Wat China hüüt bedüüdt

Diskussion in'n Achtergrunn vun Heinz Tiekötter un Marlou Lessing


 

Düsse Diskussion is en Mailwessel twüschen Heinz Tiekötter un Marlou Lessing. Startpunkt weer de Indraag in't plattdüütsche Notizbook vun'n 24.5.2020:

 

China is dat Virus

De Demokratie in Hongkong warrt vör uns Ogen to Dode wörgt. Vör uns Ogen. Vör de Ogen vun de Welt. China söcht keen Fiegenblatt mehr dorför, bemäntelt dat nich mehr. Se denkt, se hebbt dat nich mehr nödig — sünd mächtig noog.

Denk hier nich een, dat China mit Hongkong ophalen wöör. Al hett dat de swäckeren Noch-Demokratien orr Jüst-so-even-noch-Demokratien in Europa un Asien in sien (ökonomische) Fuust. Se warrt de nich mehr rutlaten. As en Krake, orr beter: as en Virus warrt sik dat wesenlose System vun pure Macht över Minschen un Länner utbreden — en Virus, veel gefährlicher, döödlicher as Corona. Wenn wi nu nich konsequent warrt un Hongkong un Taiwan bispringt un klaarmaakt, dat wi nich to köpen sünd — denn warrt bald uns Börgerrechten un Minschenrechten liekso afwörgt, und frie Presse kasseert un uns Denken fremdbestimmt. Denn is de Muulkorv un de mediale Lobotomie nich mehr wied. Ik will dat nich — egaal wat dat kost.

 

 

Heinz Tiekötter:

Wi hebbt all uns Geschicht un de Beleevnisse hett jümmers de Völker un jemmer Politik beinflusst.
Wenn ik doran dink, wat de europääschen Stoten, de Portos un Sponier in Macao, de Tommies in Hongkong, de Düütschen in Shanghai un Tsintao un de Karken öberall, jem tosett hebbt, denn verstoh ik, dat dat Volk — jüst so as hüüt de Israelis — nu seggen: "Nich nochmol mit uns!" Ok de Boxeropstand harr jem nich lang holpen; denn kemen Japoners un de Russen un hebbt dat versöcht.
Un de grote Muer gegen de Mongolen hett ok nich allerwegens wat nützt. Jichtenswann fangt een Volk an, sik to wehren. Un denn köönt se meist nich mehr ophollen un weet nich, wannehr dat genoog is. China harr veerdusend Johr een Hoochkultur un all wulln se dorvun afbieten. Ok wi Düütschen; "Germans to the Front"!

Nix för ungoot, man dor geiht uns Menen 'n beten uteneen.


Marlou Lessing:

Wat de Betrachten vun de Geschichte angeiht, dor sünd wi ganz övereen. Dat is recht un richtig, wenn Völker sik nich frömdbestimmen laten wüllt. Ik bün in düsse Saak ok ganz op de Siet vun dat chineesche Volk. Avers nich vun de chineesche Regeern! Dat is — ik höp, dor sünd wi ok övereen — en lupenreine Diktatur. De al versöcht, dat Volk bet in den Gedanken rin to kuntrulleern! Un wieldat se dat meistto ok schafft, is de grote Masse chineesches Volk op ehr Sied... dat maakt mi en Problem ok mit dat Volk. Wat schast du seggen, wenn de grote Mehrheit vun de Chinesen glöövt, de Demonstranten in Hongkong weern würklich Terroristen orr US-Agenten?! Se kriegt ja nix anners mehr to hören! Bloots piep muttst du seggen, denn sittst du in Haft! Lü, de noch sülven denkt, verswinnt na un na — op de een orr anner Wies. Un mit düsse 100% kuntrullierte Denke will Chinas Regeern ok den Rest vun de Welt beglücken. Wullt du Geschäfte mit China maken? Denn segg eerstmal dien Geschäftspartners in Taiwan af! Un segg bloots nix över Hongkong! Segg ok nich, dat dat Virus ut China stammt! Beter seggst du, dat China de Welt hulpen hett, dat Virus to överwinnen! Wat, steiht in dien Schoolböker noch, dat dat 1989 in China en demokraatschen Opstand geven hett? Un etwa ok en Massaker an de Opständschen?! Stantepe treckst du düsse Schoolböker in un verbrennst se! Sünst gifft dat keen Geschäfte mehr! Op't best schriffst du gor nix in dien Schoolböker, orr hööchstens, dat China en terroristschen Angriep glorioos trüchslaan hett! Jump dör düssen Riepen, spring över dat Stöckchen! Övertügen? Nee, wi wüllt di gor nich övertügen, dat hebbt wi nich nödig; wi wüllt ganz eenfach, dat du pareerst! De Macht! Also jümmers brav! — De eerste Generaschoon höllt noch bloots den Mund un tuckt de Schullern — Geschäfte mit China loopt doch so good un maakt dat Leven so moi —, de twete Generaschoon glöövt dat al wirklich. —— Ja, ik weet, wi all hebbt överleverte Gewissheiten, de wi achterfragen schulln. Dat mööt wi ok maken. Man ik kann un kann dat nich af, wenn een mien Bregen beherrschen will. Ik bever üm Hongkong, de letzte demokratische Enklave. Ik bever üm de Völker, mit de China nipp un nau dat maakt, wat Du kritiseerst — de Tibeter, de Uiguren, de Turkvöker-Minnerheiten un religiösen Minnerheiten. Ik bever, wat passeert, wenn de Dalai Lama starvt — den kindlichen Nafolger vun den Panchen-Lama hebbt se mitsamt sien Familie kidnappt un verswinnen laten... De Geschichte blifft lebennig, avers de Welt is hüüt, un se is ok, wat wi un annere ut de Geschichte maakt. Ik much geern, dat dat apen un kritisch un de Wohrheit verplicht blifft. Wat heet "Ik much geern"?! Ik bruk dat as de Lucht to'n Aten.

