So as sik einst dei Götter ut Marbel in Athen un Rom nåkelt ünner't Volk begäben hemm', hemm' gaut ein Purzent vonne düütsche Bevölkerung den Wunsch, sik so as Adam un Eva in't Paradies tau fäuhlen un ümmer, wenn't mööglich is, dei Hüllen ut Stoff aftauschmieten. Un nåkelt wat beläben ward nå un nå taun Geschäft, un dat sall tau Tiet näben dei Frünn' an'n FKK-Strand so üm dei 10 Milljonen Minschen gäben, dei för'n nåkelt Beläwnis giern väl Geld utgäben: In Südafrika kann man so as dei iersten Minschen nåkelt an'n Wåderlock sitten un Zebras un Antilopen upluern orrer mit Hoot un Schoh un Sünnenöl, œwer süss nåkelt mit 'n nåkelten Ränscher (Ranger) den Busch dörchströpen. Up'e Fidschi-Inseln kann'n nåkelt dükern, in Kanada nåkelt 'n Sprung an'n dicket Gummiband måken (Bungee-Jumping). Up männig grot Schäp gifft dat 'n FKK-Deck un anner ankern dor, wo nåkelt baden mœglich is. Inne Karibik gifft dat FKK-Krüüzfohrten, wo't blot wägen dei Hygiene nich nåkelt tau Disch geiht. Dat gifft Sägeltörns för Nackedeis un FKK-Sportresorts as dat in'n franzöös'schen Urt La Jenny, wo dei Nåkelten ünner sik sünd, sik so nich ünner Beobachtung fäuhlen, un bi't Inköpen, Golfen, Bogenscheiten un Volleyballspälen, tau Faut un up't Rad, bi Dach un Nacht ehr nåkelt Welt utläben.

Dor sik œwer 99 Purzent vonne Bevölkerung nich so recht mit "nåkelt œwerall" anfrünnen kœnen un dat ünner Ümstänn' sogor för unanstännig hollen, wüür in Düütschland dat Nacktrådeln taun "Weltnacktrådeldach" in'n Juni verbåden un utverköffte Nåkeltreisen in'n Flieger anne Ostsee afsecht. Œwer so as sik dei "Ehe för all" bilütten dörchsett hett, warden sik dei Nudisten mit ehr Bewägung "Glieke Bost för all" dörför insetten, dat sik Frugenslüüd äbenso as dei Mannslüd mit 'n nåkelt Bost an'n Strand, in'n Laden orrer up Stråten bewägen dörpen. Solang nich Bost gliek Bost is, gellt för dei FKK-Jünger dei Deviis "No Nipple is free until all Nipples are free!" (Kein Bostwratt is frie, bet all Bostwratten frie sünd). Solang dat uns Demokratie in Frieheit hergifft, warden dei Nudisten dat nich upgäben, mål as ihrbore un sülfstverwürklicht Frakschon nåkelt in'n Bundsdach intautrecken.


29.8.2021


na baven