Jerusaleem: Verfulen Lieknamen in Bethlehem, israeelsche Suldaten ümstellt palestineesche Zivillüüd un Kämpers an de Steed vun Christus sin Geboort, unbegraven Dode in Ramallah - de Krieg in Israeel verwannelt sik in een grote minschliche un politische Nachtmahr, nu dat de letzten sichtbaarn Teken vun'n Fredensprozess vun Oslo terslaan sünd.

Twee Daag lang weern de Sülvstmordbomber nu ruhig. Man de tokamen Weken warrn bestimmen, wat de Tokunft vun't Hillge Land för veele Johren ween warrt.

Wenn de Geboortskark nu een Slachtfeld is, wat is denn noch hillig?! Wat dar 'nau vörgeiht, is so unklaar as de Rüük, de jümmers noch üm'n Manger Square opstiggt, avers offizielle Sprekers vun de Christen seggt, dat tominnst 100 palästineesche Zivillüüd sik in dat Hilligdoom as in een Friestatt flücht hebbt, in de Kark, de op den Platz steiht, 'neem Jesus - as de Christen glöövt - in'n Stall boren weer.

Bi de Zivillüüd, schient dat, sünd tominnst 10 palästineesche Milizkämpers vun'e Tansim-Organisaschoon. De israeelsche Armee hett de Kark mit Panzers ümstellt. De Israeelschen seggt, de Tansim-Lüüd harrn toeerst op de israeelschen Suldaten füert. De Palästineeschen seggt, nee.

Man annerswo kann nüms de Slachterie afstrieden. To'n Bispill wat Sami Abda sä, as he mi an'n 3.April nameddags anreep. An'n Dingsdag, sä he, weern israeelsche Suldaten bi sin Huus in'e Binnenstadt vun Bethlehem ankamen un harrn dat foorts beschaten, ok nadem en Naver jüm warnt harr, dat Huus weer vull mit Fruunslüüd un Kinner. De Israeelschen sän, dat dar Terroristen in seten dään.

Sami Abda ween, as he mi dat vertelln dä, un düt sünd sin egen Wöör: "Se hebbt 18 Kugeln dör uns Huusdöör schaten. Min Moder Sumaya un min Broder Jacoub hebbt se drapen. Min Moder weer 64, min Broder 37. Se fullen beed op'n Footborrn. Jedeen, den ik tofaat kreeg, reep ik an, jüm in't Sükenhuus to bringen. Man nüms kunn us hölpen. Se sturven. As de Ambulanzwagen keem, hett een israeelsche Offzier em verbaden, in uns Straat rin to fahrn. So hebbt wi 30 Stünnen lang blangen jümehr Lieknamen leevt. De Kinner hebbt wi in'e Baadstuuv daan, dat se de Lieken nich sehn kunnen. Hölpt us, bidd ik."

Man düsse taagnackig Fraag: Wat is noch hillig? - de Fraag kunn liekers wedder stellt warrn vun jedeneen, de de Jerusalem Post düsse Week liest: 'n hele Siet vull mit lierlütte Fotos vun de Dutzen vun israeelschen Zivillüüd, de vun de palästineeschen Sülvstmordbombers man bloots in een Maand in Stücken rieten worn sünd. Een israeelsche Jungdeern weer jüst in't sülvige Öller as de palästineesche Deern, de ehr Leven tonicht maakt hett. Dat weer een Siet vun Schrecken un Elend.

Un ja, de Krieg buut de minschliche Tragödie. Jüst as Sami Abda versöök, sin egen Kinner vör'n Anblick vun jümehr Grootmodder un Onkel ehr Bloot to wohren, jüst dar woor een junge Doktersch in ehr Huus in Djenin doodschaten, as 30 israeelsche Panzers sik in de Stadt op de nördliche West Bank smeten, begrööt vun de Salven ut palästineesche Scheetprügel.

Ok de Ort Salfat woor besett, un Hunnerte Panzers sünd in de Nacht op'n 4.April in de ole Stadt Nablus infohrn. In Ramallah hebbt de Amtslüüd vun't Sükenhuus de Lieken vun 25 Palästineeschen in'e Eer bracht, de all 4 Daag in'e Liekenhall an't verfulen weern. Se kunnen nich länger töven, bet de Israeelschen jüm de Verlööf to'n Begraven geven dän.

Över 1000 Gefangne sünd bet nu vun de Israeelschen mitnahmen woorn, un bloots vun üm un bi een Dutz dorvun is bekannt, woneem se sünd oder af se noch leevt. Een Trupp vun'n poor Dutzen Gefangne woor toeerst na een jüüdsche Siedlung fohrn, ehrdat se wieder wegbracht woorn.

Maakt nu de Staat Israeel all dat Höpen op een Staat Palästina tonicht? Een lüttje Blööt vun Höpen is in düsse Daag doch opgahn, as in Küll un Regen an'n Checkpoint Kalandia buten vör de Stadt Ramallah israeelsche Juden un israeelsche Araber un'n poor vun de westlichen Protestierer (de ehr Kraasch överhaupt nicht 'noog wördigt woorn is) tosamenkemen un Freden un dat Enn vun't israeelsche Besetten feddern dän.

Dat gifft een Leven na den Krieg. Avers warrt dat Palästina denn geven? Warrt de Welt Palästina mal sehn, as se Bosnien sehn dä un Kosovo un Oost-Timor?

Hanan Ashrawi, een vun de wenigen palästineeschen Lüüd vun Bedüden, de een truun kann, is bavento een vun de letzten Lüüd in düssen Krieg, de noch bi Verstand sünd. Madd un möör, ehr Oogen insunken, höllt se sik waak mit hitten Koffie. Se hett in Jerusaleem ahn veel Höpen un ahn Illuschoon mit mi spraken.

"Dat Fredensafkamen vun Oslo warrt afsichtlich toschannen maakt", sä se. "Scharon is ahn Besinnen konsequent. He hett jümmers seggt, he wull dat Oslo-Afkamen nich hebben. Düt Wedderbesetten vun'e Westbank woor veele Maanden vörher plant.
Man Scharon hett nich dat Tüüg, aftosehn, wat sin Hanneln allens utlöst. Sin Versöök, Arafat hentomaken, sünd na achtern losgahn. He hett Arafat sin Rüüchhalt mang de Palästineeschen verbetert.
Elkeen - de Linken, de Rechten, de "Midd", de Radikaaln, de Islamisten - hebbt sik nu achter Arafat tohoopfunnen. Glöövt Ji man nich, dat nu jichtenseen 'n annern palästineeschen Baas vörslaan dä! Nu nich mehr."

Kann dat wahr ween, dat Arafat sin Swackheit to Arafat sin Starkde warrt? dat Ariel Scharon sin militäärsche Macht sik in Swackheit verwannelt? Wenn de israeelsche Armee nu den groten militäärschen Spood hett, as se seggt, woso wüllt se denn keen Schrievers- un Fotolüüd dorbihebben? To de glieke Tied, as de Europäers, de UN-Sekerheitsraat un de araabsche Liga all för sik över düssen Wennpunkt in'e Geschicht vun Nahoost nadenken dän, güng de krieg in sin leegsten Tostand. Dat is de letzte Koloniaalkrieg in'e Welt: een Krieg twüschen een Natioon, de Siedlungen buut, un dat Volk, dat se besetten.