Ünner dei Pagode von Shi Bao Zhai

Ein Mäkelbörger in China

von Hans Jürgen Grebin


Dei Biller laten sik per Klick vergröttern.
Torüch geiht dat denn mit den Zurück-Knoop in'n Browser.

Oewer dusend Johr olt is mien Mäkelborg — allerhand Johr öller is dat Riesenriek China in dei Mitt von Asien — nämlich dreidusend Johr.


Landschap an'n Jangtse

Dorvon künn ick mi mit mien Fru in'n Juli 2009 up ein Reis mit "Viking Reisen" in dit Riesenland von Shanghai - Wuhan - Krüüzfohrt up denn Jangtse - Tschungking - Xian - Peking an 12 Daach oewertügen.


Fohrt up denn Jangtse bi denn Drei-Schluchten-Stausee

Mien Indrücke will ick verseuken werrertaugäben, dormit ein bäten ook för dei düüdlich warrt, dei nich dei Möglickeit hebben, so eine wiede Reis tau ünnernähmen. Dorbi will ick wägen dei korte Tied, dei wi in't Land tobröcht hebben, blots up dat Wäsentliche to snacken kamen.


Weg up dei Seilbrück

Uns Fohrstreck twüschen Shanghai - Wuhan - Tschungking - Xian un Peking

In Hamburg begünn uns Weltreis üm dei halw Welt — ümmerhen binah 11.000 km liggen dei Länner Düütschland und China uuteinanner.


Chinesische Stadt von'n Jangtse uut seihn

Dei Tiedünnerschied na "ME Sommertied" twüschen Rostock un Shanghai bedrücht söß (6) Stunnen, orrer düütlicher, wenn dei Rostocker üm 6 morgens upstahn, ääten dei Chinesen al Middach, wenn wi uns abends üm 6 an denn Abendbrotsdisch setten, slapen sei al lang. Man gewöhnt sick fix an denn Ünnerscheid, denn wenn dat düster ward, warrst du von allein meud, un wenn dat "morgens" hell ward, büst du waak un steihst up.

Wi kamen in Shanghai an un sünd verwunnert oewer denn riesigen Fleeghaven — un denn ierst dei Schnellbahn (Transrapid) von'n Flughafen in dei 50 km entfiernte Stadt! Mit ein Tempo von oewer 300 km/Stunn führten wi dörch dei greune Landschaft. Wie seihn breide Hochstraaten, Brücken und Wahnhochhüser vörbifleigen.


Stratenszene in Shanghai

1. Dei Grööt un Entfiernungen in China


Ole Brüch un dorachter niege Hüüs: Dei Stadt Wuhan an'n Jangtse

Womit beginnen? Fangt wi mit dei Grött, dei riesigen Entfernungen un dei Minschenantahl mal an, weil dat an'n oogenschienlichsten un beindruckensten för jeden Beseuker is.

Shanghai is ein riesengrote Stadt, man kann sei woll blots uut denn Fleiger in 11 km Höch oewerblicken. Sei hett rund 18 bet 20 Millionen Inwahners — ganz akkraat weit dat nüms, de "Unschärfe" vun 2 Millionen, also ein Stadt as Hamburg, is hier ganz normal. Dei 18 bet 20 Millionen Lüüd läben up 6.340 km². Dat is von dei Fläch, vergläken mit Rügen (900 km²), dat Söbenfache.


Bavenup sünd ook noch lüttere Hüüs!

Läben mütt disse Minschen alleen schon uut Vernunftsgrünn in Wahnhochhüser, aver dei sünd grötter, as wi uns vörstellen koenen — bit in denn 28. Stock mütten sei stiegen, ja: tau Faut, denn uns warr secht, Fohrsteuhl giwwt datt in dei Regel nich. Wenn man dortau noch bedenkt, dei Chinesen äten giern middachs tau Huus — dor mütten sei miehrmals dissen Wech rupp un runner nähmen, nich uuttaudenken! För dei Fitness is up jeden Fall sorcht, wenn sei dat würklich maken. Hebben dei Chinesen villicht wägen dei fehlenden Fohrsteuhl bi dei Olympiade so vele Medaillen wunnen?!


