Wat doon bi Coroon'?

vun Wolfhard Sauerbrey


Wat's dat förn viegelinsche Tied —
Nu is dat ok bi uns so wied!
Wi weern mobil, wi weern gesund,
un jedeen Dag weer rund un bunt,
keen Woort vun Pest un Cholera,
Corona, Gripp un Ebola,
un jeedeen dach: laat mi mien Roh —
dat löppt so wieder jümmerto!

Man nu hett uns ieskoolt un nackt
so över Nacht Corona packt!
Nu hebbt se niege Regeln schrieven:
Wi mööt in uns veer Wannen blieven,
dröfft poor sotschaal Kontakten, avers:
Nix Enkelkinner! un nix Navers!
Wat maakt denn blots so'n Opa, Oma?
De sackt in so'n lethargisch Koma,
un dat geiht fix! Dor mööt se rut!
Doot jichens wat! Söcht ju wat ut:

Balkon un Bloomen, dääglich Pleeg —
dat weer to'n Bispill mal so'n Weg!

Mal wedder'n Füller in de Hand,
an Breeven gifft dat allerhand!

Mal wedder ole Schellacks höörn —
weer intressant ok för de Göörn!


De Keller mit de Hobbythek —
dat weer to'n Bispill ok'n Weg!

Maakt't Finster op un sett dik daal:
Welk Vagel singt dor glieks noch maal?

Hest du nich maal de Noten kennt?
Neem is dat ole Instrument?

Man doch dat Schönst' is jümmers wesen:
Rin in den Stool! un lesen! lesen!


8.4.2020


na baven