Maat Jan as Gerichtsreporter:

De düütsche Michi

Kennt se den Michi? De Michi is en düütschen Jung ut Waldshut. Seggt wi mol, en bannig düütschen Jung. Gistern weer he noch en lütten Jung, hett mit de annern Kinners speelt. Sien Leevlingsspeel: „'keen hett Bang vör'n swatten Mann?“ Und in sien Jugendzimmer de Pin-up-Poster vun us Adolf blangen dat Tüüchs ut'n AfD-Fanshop.

Un nu steiht he dor, de Michi, as'n jungen Keerl. He hett al de Prüfungen bestohn, de en jungen Kerl bestohn möt – dat heet Hauptschulafschluss un Waffenschien. Un denn steiht up eens en echten Asylbewerber vör em – un is gor nich swatt!

Nee, Piel un Bagen hett he nich bruukt...

So'n Tunesier, nich veel dunkler as he sülbs, wenn he ut Malle trüchkümmt. Dor weer de Michi eenfach överfordert. Man he hett fix reageert, eenfach sien Waff grepen un dat Problem per Koppschuss ut de Welt schafft.

Man nich dat se denkt, dat wer jichtenswie rassistisch, nee, as ick segg, he wer eenfach överfordert. Dat hett dat Landgericht Waldshut ok jüst so erkannt. — Nu, dat he denn de Liek ok noch terhackt un de Deelen in'n Rhien smeeten hett, dat weer nich fien vun em. Man dat weer ok keen Liekenschändung, sünnern – woans har de Richter dat seggt? „De nüchterne Blick vun en utbildten Jägersmann.“ Bloß dat dat keen Wildsöög wer, sünnern en Tunesier – man de Michi weer jo dorför all överfordert mit all düsse fienen Ünnerscheed!

Also wirklich, twüschen so'n Wildswien un so'n Tunesiersch is doch nich eenfach to ünnerscheiden!

Dat Urdeel wer denn ok human. He hett den Mann jo nich in sien Egenschaft as Nazi doodschaten, sünnern bloß privat. Un dorto warrt he nor de sess Johr un'n poor Monat (wen de Bundsgerichtshof dat ok insehn deit) wedder mennigeen Gelegenheet kriegen.

Waidmanns Dings, äh Heil!

Halali!