vun Behrend Böckmann

Uns Kanzler hett sik wat utdacht:
'n Wumms gifft em nu Kraft un Macht,
dormit hei Düütschland redden deit,
wenn dat nich mihr wieder geiht.

Schmäd't wür mit 'n Wumms ganz hild
'n Wunner wat 'n grot Schutzschild
gägen dei Coronasük.
Un männigein harr bäten Glück
ünner'n Reddungsschirm in't Land,
dei mit Wumms wür denn upspannt.

Mit Corona nich an'n Enn'
keem ok all dei Tiedenwenn':
Dei Ukrain kriecht nu Raketen
un dei Düütschen väl "Paketen".
Dei würn packt in aller Hast,
üm tau minnern all dei Last.

Un ein Paket stünn "Gasümlåch",
dei helpen süll bi kolle Dåch,
doch dei Minschen meckern sihr,
holl'n dat nich för'n gaud Afwihr
un gåhn ihrer as't tau låt
gägen't Unheil up dei Stråt.

Nu wür Scholz tau bunt dei Såk
un hei fünn in sien blaumig Språk
in't Kanzlerdüütsch denn "Dubbelwumms"
dat Vörspäl tau den groten Rumms!

Nu ward von'n Staat väl Geld utgäben,
dormit dei Minschen œwerläben,
dormit in't rieke Land dei Armen
sik bi Küll denn bäten warmen.

Un weckern deit dat Geld utgåhn,
den sall dei "Dubbelwumms" biståhn,
dormit dei Bäcker in grot Not
backt morgen noch uns däglich Brot.

Tweihunnert Milljarden warden verdeilt,
dormit Düütschland wedder heilt,
so äuwt dei Kanzler sik in't Püstern,
wenn dat Wåhlvolk steiht in'n Düstern.

Mit 'n Wumms dei Krise œwerwinnen,
mit Euros einen Utwech finnen,
dat sall doch wedder Upschwung gäben,
dormit wi wieder asig läben.

Ja dei Ampel gräun-gäl-rod
brukt 'n Wumms wull riesengrot —
un ihrer dat måkt düchtig "Rumms!",
noch vördem 'nen Dubbelwumms!

"Denk ik in Düütschland inne Nacht,
bün ik üm den Schlap wull bracht" —
doch harrn dei Taustänn' em nich stürt,
wenn Heine wat von'n Wumms harr hürt.

Mit Wumms würn Automaten knackt,
ok ward Musik mit Wumms mål måkt,
Wumms hett ok dei niege Wågen,
'n Chili-Wumms giht up'n Mågen,
mit Wumms geiht tau in väle Bedden,
nu sall dei Dubbelwumms uns redden!