 

 

Heinz Tiekötter:

Dor bitt keen Muus en Foden af; Du hest in all dien Argument Recht. Ok ik wull so nich leben. Wat ik to bedenken geev, dat is, wi — de Westen — hebbt mit dorför sorgt, dat sik dat so entwickeln kunn. Villicht lehrt uns dat jo, dat sik all uns viegeliensche Geschäftemokeree un Handlungswiesen in een twee Generaschonen gegen uns richten ward. Un hebbt wi nich tokeken, as Mao 30. Mio. Minschen mit siene Kulturrevoluschoon üm de Eck brocht hebbt? Wi harrn jem jo en Bispeel geben kunnt. Doch wi harr süllmst grood uns egen Revoluschoon. (Unter den Talaren.....) Un sünd wi hüüt konsequenter bi Bolsonaro, Trump, Orban...? Ne, Geschäft geiht vör! Dat beten Ünnerdrückung; son beten Regenwold, Mikroplastik steuert mi nich; ik eet keen Fisch. Ik harr bit eben soss Studenten to Beseuk. Se wüllt as Semesterarbeit mit een Prospekt Hamborg as Urloffsort bewarben. Wat sik hier no'n Krieg in Hamburg afspeelt hett, dor wussen se nix vun af.
Wenn ik de Geschicht nich kenn, kann se sik wedderholen.

 

Marlou Lessing:

Leve Heinz, un ik mutt -- beter: kann -- Di wedder recht geven: Dat Gewinnstreven, dat warrt nochmal de Dood vun de Minschheit. Dat schalt den Bregen effizienter ut as all chineesche orr annershaftige Indoktrination. Wenn wi de Koor vör de Wand fohrt, denn ut Profitstreven un nix anners. Dat EU-Mercosur-Afkamen mutt verhinnert warrn. Klaar, wi kriegt billig Soja för uns Rindveecher; un weg is de Regenwoold...

Wi warrt nix lehren, ehrdat dat nich bannig, bannig weh deit. Uns sülven. Nich de indigenen Völker un de armen Minschen in Bangladesh un so. De deit dat al lang weh. Wedder is Gerechtigkeit de Anfang un dat Enn.

Segg eins, dröff ik düssen unsen Mailwessel as Achtergrunn in Plattpartu setten?

 

 

Heinz Tiekötter:

Kloor kannst du uns Dialoog verwenn. Man, denn geheurt dor ok de Bibelsteed mit rin, wo Moses vun den Barg Sinai dolstegen is un dat güllene Kalv twei slogen hett. Denn um düt Kalv danzt wi vundoog mehr as jemools freuher. Un je mehr wi danzt, üm so leger ward dat för uns. Ik dink, dat wi to allereerst wat för uns Billung moken müsst. Ohne Billung seht wi gornich, wohen uns de Weg feuhrt.

Ik frei mi, dat wi an Enn dat Sülbige meent.


4.6.2020


na baven