Kuddel, Schauermann ut Hamborg, wasst hüüt al griese Hoor:

Fief vör twölf


Kuddel
De Kanzler steiht ünner Druck! Dat Regieren mit de „sachte Hand“ is vörbi.

5,2 Millionen Arbeitslose, dat is de afslute Deeppunkt! Dorto kummt Fischer sien Visa-Affäär. Bloots noch 36 Perzent hebbt Vertroon in de Regierung. Nu warrt dat prekär.

De Wohrheit över Sleswig-HolsteenHeide nimmt den Hoot

De verlorn Landtagswahl in Sleswig-Holsteen weer ja ok nich inplaant. Dorbi harr de Wahl nich in'e Büx gahn möten. Aver wegen de grooten Probleme harr Heide Simonis de Moot verlaten. Bi de Proov in'e Frakschion hebbt se ehr noch vermünnert un wedderwillig hett se sik denn sülvst de Stimm geven. Bi de veerte Afstimmung harr se denn wedder den Dreih nich kregen. Peter Harry Carstensen – oder heet he Harry Peter? – wull se ok nich op'n Throon heven. So hett se denn gor nich stimmt. En Leven mit de „Dolchstoß-Legende“, vun Fründ un Fiend beduert, is beter as no de halve Legislaturperiode aftotreden, ahn wat henkregen to hebben! — Nu mutt Heide ehrn Hoot nehmen, aver se hett ja noog dorvun (ok wenn ik min Mütz schöner finn).

De Wohrheit över ChinaSo'n Schiet! In Minschenrechtsfragen muert de Chinesen. In't Muern sünd se groot...

Dat helpt Kanzler Schröder aver nich un nu will he dickdräävsch sien Kopp dörchsetten un dat EU-Waffenembargo gegen China opwohren. Bi'n Besöök mit de Wirtschafts-Delegation hett dat Milliardenopdrääg geven. Aver bloots wiel he gaaanz allgemeen över Minschenrechten un Verbott vun de Doodsstraaf spraken hett, un wo nett dat doch weer, wenn dat so'n beten Pressefrieheit geev, aver nix för ungood, nee, bloß nix för ungood! Dat hett de Chinesen koolt laten. Schröder kunn ja jüst so Amerika meent hebben! Opdrääg in Folg gifft dat aver bloots, wenn Schröder sik gegen dat Waffenembargo stark maakt. Dorbi geiht dat China üm't Prestige. De Atoommacht hett dat nich nödig, Taiwan mit Wappen ut de EU to verschrecken. Un de Tosaag vun Arbeitsplätzen dörch de Wirtschaftsdelegation gellt bloots, wenn de Firmen Ansluss-Opdrääg kriggt. – Nu is de Kanzler in'e Zwickmöhl!

Nu warrt bet Mai bibbert. Aver Nordrhein-Westfalen is noch nich verloren. Staats gegen Waffenembargo to strieden, schall he mit'n Brüsseler Waterkopp fechten. De unmööglichen EU-Richtlinien sünd meist all Job-Killer. Worüm schullen düütsche Fliesenlegger, Huus-Reinmakers un Fleeschhauer opneegst ok de Gänge vun de "Arbeitsagentur" plattpedden?! Dat mutt doch nich sien – warrt uns Regerung dat rechttiedig klookkriegen?


Martin Ripp


na baven