Dei Flammenhöll Euböa

vun Behrend Böckmann


Up Bülgen in't Ägäisch Meer
dreef einst Odysseus dwass un dwer
un is ok up dat Eiland kåmen,
dat hüt Euböa hett as Nåmen,
un dei wull as Bedüdung hett,
dat einst Ossen schlick un fett
harrn hier ein komodig Läben
ünnern blågen Inselhäben.

So as Rügen Düütschland krönt
Euböa wull ok Hellas schönt —
as Halsdauk an't Hellenenland,
fien bemålt mit Holt un Sand.
Ok Aristoteles befünn,
dat hei hier sihr gaut läben künn
un wür denn nå sien Läbensdågen
tau sien Inselgraff hendrågen.

Üm up dat Eiland rup tau kåmen
ward ganz giern dei Fähr ok nåhmen,
dat geef un gifft 'n Fährstatschon
in't weltbekannte Marathon.
Ok gifft 'n Brügg, dat is wull wohr,
dei öller as tweidusend Johr —
un so fäuhlt man von Fall tau Fall
dei Antike œwerall.

As Zeus noch Göttervadder wier
geef 't gräune Eiland sik dei Ihr,
Kuurnkåmer von Athen tau sien
un tau liewern gauden Wien.
Holt un Acker hemm' dat gäben
wat nödig wier, üm dor tau läben,
bet dat Höllenfüer keem,
dat so düchtig Fohrt upnähm.

Bi vierdig Grad un dullen Wind
loppen Flammen ganz geschwind
von Holt tau Holt, von Bom tau Bom
vörbi so männig Läbensdrom.
Flammen lüchten inne Nacht
wiesen Minschen Füermacht,
wiethen kann dei Minsch sei seihn,
Rok lött ahnen, wat gescheihn.

Dei Flammen keemen mit 'n Mål
von Bargen tau dat Äuwer dål,
un ümmer grötter ward dei Not
ünnern Häben schwatt un rod.
Dat Füer löppt von Urt tau Urt
un dei Minschen lopen furt;
glücklich dei dat Äuwer finnt,
wo 'n Schäp em denn upnimmt.

Wat hett sik Zeus sien Sœhn blot dacht,
as hei dat Füer geef son'n Macht,
dat sülfst in sienen hillig Nåmen
mit Wåder is nich bitaukåmen;
wat lopen blot dei Flammen rasch,
hinnerlåten Schutt un Asch
un fallen ierst in sik tausåmen,
wenn's all Brennbor hemm' sik nåhmen.

Dei Füerdüwel Höllenheld
schlööcht schwatte Wunnen in uns Welt,
lött uns Minschen all beläben,
wat dat inne Höll ward gäben,
wenn wi uns nich bald besinnen,
üm tau Vernunft taurüch tau finnen,
mit Mudder Ierd so ümtaugåhn,
dat sei ewig kann beståhn!


13.8.2021


na baven