Maat Jan ut BremenMaat Jan suhlt sik in...

Dekadenz, Verkehr un Treber


Unner "Treber" verstaht wi normalerwies de utlaugte Rest vun Malz, de bi'n Beerbruen över blift, oder ok de Reste vun utquetschte Wiendruven. Mennichmol sün dormit ober ok Minschen meent, de kiene Wohnung hebben un "up Trebe" sün. De eenen Treber brukt de Buur as Fudder för sin Rindveecher. Dat een ok ut de annern Treber bannig wat rutholen kunn, het nu een Herr Ehlert, Geschäftsföhrer vun de Berliner Treberhilfe, wiest. Dat har dormit anfungen, dat sin Deenstwogen in en Radarfalle komen is. Normolerwies nich wieder dramatisch. Bloß dat disse Dienstwogen en schmucken Maserati mit 440 PS wesen is, de nied so 100.000 € kost. Wekeen mit dissen Sportwogen to schnell föhrt is, weer nich mehr fasttostellen. Dorum hebt se den Herrn Ehlert dorto verdonnert, in Tokunft en Fahrtenbook to föhrn. Dat hett he ober nich insehn un hett dorgegen klogt — un dordör is de heele Sok erst an de Öffentlichkeet komen.

As dat nu jümmers mehr Proteste un negative Presse geven harr, hett Ehlert meent, dat wär jo bloß för deenstliche Zwecke, privat deit he dat Auto nich bruken. Ober dat mutt he ok nich: Privat föhrt de gode Mann Jaguar un wohnt in eene Villa an en See in en piekfienen Ort bi Potsdam. Teemlich wiet weg vun de Lebenswelt vun de Minschen, de he beruflich helpen schall.

Dat he för sin Beruf so en Auto brukt, het kieneen so recht verstohn. Dorum is Ehlert op een bannig gode Idee komen: Mit sin Deenstwogen wull he "Rundfohrten to soziale Brennpunkte" organiseern. Dat stell ick mi moi vör: Mit een Maserati in't Ghetto! Natürlich bloß in Schrittempo un in en stilechten Hip-Hop-Outfit, mit swore Goldkette, Brusttoupet un fette Zigarre, dorto Bushido vull updreiht (Oropax nich vergeten!). Un öfter mal mit Standgas spelen, Wrumm-wrumm!

De Sok wer ok för de Sozialsenatorin heel schaneerlich. Dorbi har ehre Partei in Wahlkampf noch "Riekdom för all" versproken — un Ehlert hett dormit bi sick sülben anfungen. So harr he ok mit minschliche "Treber" de staatliche "Cashcow" mulken. De Rindveecher, dat sün as jümmers wi, de Stürbetohlers.

Un dat allens is bloß dör een Radarfalle rutkomen. As öberhaupt disse Verkehrskontrollen mennicheen Mol Soken an't Licht bringt. Dat hett ok de Ex-Bischöfin Käßmann markt, as se nor een beeten veel toveel Alkohol bi Rood öber een Ampel fohrt is. Tominnst hett se glieks de Konsequenzen trocken un is tröchtreden. Dorbi gift dat wiss vele annere Amts- un Würdendrägers, de wi dat eher wünscht harrn. Man de leist sick meist en Chauffeur, so dat se tominnst bi'n Fohrn nich veel verkehrt moken köönt. Un dissen Chauffeur betohlt natürlich ok wedder wi — so sorgt wi noch dorför, dat wi de, de vun usen Geld good leevt, nich so gau wedder los warrn, wi grode Rindveecher.

Eegentlich wer de "Fall Käßmann" jo Woter op de Möhlen vun de Katholschen. Immerhin is sowat den Papst noch nich passeert. Wohrschienlich fohrt he ok nich sülben (in sin Öller vernünftig), un dat een mit'n Papamobil to gau fohren kunn, is heel unwohrschienlich.

De katholsche Kark het ober jo ehre egenen Schandale. Mit en poor lang verjährte Fälle is dat anfungen, un nu kummt Dag för Dag neede Meldungen öber sexuellen Missbruk un Gewalt gegen Kinner rut. Schuld sün natürlich, as jümmers, de 68er. Is jo klor, de katholschen Internate, Scholen un Seminare sünd jo ok vull mit Althippies, kiffende Kommunen un Apo-Opas. Un denn de sexuelle Revolution un al de nackte Hut, de een överal sicht! Vun Arschgeweih-Dragen to Kinnervergewaltigen is för mennicheen anschienend bloß noch een lierlütten Schritt. Dorbi sünd al de schrecklichen Soken, de nu rutkummt, jüst bi de passeert, bi de dat Motto statt sexuelle Revolution eher "verkehrsberuhigte Zone" heeten möt.

Wunnert mi bloß, dat noch kieneen op de Idee komen is, dat kummt al dorvun, wenn de Sitten so verlottert sünd, dat een Schwulen Minister warn kunn. Ministrant jo, ober Minister...


Dat stüertahlen Rindveech kümmt rut ut de spätrömische Dekadenz. Na tööv man, Guido!

Dorbi is Guido sogor de letzte, de noch tapfer vör "spätrömische Dekadenz" warnt. He meent ober nich de römischen Kaiser, vun de mennicheen sick ok gern mit Knaben vergnögt hett, — nee, dat sünd jo de "Leistungsdräger" ween! He meent de Hartz-IV-Empfängers, för de dat kien "anstrengungslosen Wohlstand" geven draf. Guido ton Bispeel strengt sick bannig an, flüggt dör de Welt un nimmt jümmers en poor Frünnen, Verwandte un Parteispenders mit. So wiest he sin Sinn för Familie un Kamerodschap, wat bi de Regeern, de he besökt, ok jümmers god ankummt. Sünnerlich bi de korrupteren Regeern.

Dat mit de römische Dekadenz, dor hett Guido ober in Geschichte nich good uppasst. De olen Römer hebbt kien Obeitslosigkeet kennt. Se harrn dree heel wirksome Orbeits-Beschappungs-Maßnahmen: De Legion, de Skloveree un den Circus Maximus.

Blangenbi fordert Guido sin Partei ok een Berufsarmee: dor harrn wi al mol de Legion. Un op de annern twe Soken kummt se fröher oder später ok noch, tööf man af.

Meent

Maat Jan


De spätrömische Siegsgöttin mit den Schädel vun'n besiegten Stüertahler. Na tööv man...!



na baven