Gedopte Fisch

vun Wolfhard Sauerbrey


An'n lütten See, dor stünn mal'n Kroog,
so'n smucken, olen Strohdack-Kroog.
Dor weerst du in de Week alleen,
meist weern di dor keen Gäst to sehn.

De Kröger, liekers, in de Sünn,
tofreden an de Toonbank stünn:
he drööm sik na den Sünndag hen,
wieldat an jeedeen Weekenenn
sien Gaststuuv weer so bannig vull,
dat di dat meist al bassen wull:
Denn düt Rebeet, in't heele Land
weer wiet un siet för Fisch bekannt.
So kemen denn, bi jedet Weer,
an'n Sünndag all de Anglers her,
de denn ok glieks an't Över seten
still as de Buddhas, weltvergeten,

bet denn an'n Avend mit den Fang
se stünnen an de Tonbank drang.
De Fisch, de se tohoopen drägen,
de dä akraat de Kröger wägen,
un denn verklor he jedet Mal:
ehr Fisch, de weern phänomenal,
un dat se sworer, grötter weern
as in dat Naverdörp de ehrn!
De Navers wüssen nich, worüm —
meist as'n Wunner schien dat jüm:
Woso sünd blots in't Dörp vun'n Kröger
de Fisch so groot, dat Wicht wat höger?

Un so vergüng denn Johr üm Johr.
Denn worr dat eens Daags apenbar:
de Krögersch kümmt so buukt daher?
Na kloor! Dor bargt sik wat bi ehr!
De Kröger, de juchheit as dull,
as se to liggen kamen schull.

De Jung keem an een' Sünndag an,
een pummeligen lütten Mann,
un forts worrn all de Frünnen laden
to'n Beer und to'n Geburtsdagsbraden.
Un denn güng dat vun Mund to Mund:
Wat is de knackig, drall un rund!
Wi wüllt den lütten Gottessegen
doch glieks op unse Fischwaag wägen!

Na, seggt un daan. — Denn woor dat still.
De Kröger, nu miteens ganz hill,
schööv an de Skala hen un her,
man blots: dat hulp nu ok nix mehr,
un een, de reep: nu geiht dat rund...!
De Jung, de wiggt di ölven Pund!

Dat bleev ganz still. Se keken schuulsch
na'n Kröger hen. De keek wat muulsch
un stamer, ja, em weer't passeert,
he harr de Waag manipuleert,
doch blots, natürlich!!, dat de nerrn
in't anner Dörp wat leeger weern!

De Waag verswunn in't Arsenal;
een niege keem — nu: digital!
Siet düssen Dag kaamt op den Disch
bloots noch so'n nich gedopte Fisch.


Bild Angler: Kintaiyo/Wikimedia Commons
16.8.2020


na baven