Kuddel, Schauermann ut Hamborg, ünnersöcht hüüt

De Muer in'n Dööts


Kuddel
Hüüt morgen heff ik Bertha fraagt, of se weet, wat för een Dag is.

„Sünndag!“ hett Bertha antert.

„Sünndag ok, aver ‚Tag der Deutschen Einheit’ wullt ik hören! Vör föffteihn Jahren is de Muer fullen.“

Bertha nickköppt. „So lang al?“De Verloop vun'e Muer warrt in Berlin dör Plastersteen andüüd

„Liekers twintig Perzent vun de Westdüütschen wüllen de Muer torüch. Ik fraag mi bloots wat för'n IQ de hebben?! Un bi achtig Perzent mit een över hunnert sitt de Muer in'n Dööts!“

„Bi mi aver nich!“ Bertha weer as anfaat. “Vun 1991 bet 2003 sünd twee Millionen Minschen in den Westen kamen. De nehmen uns de Arbeitsplätze weg!“

„Uns? Ik denk, wi sünd eens! Wi sünd wi!“

Aver Bertha weer nich to bremsen. “Un denn de Milliarden, de in' Oosten gahn sünd! Wo sülvst Karstadt keen Geld mehr hett! De Kanzler hett seggt: ‚Das war Missmanagement. Unfähigkeit bis zum Gehtnichmehr!’“De Verloop vun'e Muer warrt in Berlin dör Plastersteen andüüd

„De Kanzler seggt veel, wat de Lüüd hören wüllen. Vör en poor Jahren hett he seggt: ‚De Lehrer sünd allens fule Säcke!’ – Villicht hett he ja recht. Denk an de Pisa-Studie!“

„Ja, dor hebben se doch jahrelang restauriert. Aver soveel ik weet, is de Toorn ümmer noch scheef!”

“Ja, un du hest liekers Restauration ümmer noch dien Brett vör'n Kopp! Dor will ik aver nich wieder op ingahn. Disse Spröken bringen dem Kanzler foorts fief Perzentpunkten mehr Tostimmung! Aver dat mit Karstadt hest du ok dörchenanner kregen. De teihn Millionen för Missmanagement as Afscheedsgaav an Herrn Urban könen se nich boken as ‚Aufbauhilfe-Ost’!“

Bertha weer füünsch. „Liekers Rudolph Karstadt harr nich tolaten, dat de Halve vun siene Ladens slaten warrt. Un Eppendorf wüllt se ganz dicht maken. Wo schall ik denn Inkäupen?“

„Du hest villicht Sorgen! Denk an de armen Lüüd, de ehr Arbeitsplatz verleren! – Aver dat gifft seker een Köper. To'n Bispeel de grooten Discounter. De maken 'ne niege Firma op un verköpen dor ehr Krimskraams. Un de Laden heet denn ‚ALIKA’. Ut Aldi, Lidl und Karstadt.“

„Ne!“ Bertha weer nich to övertügen. „Du hest mi op de Fööt pedd! Dorför musst du eene Straaf kriegen. Dien Eten musst du morgen sülven kaken. Ik gah to de Maandags-Demo!“


Martin Ripp


na baven