Blous drei Farwen?

vun Jürgen Brake

Äin Monat Fifa-Weltmesterschopp (hät dat Spiëll nit frögger moa Fautball un nit Fifa hëiten?) — dat was ne spanende Tied. Ouk för mi, trotz diäm dat ek dat "Abseits" ümmer äers in däi Tiedlupe erkenn. Ek hev mi wahne freit, dat "use Jungs" sou wiet kuommen sit. Üöwer däi Fahnen an däi Opels, däi Polos un däi Treckers hev ek mi män faken lustech maket, wieldat ek nit wäit, wat däi "herrlickste Niäwensake van däi Welt" met usere Staatssymbole te daun hiätt.

Usere lebennigen Staatssymbole, däi Köhlers un Merkels un Schäubles, däi wussen dat owwer wahne ackeraot un höllen iëhre Nasen in jäide Kamera, däi sik seihn leit un freiten sik un jûchten, dat jederäin dachte: "Jao, dat es äin(e) van us!" Un dat es wichtich, denn däi lesten Ümfraogen, däi göngen nit guët ut för däi Regäërung uu däi wäören vüör däi WM maket. Däi Lü wäören jao wahne tefriän, dat sik däi bäiden gröttsten Patteien tehoupe daohn hiëtt, män nu miärket säi, wat dat bedütt. "Gesundheitsreform" un "Mehrwertstüer" bedütt dat, mäh berappen för däi Lü un mäh "Reformen" fö däi Regärung, wieldat se nit viël Oppesitioun daotiëgen hett. Groute Koalitioun bedütt, dat däi Regäërung viël mäh van däi Saken maken kann, däi se sik süss nit waogen wöüe.

Wenn däi Lü dat gewaoh wääen, dann gott däi Ümfraogeperzente dahl. Un wenn dann jüst maol Fautball-WM is un usere Jungens spiëllen guët, dann maut me as Polliticker schommao ut'm Hüüsken sin, wenn me wäit, dat däi Kameras an sit. Un op afspruokene Fraogen däi Sprüëke in dat Mikrofon küën, däi däi frönndlike Sport-Redaktör ut'n Begleittropp äim intrichtert hett. Dat giëtt Perzente bi däi näichste Ümfraoge. In August könnt vi dat seihen.

Män däi dusselichste Sprüëk van düssen Monat kam nit van nem Polliticker, näi, dat was en Sprüëk van äin "Fan". Däi fröndlike Sport-Redaktör van't Fäërnseihn harre sonne richtich dussellige Fraoge: "Was ist für Sie das Schönste an dieser Fußballweltmeisterschaft?" Un däi junge Kääl was sou vull Fautballglücke (un villichte ouk en biëtken van Beer), dat häi nit mäh klaor denken konn. Un häi lachde un freide sich in däi Kamera rin und gaff ne Beschäid: "Deutschland hat wieder zur Fahne zurückgefunden!"

Duonnerschlach! Sou'n klimfisterigen Satz in sou'ne vergneichlicke Stemmungk? Dao härre däi Redaktör doch maol naofraogen mocht! Busou "zurückgefunden"? Wat föür ne Fahne mennte däi? Villichte ne ganz annere? An olle Hüser kann me noch an däi äirste Etage buten sou'n isern Küöcker seihn, bao me frögger däi Fahnen instiäcken konn un ouk moche. Män däi wassen ut ne Tied, as Schwatt-Rout-Gold verbuon was. Däi ganz ollen Hüser, däi sitt ut däi Kaisertied. Da moche me Schwatt-Witt-Rout rutdaun op Kaiser sin Gebuortsdach un för däi Sedansfiër. Un däi nit ganz sou ollen Hüser, däi sitt ut däi Nazi-Tied, as dat Flaggen sougar kontrolläërt wouë van den "Blockwart" un dao moche dat Dauk ouk schwatt-witt-rout sin, män dat Schwatte, dat was dat Hakenkrüüz. Schwatt-Rout-Gold was ouk un grade bi de Nazis verbuon. Säi näömden dat blous minnächtig "Schwatt-Rout-Senf". Denn Schwatt-Rout-Gold sind in Düütschland siet twäihunnert Jaohr däi Täiken för Friehäit und Demokraotie, un souwat konnen däi Nazis üöwwerhoups nit lieden. Un me wäit, wat säi met däi Lü maket hett, däi för Friehäit und Demokraotie wären.

Schwatt-Rout-Gold hiätt nicks te daun met Kaiser Willem un met däi Nazis. Un villichte wäör'et guët, wann alle use Fautball-Frönne sik dao drop besinnen wöüen. Un däi Wiärks van use Pollitickers, dat hiät nicks te daun met däi Leistung van "use Jungens". Dat söllen vi alle nit vergiätten!