Maat Jan fohrt...

Tesla Diesel

En grode Straat in Berlin is blockeert vun Buurn mit grode Traktoren. Een Fro in en Tesla Cybertruck mutt anhollen, stiegt gnatterig ut un bölkt en Jungbuurn an:

Se: Mookt endlich de Straat free mit jo ehre Monster!

He: Klor, dormit Se de wedder verstoppen köönt mit Se ehr Monster!

Se: Hör mol to, dat is en Tesla! Ick bruuk mien Tesla.

He: Worüm bruukt Se so en Reesengerät?

Se: Wieldat mien Mann disse Week den Macan hett. Man jüm ehr... Dings, dat hett jo bloots eenen Sitz. Draff de överhaupt up de Straat fohrn?

He: Dat is mien Arbeitsgerät. Bruukt Se ehren Wogen ok to'n Arbeiten?

Se: Se sünd good! Eerst mutt ick Elon-Mark in de School bringen, denn Kyleigh-Kim in de Kita. Inkopen, koken, Kyleigh-Kim ut de Kita afholen, Elon-Mark ut de School afholen, Middag eten, Elon-Mark na'n Tennis bringen, Kyleigh-Kim na'n Klavierünnerricht bringen, to'n Yoga föhrn, Elon-Mark vun't Tennis afholen, Kyleigh-Kim vun't Klavier afholen, Huusarbeit, Nahülp, Avendeten, maandags meditieren, middeweeks Pilates, freedags Sex, sünndags Netflix. Wenneer schall ick dor noch arbeiten?

He: Dorgegen hebbt miene Köh en geruhsam Leven.

Se: Seht Se, ick benied Se jo üm ehr ruhig Leven op't Land. Se köönt doch ehre Roh ok mol geneten! Man nee, Se mööt jümmers bloots an't Geld denken. Wenn Se noch för dat Klima demonstreern dään as de jungen Lüüd vun de "letzte Generation"…

Hach jaaaa, dat schöne Landleven!

He: Wenn dat mit de Landwirtschap so wieder geiht, denn bün ick de letzte Generation. Denn köönt de Klimaklevers kieken, wo se den Kartoffelbrie herkriegt, üm Biller dormit to besmeeren.

Se: Egentlich hebbt se jo Recht, de jungen Lüüd. Een mutt mol wat doon för dat Klima. Ick hebb al to Elon-Mark seggt: "Worüm büst du nich bi Fridays for Future?" Man he kiekt mi bloots an un seggt "Mama! Freedags heb ick Football!" Dor kannst nix moken. Dorför hebb ick mien Tesla. De is ok good för de Ümwelt. Jo ehr Gerät fohrt wohl noch mit Benzin?

He: Diesel!

Se: Kinners nee, Diesel!! Wo dat al rüken deit! Un dorför kriegt Se noch Subventionen?

He: Nich mehr!

Se: To Recht! Kööpt Se sick doch ok en Tesla. De hett meist lieksoveel PS, schoont de Ümwelt, un dorför gifft dat noch Subventionen.

He: Bald ok nich mehr. Dat Geld för E-Auto-Köper wart jüst so inspoort as för mien Diesel.

Se: Wat?! Keen Toschuss mehr? Mit dat Geld wullt ick in'n Wellness-Urlaub! Weet Se wat? Fohrt Se mol een Meter up de Siet, ick mook nu mit bi ehre Demo!