Straten in Peking

70 % von dei Bürgers in China süllen in Wahneigentum läben, un dorbi sünd dei Pries för Wahnungen ganz schön hoch. Bi uns in Düütschland räkend wi ein Grotstadt mit miehr as 100.000 Inwahners, aver hier in China is allens anners. As Grotstädte warrn ierst dei mit 1 Million Inwahners tellt. So is dat kein Wunner, dat wi ünnerwägens an denn Jangtse ümmer werrer Grotstädt seihn hebbt, dei dörch ehre Wahnhochhüser düütlich upfallen, dei as Zigarrenschachteln senkrecht in denn Himmel ragen.

Tau dei Entfiernungen wulllen wi uns Fohrtstreck twüschen Shanghai un Peking nähmen, denn disse Streck hebben wi an'n eigen Liew tau spüren krägen:

  • Shanghai oewer denn Jangtsefluß bit na Chongking rund 2.200 km
  • Shanghai - Wuhan ca. 900 km Flug
  • Wuhan bit na Chongking rund 1.100 km oewer denn Jangtse
  • Chongking - Xian ca. 1.000 km Flug
  • Xian - Peking ca. - 1.000 km Flug

Denkmaal an'n Jangtse-Staudamm

Mit denn Fleiger duert dei Flug von Shanghai bit Wuhan rund 75 Minuten, von Chongking bit Xian un von Xian bit Peking vergahn rund 90 Minuten.

So vääl Minschen up einen Hümpel heww ick bither nich seihn. Ümmerhen läben in dei Volksrepublik miehr as 1,3 Milliarden Minschen, dei läben un wahnen wullen. Dat för dei Minschen Wahnungen buut warrt, is eine oewerragende Leistung von denn gröttsten Staat in Asien, woneem noch vör miehr as 50 Johr feudale Taustänn herrschen dään un dei wenigsten Minschen in dei Stadt läwten. Dei meisten Inwahners wieren dormalen Buuern un läwten up dat Lann.


Utsicht von dat Denkmaal an'n Jangtse-Staudamm

China is mit rund 10 Million km² dat viertgröttste Land von dei Fläche her. (Russland, dei USA un Kanada sünd grötter.) Dei Jangtse is mit 6300 km dei drüttlängste Fluss von dei Welt. (Länger sünd — richtig! — Amazonas un Nil.) An Minschen — mit 1,3 Milliarden — warrt dat Land von keinen annern Staat oewerhaalt. Dat dei Minschen Mao Tse Tung liekers sien grote Fählers ümmer noch als ehr Vörbild anseihn un em iehren daun, kann man blots verstahn, wenn man bedenkt, uut wat för ein Laach hei mit dei Volksarmee un Partei dei Minschen in eine annere gesellschaftliche Ordnung miträten hett.


Ein swemmen Parkhaus: Autos ward up denn Jangtse transporteert

Liekers dei korte Tied, dei wi in't Land wiern, sünd wi noch miehr as tovör von oewertüügt, dat China in't 21. Johrhunnert dei bedüdendste Wirtschaftsmacht sien ward.

Inwahnertahlen:

  • Shanghai: rd. 19 Mio
  • Wuhan: rd. 9 Mio
  • Chongking: rd. 3 Mio
  • Xian: rd. 6,5 Mio (z. Tiedenwenn 249.000)
  • Peking: rd. 16 Mio (5.639 /km²)
  • Yuejang (350.000 E - Dongting - See/Jangtse)
  • Shibaozhi (420.00 E)
  • Berlin: rd. 3,5 Mio (3.800 E/km²)


In Peking: Dei Verbaden Stadt


Palast in dei Verbaden Stadt

2. Dat Wahnen in China

Ob woll ein Recht up Wahnung in dei Verfaten von China fastmaakt is? Disse Fraach drängt sick mi up, wenn man in dei Landschaft kieckt, denn riesengrote Wahnhüüser un ünnerwägens unendlich vääl Minschen sünd tau seihn.


Skyline vun Peking

Dei Wahnungsbu sall up staatlich Ünnernähmen funkschoniern. Dat Hüürn na sallen 70% von dei Chinesen eine eigen Wahnung as Wahneigentum besitten, trotz dei hohen Kosten. Uns wüürd secht, dat al för dat Kind in dei Familien vorsörcht ward, dormit dei ein eigen Wahnung as ierstes hett. Ein Heurat sall för jung Minschen blots denn möchlich sien, wenn sei ein eigen Wahnung hebbt.


