Maat Jan is för den

Freexit!

Nu is dat passeert! Dor hebt wi so goot uppasst, dat us de Greken nich ut de Eurozone rutfollen, dorför sünd nu de Engländer utbüxt. Se hebt mit 52% Mehrheet besloten, ut de EU ruttogohn. So recht het dor wohl kieneen an glöövt, man nu hebbt wi den Salat. Un wieldes se in London noch nich weet, ob se nu "Richard III." oder de "Komödie vun de Irrungen" spelen schallt, löppt bi us dat Sommertheater al up Hochtouren. Goot, de Briten hebbt entscheden, dor kunn use Groko nix an doon. Dorum striet se sick nu, ob se fors oder eerst loter nix doon. "Veel Schandal um nix", as Shakespeare seggen wör.

Man in een Punkt, dor sünd se sick eenig: Se wullen nienich mehr de EU för allns, wat slecht is, de Schuld geven. Bloots noch för CETA, TTIP, de Melkpriesen, Grekenland sien Schulden, de Terrorgefahr, de Flüchtlinge, dat schietige Wedder un Glyphosat. Dat Tüüch is al dorum gefährlich, wiel dat vun Monsanto is. Un vun dissen Konzern is förwiss noch nix Godet komen. Trotzdem wull Bayer nu Monsanto köpen. Dor kumm ick in't Schleudern: Monsanto is böse, dat is klor, over Bayer?! De hebbt jo sogor echte Fans. Tominnst ehr Fotballklub ut Leverkusen. Wat, wenn de nu bald "Monsanto 04" heet?! Wekeen mach de noch anfüern? Ob de Rasen in't Bayer-Stadion denn ok mit Glyphosat behannelt ward? Bi de Speeler op jeden Fall "stimmt de Chemie", as een so schön seggt.

Hm, Pyros, Sprengstuff oder Zigarrn? Kannst so licht nich seggen. De Wachlüüd an't Stadion denkt wohl, dat sünd allns Zigarrn, un laat ehr dörch. Woans kaamt sünd de Pyros in't Stadion? Aver Momang — herrscht in de Stadien nich Smöökverbot?! Schandaal!!

Wi kunnt froh ween, dat wi bi de EM noch wat to jubeln hebben. Wat hebbt wi för en Bang hatt vör Terroranslääg. So wiet is dorvun alltohoop noch nich veel worrn, Gottweesdank. Dorbi stunnen wi al kort dorvör. Ick weet dat ut en toverlässige Quell, de mi dat in en französische Hafenspelunke ünner't Siegel vun'n Swiegstill nor dree Buddel Snaps vertellt hett: Dat hett al een Versöök geven. En Eenzeldeder, en Jung ut en Vörort vun Paris, weer fast ensloten west: He wull de Welt dat wiesen. All de Unglövigen wull he bit op't Blood schocken mit sien Anslag. Fanatisch, rücksichtslos un brutal. Dorüm hett he sick bewapnet un is in't Stadion gohn. Man sien Platz wer mittenmang ünner de Hooligans. Dor harr he wieskregen, wo de Russen up de Briten losgohn, de Briten op de Düütschen, de Düütschen op de Kroaten, de Kroaten op de Franzosen un un un...

"Pardon, darf isch bitte in die Stadion, die Schpiel sähen?" "Na good — aver de Zigarr blifft buten!"

Dor steiht he nu mit sien sölbsbastelten Sprengstoffgördel — un opmool schient em allns so sinnlos! So fanatisch, rücksichtslos un brutal, as de Dag för Dag opeenanner insloogt, so is he ok bi al sien Brass un al sin Vertwieveln denn doch nich. Wenn he nu disse Lüüd in de Luft fleegen lett, denn deit he op End den Westen sogor noch en Gefallen dormit. Dorüm hett he sien Sprengstoffgördel afleggt un is nor Hus gohn. Den Gördel hebbt wat loter en poor "Fans" för ehr Pyro-Spitakel brukt.

So hebbt us de Hoolligans wohrlich eenmol för en Salafisten bewohrt. Nüms is so doof, dat he nich noch to wat good is! Egentlich is dat jo de Upgaav vun use Geheimdienste. Man de Chef vun'n Verfassungsschutz hett al seggt, he harr kien Tied, wiel disse lästigen Parlamentarier jümmers wat vun em weten wulln. Ton Bispeel, worüm sien Deenst bi de NSU-Morde so versagt hett. Solk Frogen kunn de Herr Maaßen gor nich af, dor vertellt he lever lustige Döntjes, t.B. dat Edward Snowden en Russe is un al so'n Spökenkiekeree. De Mann höört in keen Amt, an em is en Künstler verloren gohn! För Jerry-Cotton-Böker langt dat allemol. Denn mutt he ok nich mehr mit disse lästigen Volksvertreter schnacken. Un de möt em nich mehr so good betohlen.

Good betohlt ward ok de Chef vun'n BND. Dorüm hett Wolfgang Schäuble in en roren Anfall vun Nettigkeet en olen Fründ nu dissen Posten toschoven. Tominnst meent dat de Opposition. Ick kunn dat nich glöven. Ick meen, Postengeschacher un Vetternwirtschap in de Regeerung, dat woll. Man dat Wolfgang Schäuble Frünnen hett — nee, dat kann ick eenfach nich glöven.

Schnüff, nu sünd se doch rut ut dat Turnier!

De gröttste Överraschung disse Daag is för mi aver Island ehr Erfolg bi de EM. Dat is ok anners en heel drollige lütte Insel. Dor kümmt ut de "Panama-Papers" rut, dat ehr Regeerungschef heemlich Geld in Breefkastenfirmen versteckt hett — un he tritt tatsächlich trüch! Wegen siene Bedregereen! Dor kunnen de Regeerungschefs ut de Ukraine, Argentinien un England, de ok al in de "Panama-Papers" stohn, bloots över lachen. Man David Cameron is dat Lachen fix wedder vergohn. He is nu ok ut sien Amt flogen. Man nich wegen Bedregeree, sünnern wegen Dösigkeit. Womit he wedder wat mit siene Fotballers gemeen hett.

Hööpt wi mol, dat de annern korrupten Regeerungschefs em bald folgt. Bit dorhen tööv ick op dat Referendum över den Freexit: Freesland sien Uttritt ut Düütschland!

"It's going home,
it's going home,
England's going home",
summt disse Dag lies vör sick hen

Joon Maat Jan