 |
|
FreeSpröök Nu hebbt wi dat ole Johr 2006 Gott wees Dank ok noch schafft. Un op End is doch allns nich so schlimm ween, as dat utseen hett. De meesten sünd jo noch mol dorvun komen. Sogor de Herren Pfahls, Ackermann, Zwickel & Co. weern freesproken oder kunnen sick tomindest freeköpen. Dor möt Justitia wohl ünner eere Oogenbinde noch beed Oogen todrückt hebben. Op de anner Siet, Helmut Kohl löppt jo ok noch free rum — un vertellt jedeen, dat in sine Regeerung kieneen jemols bestechlich ween is. Trorig, wa een sine olen Frünn so gau vergeten kunn!
Worum nu jüs Hoyzer för sine relativ lütschen Bedrögereen in Knast möt, is ok nich to verkloren. Veellicht weer sin Richter jo Football-Fan — vun den falschen Vereen. Oder veellicht har he eenfach nich genoog tosamengaunert, dat he sick á la Ackermann freeköpen kunn. Denn Freeheet mach bi us jo to köpen ween — billig is se nich! Un
wenn Hoyzer Glück hett, kummt he veellicht in den sülben Zellenblock
as Peter Hartz — dor kummt wiss ok in't Kaschott keen Troorigkeet up. Een
Top-Manager (Hartz), een Gewerkschafter (Volkerts) un neerdings ok noch een Landdagsafgeordneten
as nee Nobern — wenn dat keen Karriere-Schub is! Annere Herren sünd sogor freewillig vör Gericht gohn, wieldat se dat so furchtbor schlecht geit. Dat de Herr Welteke wegen en poor Nächte in en Luxus-Hotel — de he natürlich nich betohlt hett — har torüchtreten möten, süht he bit hüüt nich in. Un Hans Eichel harr ok eerst vör Gericht gohn möten, üm sine povere Bundsminister-Pension so'n beeten uptobetern. Klor hebbt de Herrn beed "Recht" kregen. To de glieke Tied harr en Gericht faststellt, dat 345 € in Monat nich minschenunwördig sünd. Minschen un Minister sünd eben nich datsülvige. Un ok wenn hüüttodags allns tomotbor is — ober en Bankpräsident un en Finanzminister, de mit ehrn Geld hushollen möten, dat is de nu wirklich nich tomotbor!
Dorbi har de CSU al mennich annern Arger. Dor is disse Landrätin ut Fürth, de Ede Stoiber kritiseert harr: En geschiedene Fro, alleen mit Kinner, de an ehrn Chef rümquarkt — un kummt ok noch ut Franken! Wenn de Fro Pauli noch en Schleier trogen wöör, weer dat CSU-Feindbild komplett. Un de is ok noch Liddmaat in ehre Partei — as ick segg, "noch"! Meent de doch, Stoiber har een Problem mit Froons. Hett he natürlich nich. Bloß mit solk Froons, de sick nich freewillig "Muschi" nöömen loot.
Dat Saddam Hussein nu uphangt worn is, is nor dissen Gammelfleesch-Skandal ok keen godet Teken: Wat too lang an Hoken hangt, dat kummt eenen Dags mol wedder. Un denn much ick leever wiet weg up hoge See ween, höpt Maat
Jan |
Maat
Jan sin Johrsrückblick:
Blots
för een poor is dat Rendezvous mit Justitia nich so god utgohn. Dat Robert
Hoyzer nu in Knast möt, is heel tragisch för us all. So een intelligenten
jungen Kerl mit so eene innovative Geschäftsidee, wat ut den allns har warrn
kunnt! Op een Theaterkongress in't verleden Johr harn se al fordert: "Hoyzer
for Intendant". Un in Politik un Wirtschap is för so en plietschen Kerl
de Karriere ok al so god as seker. Op de anner Siet, noch is dat jo nich to loot
för em; wenn he rutkümmt, is he jo noch nich old, un veellicht sünd
so'n 
poor
Johr Knast op'n Buckel ok een godet Teken för sine tokünftigen Geschäftspartner:
Op den Jung is Verlaat.
Annerswo
ziert sick de Politiker noch, eern Platz in't Kaschott antonehmen. Dor is to'n
Bispeel de Börgermeester vun Weiden in Bayern, de nu al twee Mol wegen Schmiergeldsoken
verurdeelt worn is. Dat schert em ober wenig, he stried wacker wieder üm
sin Amt. Dat de Kerl denn ok noch "Schröpf" heet, is al bald too
albern.
Un
denn ist dor de Verbrukerschutz-Minister Schnappauf, de in'n Gammelfleesch-Skandal
anschienend sin Job so'n beten verkehrt verstohn har — he meen, he weer Minister
för Verbrekerschutz. Un so een Ministerium is in Bayern ok heel nödig
— alleen mit de Strauß-Kinner har so eene Behörde al genoog to
don! 