Chinesische Stadt von'n Jangtse uut seihn

Einen Buuboom ohne glieken hebben wi ünnerwägs seihn, allerdings sallen dei Hochhüüser ahn Personenfohrstäuhl sien, äwer Klos un Köken hebben sei.

Dei Inwahnertahlen hebben bi mi alle Vörstellen von dei Grött oewer denn Huupen schmäten. Allein dei Säkerung von dat Wahnen för ehr Börgers is ein Uutdruck för dei Vörsorch von dei VR China för ehr Minschen. Dei Ein-Kind-Politik ward dormit ook verständlich. Wi hebben jedenfalls in dei Groten Städte keine Wahnungslosen, kein Bettler un kein Graffittispuren seihn, blots ein grote Reinlichkeit un Ordnung.


Dei Pagode von Shi Bao Zhai


Dei Pagode von Shi Bao Zhai von'n Jangtse ut seihn

 

 

 

 

 

3. Dei Jangtse twüschen Shanghai un Wuhan — De Drei-Schluchten-Damm und Chongqing — und dei magisch Tahl 175


Jangtse-Koort


Dei brune Jangtse in de Gegend von denn Drei-Schluchten-Staudamm

Dat Ierste, wat ick von denn Jangtse wohrnahmen heww, wier dei schnelle Strömung, dat bruungäle Waarer mit Ästen, ein Gummistäbel, dei koppöwer vörbitröch, und väle Frachtschepen. Hei deilt China in Nuurd un Süd un is in dei letzten Johren dörch einen gewaltigen Damm upstaut worrn. In Taukunft sall de Jangtse oewer einen Kanal denn Norden von China un Peking mit Waarer versorgen.

Dei Stausee, dei entstahn is, riekt bit Chongqing un is 650 km lang un 175 m deip. Dat bedüüd ook, dat links un rechts in dei vergangen Johr "Land unner" worrn is un Milljonen von Minschen ümsiedelt worrn sünd, samt Veih un Hüüser. Sülwst dei gröttst Stadt Wanxian is in dei Fluten von'n Jangtse-Stausee versunken.


Gigantische Slüsen-Anlaag an'n Jangtse


Bi den Jangtse-Staudamm


Uns' Schipp in einen Bagen von'n Jangtse

Dei Tahl 175 is uns ünnerwägens ümmer werrer begegent un wiest, wie hooch dei niege Waarerspeigel anstägen is. Disse Höch is jeden halben Kilometer markiert.


Happs! De Panda fröhstückt

4. Dei Pandaboor in Chongqing

In'n Panda -Zoo wiern dei Chinesen siehr erfolgreich, denn ein 27-jöhrige Pandaboor tüüchte mit ein Weibchen 1996 ein Junges un ook ein 20-jöhriges Weibchen bröchte 2 Junge up dei Welt. Dei Pandas freet nix as einen besünnern Bambus.

5. Dei Terrakotta-Armee

In'n März 1974, twei Johr vör Enn von dei Grote Kulturrevolution ünner Mao Tse Tungs Verantwurdung — sei duerte von 1966 bitt 1976 un güng na Maos Dood twei Johr spärer tau Enn —, 1974 also fünnen twei Buuern 30 km nuurdöstlich von Xian taufällich bie dat Buddeln von einen Brunnen woll ein von dei sensationellsten archäologischen Funde in't 20. Johrhundert und lechten dorbi dei oewer tweidusend Johre olle Tonarmee von denn iersten Kaiser von China frie. Na und na kämen miehr as 7.000 oewerläbensgrote kaiserliche Krieger und Generale uut denn Lößboden (Ton) taun Vörschien.


Links: Tonkriegers, rechts: Ingang na de Hall

Dei Buuern künnen nich ahnen, dat ehr taufällige Fund eine so grote Bedüden harr, denn siet 1987 is disse legendäre Utgraven up dei Weltkulturerbe-List von de UNESCO verteikend. Ein Museum is buucht worrn un in miehrere Buuwarken sünd dei Funde frielecht un restauriert worrn. All dei Gruben sünd oewerdacht; an'n bekanntesten is woll dei Konstruktion oewer dei Hauptgruuv — hier wölbt sick ein Aluminium-Dack von 200 m mal 70 m.


Ein von de twei Entdecker-Buurn bi't Signiern


De grote Hall

Bi denn Rundgang künnen wi ook einen von dei beiden Buuern seihn, dei dat Bauk oewer dei Terrakotta-Armee signiert.

