Dat wüür ideal!

"Das Ideal" von Kurt Tucholsky, 1927 — Plattdüütsch Öbersetten mit "dichtersche Frieheit" vun Walter Marquardt

Tja, dat harrst du woll geern:
En Villa in't Greune mit groot Terrasse,
vörn de Oostsee, achtern de Berliner Friedrichstraße,
mit scheune Utsicht, ländlich un doch mondän,
von dat Boodzimmer ut kannst de Zugspitze sehn.

Obends no'n Kino hest dat dicht bi,
allens schlicht un bescheiden — so recht wat för di.
Negen Zimmer — teihn wüürn noch beter,
in dienen Goorn steiht en Libanon-Zeder.

Modern is allens von Keller bit Dack,
de Denerschaft jümmers bannig op Zack.
Dien Fro elegant, vull Rasse un Verve
(un Een för't Wekenend — bloots as Reserve).
En Bibliothek un ründüm dien Huus
hörst du meist nix as Vagelgesuus.

In'n Stall twee Ponys, veer Rietpeerd ganz swatt,
acht Autos, ne Harley: Dat hett doch wat!
Un twischendörch, dat wüür jo gelacht,
dor geihst du mit Frünnen op Hochwildjagd.

Kiek, dat harr ik meist vergeten,
dien Köche kookt dat beste Eten.
Drinkst besten Wien ut groten Pokol,
bi all dien Sport bliffst du dünn as'n Ool.

Un Geld! An Smuck de rechte Portschoon,
un noch ne Milljon un noch ne Milljon.
Un Reisen! Dat mookt dien Leven so bunt.
Un famose Kinner, bliffst ewig gesund.

Tja, dat harrst du woll geern:
Ober, as dat so is mit uns armselig Leven,
wi mööt woll doch op'n Teppich blieven.
Bloots pö a pö gifft dat irdischet Glück,
jümmers fehlt di jichtenseen Stück.

Hest du Geld — denn fehlt en Margarethe;
Hest du en Frou, denn fehlt di de Knete.
Hest du en Geisha, denn stört di ehr Fächer,
hest du mol Döst, denn fehlt di de Becher.

Jichtenswat is jümmer, tröst du di man:
An jedeen Glück is jichtenswat an.
Wi möögt jümmers so veel: Glück, Gesundheit, veel Geld.
Dat een dat hett, kommt kuum vör in de Welt.


29.12.2019


na baven