Düt is en Superspreader —
symboolsch natüürlich

Lockdaun, Wellenbräker, Notbremse

vun Behrend Böckmann


As Bülgen gliek schwappt up un dål Corona œwer't Land. As disse Sük ut China tau uns keem, güng dat bannig barchan un denn wedder barchaf, un kein Dokter un kein Poletiker künn seggen, wat 'n dorgägen måken kann orrer måken süll. Œwer disse Sük möt ganz schlimm sien, denn dat wiern up einmål Wür in'n Ümlop, dei so noch nie nich språken un schräben wiern: Inzidenz, Hotspot, Spräder (Spreader), Lockaun (Lockdown), Schattdaun (Shutdown), Coronahaip (Coronahype)...


Dei eerste Well

Inzidenz gifft an, wurväl Minschen ünner 10.000 dei Sük hemm'; Hotspott is dei Urt, wo väle Minschen tauhop sünd un sik gägensiedig anstäken; 'n Spräder is 'n Minsch, dei anner Minschen anstäken deit; Lockdaun heit, dat jederein tau Hus blifft un blot mit 'n Hund up'e Stråt dörp; dei Schattdaun is noch leger, denn dei miehrsten Inrichtungen as Schaulen, Verwaltungen, Theoter, Kinos un Schlåp- un Lophüs un sogor Ünnernähmen måken dicht, Taukieker inne Stadien gifft dat nich mihr, Besäuk in't Ollenheim orrer Krankenhus ward ünnersecht; Coronahaip näumt man dat Gesabbel von Minschen, dei all dei Informatschonen œwer dei Sük för unnödig hollen, frömde Mächte dorachter seihn un sülben väl Upseihn måken un sogor den Dod in Kop nähmen.

Ünner dei Bedingungen von'n Lockdaun keem "Heimarbeit" (Home Office) un Husünnerricht (Homeschooling) mit Hülp vonne digitale Technik in Mod. Ut'e Mod keem Inköpen (Shoppen) inne Binnenstadt, un wenn, denn blot as Inköpen mit afschnackten Termin (Click & Meet) orrer Woren bestellen un afhålen (Click & Collect) — un so güng dei Inkopsstimmung in'n Låden (Innenstadtfeeling) fläuten, dei Minschen ordern ümmer mihr "digital", dat "Onleinschopping" bläuht up — un männigein markt, dat hei sik näbenbi dörch disse Oort Inköpen 'n "After-Corona-Body" taulecht un Not hett, dei Punde wedder lostauwarden.


Düt is dei Delta-Well (Harvst 2021)

Un wedder gifft dat 'n niege Well un wedder gifft dat niege Wür. Wat hett dat mit dei Mutatschonen up sik, wat sünd Vakzine un wat hett dat mit dei Haudenimmunität tau daun? Un denn gifft dat Wür, dei nå Militär klingen: Hygieneridder, Anticoronaschutzwall, Quarantäneborg, Virenfront, Virenbombe usw.


Düt is natüürlich en Wellenbräker

Un ut 'n Lockdaun ward inne vierte Well, dor sik all väle Minschen sprütten leeten, 'n Deillockdaun, un man schnackt nu in 'n Oort "Lichte Språk" von 'n Notbrems', dei dei miehrsten Minschen von'n Toch un dei Stråtenbåhn her kennen, orrer von 'n Wellenbräker, dei hier un dor an'n Strand tau finnen sünd un dortau deinen sallen, dei Kraft un Wucht von't Wåder aftaufeddern, äben tau bräken. So sachtens besinnen sik Poletikers dorup, dat 'n mit ein in'n Utdruck vörnähme un mit dinglisch Wür vermengelierte Språk nich bi jeden Minschen ankümmt, all gor nich bi Minschen, dei dei Ümgang mit uns düütsche Språk schwor föllt. Dat is so, as wenn 'n einfacher Minsch mit Weihdåch inne Leistengägend taun Dokter kümmt un dei denn faststellt: "Mi dücht, dor is 'n Testikel ut't Scrotum wutscht un billt nu 'n Hernie, dei wi tauierst mål mit 'n Suspensorium bikåmen möten." Dor denkt dei Kranke ok: "Dei kann mi den Puckel rünnerrutschen un an'n Moors kleien!"


1.12.2021


na baven