 

5. Peking: Tienan-Men-Platz, Verbaden Stadt und Sommerpalast von'n Kaiser


In Peking: Olles un Folkloristisches is bunt


In Peking: Nieges is gries

Ganz plötzlich stünnen wi up denn "Platz des Himmlischen Friedens", denn Tienan-Men-Platz mit dat Mao-Tse-Tung-Mausoleum un denn Volkskongreßbuu — Minschenmassen, Autos und dei bekannten Gebüü. Dorbi ook dei Ingang tau dei Verbaden Stadt. Wi stellt fast, wi sünd up historisch Boden anlangt.

Ick erspor mi Bekanntes, aver dei unendlich lang' Schlang' von Minschen, dei sick in Dreierreich und mit schnellen Schritten up dat Mausoleum taubewäächt, bringt mi in dei Gegenwart trüch. Würklich, wi stahn up historischen Boden. Uns plaacht dei groot Hitt von 32 Grad Celsius, dei oewer dörch dei Drööchheit angenähmer wirkt as dei Schwüül inn Süden up denn Jangtse.


Up denn "Hilligen Paad"


In dei Anlagen von'n Sommerpalast

Ganz sülwstverständlich gahn wi denn Wech mit dei dusenden Minschen dörch dei Verbaden Stadt mit dei einzichordigen Gebüü, Plastiken und besonneren Gäbels.
Ein Wohltat, denn dei Beseuk an'n Namiddach in'n Sommerpalast von'n Kaiser mit siene wunnerschönen Anlagen, vääle grote un oll Bööm, Wareranlagen un ümmer werrer dei bekannten Gebüü' und Gäbels mit Verzierungen, schwungen Dääker und Gäbels. Taun Schlutt nimmt uns ein Dschunk up un bringt uns an dat annersiedige Euwer trüch.

Hier teuwt al werrer uns klimatisiert Bus un bringt uns up denn Rückwech taun Hotel an dei Sportstääd von dei Olympisch Spääls Peking 2008.


Dat Stadion mit denn Spitznaam "Vagelnest"


Dei olle Stadtmuur von Peking

6. Dei Groote Muur bi Peking

Wi oft heww ick in mien Läben von dit Buuwark, dat tau dei Weltwunner hüürt un sogor ut dat Weltall tau siehn sein süll (wat nich stimmt!), hüürt un läsen.

Nu stahn wi bi Rägenwerrer un Wolken, dei oewer dat Gebirge trecken, an Uurt un Stell, seihn mit eigen Oogen "The Great Wall", "De Grote Muur" upbuucht vör dusenden Johren un treckt sick oewer dei Gebirgsklippen hinwech, so wied uns Oogen kieken koenen.

Dei Gang oewer dei Muuer föllt uns doch recht schwer, nich nur Treppen sünd tau oewerwinnen, nee, ook lange schrääch Upstiech sünd tau gahn. Minschen oewer Minschen sünd an uns Sied, vör uns un hinner uns — einfach oewerall. Dei Rägen lött na und dei Wolken verswinnen un dormit aapend sich dei Blick up dit gewaltich Muuerwark von dei Minschheit.


Barch mit Grote Muur

Wi koenen uns vörstellen, dat dei Minschen, dei üm uns sünd, genau so denken wi wi. Ob sei ook woll denken moegen, wo vääl Minschenläben un Upwand för dei Afwehr von Fienden upbröcht worrn sünd? So wi dat hüüt noch mit dei Rüstung weltwied bedräben ward — för dei Minschheit nich taun Nutzen!

All güngen fründlich ehren Wech — einige stellen sick för ein Foto tau Verfügung und lächeln in dei Kameras. Ein schön' Bild!

China — ein Land mit Taukunft in't 21. Johrhundert in dei "Weltgemeinschaft"

China ward kommunistisch führt, un kapitalistisch wirtschaften dauhn sei.

Wat kann dei Minschheit doch in friedlich Wies' för dat Läben schaffen! China mit sien Milljarden Minschen is ein Sinnbild dorför — wi verlaten dat groote China mit disse Gedanken un wünschen uns all endlich Fräden, gaude Nahwerschaft un dat dei Riekdom nich miehr ümmer weniger Minschen up unsen blauen Planeten tau Gauden kümmt — oewer allen!


6.9.2009


na baven