Lögenkroom

vun Heinz Tiekötter


Vör de Garoosch dreep ik Naber Peter. He weer sockfoot ünnerwegens. "Na, hebbt se di de Stebel klaut?" frog ik em. Man dat harr'n annern Grund: Peter hett sik 'n neet Auto köfft un he sull man blots 4,3 Liter dormit verbruken. He kümmt ober nienich ünner 7,5 Liter. Anfangs hett de Händler seggt, de Wogen mutt noch infohrt warrn. Nu, no fiefdusend Kilometers, verbruukt dat Auto jümmers noch dat sülbige un de Verköper meent nu, Peter harr woll nich dat rechte Gefeuhl för dat Gasgeben; he sall man mol sockfoot fohrn. Denn leernt he dat. Wat'n Lögenkroom!

Letzt Woch leeg 'n Mitdelung in mien Breefkassen: Ik harr een Reis in de Türkei wunnen. Un denn legen dor Biller vun en Fief-Sterne-Hotel mit 'n groten Pool dorbi. För de Buchungskosten sall ik jem blots 150 € in Vörrut öberwiesen. Dat harr ik ober licht wedder rin; Goldsmuck und Ledderkledung kost dor blots een Drittel as bi uns. — De lüggt!

Siet ik mol vertellt heff — ik weet gornich, bi welke Gelegenheit —, dat ik Johrgang 1940 bün, krieg ik anduuernd ut Holland vun en Dokter, de gorkeen richtige Dokter is, sünnern 'n Advokat, also de schickt mi Breven, dat he för hunnertdottig Euro mien Sexualleben wedder in Swung bringt. Ik heff em schreben, he sall man sien Dochter vörbi schicken. Wenn de denn untofreden is, denn will ik de hunnertdottig Euro geern investieren. Gerd meent, wees man froh, dat du noch keen tachentig büst. Denn gifft dat eenmol in Maand Angebote öber Inkontinenzbüxen. Un sowat is doch veel schenierlicher.

Uns nee Telefonanloog reckt buten bit to 300 Meter un binnen, in uns Huus, bit to fofftig Meter wiet. So steiht dat in'n Prospekt. In uns gode Stuuv krieg ik de Basisstatschoon all nich mehr foot. Un de steiht blangen bi op de Deel. De Händler meent, fofftig Meter heet jo, dat reckt nich wieder as fofftig Meter. Dorünner schon.

Een Krankenkass verspreekt de Lüüd 120 Euro, wenn se dorhen wesselt. Dat dat achterno as Inkomen bi'n Finanzamt verstüert warrn mutt, dat seggt se nich.

Dat nee Handy, dat 'n Katalog 650 € kost un allens kann, sall ik blots för een Euro hebben. Ganz ünnen in dat Schrieben geev dat so unregelmäßige Streken. Dörch miene Lupe mit teihnfache Vergrötterung kunn ik lesen, dat de Minut telefonieren tweeundottig Cent kost un ik mi to en Mindestümsatz vun 40 € in Moond för twee Johr verdraglich verplichten do.

Annerlest stunn 'n Kerl bi mi vör de Huusdöör un vertell, dat he Dischler is un in uns Stroot 'n Stück wieder arbeit. Se harrn keen Anslussopdräeg un nu wull he mol frogen, wat wi nich nee Finster bruukt. De kunn'n wi billiger hebben, denn se weern jo all hier. He meen, de, de wi nu hebbt, de harrn jo blots Doppelverglosung un dat is wiss nich "Stand der Technik". Siene funkelnogelnee Arbeitskledoosch, siene Lackscheuh un de botterweeken Hannen wiesen em as Werber ut, de sik blots verkleedt harr.

De Stoot hett de Versekerungen bi dat Afsluten vun de Riester-Rente ünnerstützt. Wenn sik diene Lebensümstänn verännert un du nich mehr betohlen kannst, denn bist du blank un hest scheunet Geld in Sand sett. De ersten dree Johresbidräeg sünd all futsch för de Afslusskosten un de Provischoon. Dat seggt se di ober eerst, wenn du in de Brenne büst.

Wenn du wat in en Versekerung för dien Oller spoorst un kriggst dat Geld, wenn dat sowiet is, denn verlangt diene Krankenkass teihn Johr lang en erhöhten Bidrag. Diene Kapitolversekerung hett jem un dien Finanzamt (also dat Amt för moderne Christenverfolgung) al lang vun dien neen Riekdom vertellt. Dorto sünd se gesetzlich verplicht. Hebbt se di dat vörher seggt?

Mit de Parteien jemmer Wohlverspreken geihst du in en sonnige Tokunft. Du müsst jem blots diene Stimm geben. No de Wohl leggt se di de Korten. Ik segg di, woans dat liggen deit: De Werbefuzzis un jemmer Opdragsgever un all de annern, de wat vun di wüllt un versöcht, di öbern Disch totrecken, de snackt keen Platt mit di. Een Plattdütschen kunn jo gornich so dull swinneln!


Biller: PaliGraficas, geralt, 3dman_eu

11.2.2018


na baven