Dat letzte Broot

vun Rudi Witzke

Floogblatt vun 1946. Klick op to'n Vergröttern!

Dat Originaal vun dat Floogblatt baven heff ik upbewohrt. Dat wöör in'n Harvst 1946 in Ahrensböök verdeilt.

Up vele Steden vun uns Ierd is disse Henwies up en letzte Broot ok hüüt vull güllig.
De Wannerung hen to de Länner mit vulle Fleischpött hett jüst ierst anfungen. Noch kaamt de armen Plachunner un mang jüm aventüürsche Dwass-Köpp as Beddler an uns Döör.
Wat, wenn ierst Gewalt in't Spill kümmt?

Wi fieert na Olvadders Sitt un Bruuk dat Oornfest 2017. Wi fiert un nüms geiht hen?
Uns Mitbörger sünd ünnerwegens, ehr Wuut ruttolaten gegen dat Överfrömden dörch de Migranten. Wi hebbt doch een Demokratie! Gegen diss Fruu Merkel,
de uns Noot bloots noch grötter maakt, mütt upstahn warden!

Wootbörgers. Teknen Rudi Witzke

Uns Noot? Grötter maakt? De wies mi maal.
Bi de gah ik een Maand in faste Köst. Un wenn ik denn totaal afmaddelt bün, denn laat uns man neegst unsen Hungerdaag begahn.

Nee, nüchtern sünd wi nich, nich in'n Maag un nich in'n Kopp. Avers in'n Kopp, dor mööt wi't warden. Völlerie kann di jüst so beküseln as Hunger. Wi mööt gegen beid angahn. Ok gegen den Hunger. Gegen de Povertee. Nich gegen de povern Lüüd.

Oorndank hin, Oorndank her! Mit de Klamott, dor liggst verdweer.

Stockelsdörp in't Wootbörgerjohr 2017
71 Johr na dat Ahrensböker Brootjohr