 |
|
Vörstellungsrunde Dor is he nu, de "Winter unseres Missvergnügens" oder, as us Kanzlerin dat bald nor poetischer utdrückt hett: Dat Johr vun de schlechten Norrichten. Un weil de Lüüd — tomol de Düütschen — schlechte Norrichten leevt, hebbt wi ehr flux wedderwählt un köönt us nu över veer wietere Johr mit schlechte Norrichten frein. Over ersmol möt wi us de neede Regeerung ankieken un versöken, achter den deeperen Sinn vun dit Kabinett to komen.
Dat eerste, wat upfallt: Is dat nu de neede Regeerung oder bloß de Rechtsavdeelung vun de neede Regeerung? Een Halv vun de Ministers sünd Juristen. Jüst as ob de Kanzlerin all en Barg vun Klogen und Prozessen up sick un ehr Regeerung tokomen süht. Bi so grode Wohlverspreken jo kin Wunner nich.
Wo wi bi Juristen sünd: Schäuble is ok wedder dorbi. Ditmol as Finanzminister. Un schon meent poor Lüüd, he har gor keen Erfahrung in sin needet Gebiet. Dat stimmt jo nu nich. He is to'n Bispeel as Finanzminister toständig för Stüürbedrug... — Nee! Hollstopp! Ick meen natüürlich för dat Verhinnern vun Stüürbedrug! De Deel is veellicht 'n beeten need för em. Over dat kunn jo vellicht nich schoden, wenn een ok de anner Siet kennt. Un vun wegen Rente mit 67! Dor meent de Lüüd jo, dat wär veel to loot. Kiek di Schäuble an, de is 67 un fangt jüst en needen Job an. Un jammert he vellicht? Sühst woll, wenn he dat henkriggt, denn kunn doch ok jede annere sworbehinnerte Rentner nor vulltied orbeiten, oder? Sine Hoheet Karl Theodor unickweetnichwienor to Guttenberg is nu Verteidigungsminister. Dorbi har he de Krise bi Opel al "chaotisch" funnen. Wenn Opel för em all "chaotisch" is, wat warrt he denn erst to de Bundswehr seggen? En Ünnernehmen, dat Johr för Johr Millionen utgifft för Maschinen, blots üm de Maschinen möglichst nienich to bruken! En Alpdroom för en smarten Sanierer as em! Dor gifft wohrschienlich blots nor geordneten Rücktog in en "geordnete Insolvenz", wat jo jümmers sin leevst Woort is. Un wie hebbt ok en Ministerium för Entwicklung. Dat is al en Överraschung, in'n Wohlkampf harr de FDP versproken, se wullen dat Ministerium strieken. Nu is de Wohl vörbi, un dat Ministerium steiht nor — sogor mit en FDP-Mann as Minister. Over ok dat harr sin deeperen Sinn: Een Ministerium, dat Dirk Nebel leit, un een, dat gor nich mehr orbeit — dat kummt op End op eens rut. Need is ok de Minister för Gesundheet: Rösler heet de,
is ers 36 un hett sogor Medizin studeert. Wenn in Tokunft de Ärzte
sick bi em beswoort, dat ehre Orbeitsbedingungen so schlecht sünd,
kunn he bloß seggen: "Klor sünd de schlecht, wat meent
se, worüm ich hier bin?!" De Verkehrsminister kummt nu nich mehr ut'n Oosten, sondern ut Bayern. Siet wannehr harr Bayern dat nödig? Wullt de etwa nor een "Soli Süd" inführen? Un wenn all CSU, worum denn nicht glieks Seehofer? "Verkehr" hett de jo in Berlin all bannig hatt.
Ehrn Büroleiter hett Merkel ok to'n Minister mokt: Thomas de Maiziere oder "Tommy de Misere", as Angie em leeftallig nöömt, wenn se alleen sünd. He warrt Minister för ehr Binneres. Un nu dat Best to'n Sluss: use neede Ümweltminister, Nobby Röttgen. Bloß twee Johr her, dor wull he de Geschäfte vun düütschen Industrievereen BDI föhrn — un natüürlich wieder Volksvertreder blieven. Staats na sin Frünn vun'n BDI geiht he nu int Ümweltministerium. BDI un Ümwelt — dat is jo, as ob Wolfgang Schäuble vun Swartgeldkofferträger to'n Finanzminister mokt warrt. — Wat, de is Finanzminister? Good, also BDI un Umwelt, dat is... as ob Verona Pooth Bildungsministersche warrt — un Franjo Pooth Finanzminister dorto. Ok en Experte för Insolvenz, wenn ok nich jüst "geordnet". Ick för mien Deel harr all noog un gah in'n geordneten Rücktoog trüch an Bord. Ahoi un nix as weg hier! Maat Jan |
Maat
Jan is hüüt de Wahl-o-Maat:
