Breiw van Covid 19

vun Hildegard Tölke


In Lenzmaond 2020 bin ick bi jau ankaomen, icke, Covid 19, dei van Corona.

Ick häbb mi nich vörher anmellt. Aower nu schriew ick jau ein'n Breiw, dat ick up Weltreise bin, un dat up jau masse taukummp, wat gi nich för möglick holt. Väle häbbt dat nich glöwet, jüsso at inne Bibel dei Thomas aohne Glowen: Hei wull seihn un feuhlen! Un dat häbbt gi nu uck.

Schaulen, Kitas un Karken wüdden schlaoten. Kinner missen ehre Frönde un Lehrers. Kien Beseuk mehr in Alten-un Pflägehüser. Kien taosken mehr. Väle seeten alleine tau Huuse, mössen in Quarantäne inhäuen. Inne Krankenhüser harn Dokters un Krankenschwestern Dag un Nacht dei Hannen vull tau daun. Kiene Hochtied- off Goldenhochtied wüdd fiert. Koppels, dei Musik off Theaoter spälten, kunnen sick nich mehr draopen. Kien Schützenfest, kiene Karmste, kien Stoppelmarkt, kiene Fautballspille mit Fans un kien Karneval. Aals solange ute, bit ick mi trüggetrecke. Uck bi Kooplüe un in Hotels bleew dei Kundschaft wäge. Inne Luft un uppe Ern, äöwerall häbb ick jau miene Tähn'n wiest. För aals häbb ick jau ein P vörsettet.

Angela Merkel un dat ganze Koppel vanne Regierung wassen mangers dei reinsten Nachtuulen. Dei häbbt drocke Regeln un Gesetze maokt, dat jau dat bloß nich noch leiper draopen dö. Sei häbbt masse Geld inne Hand naohmen, süss käöm dei Wirtschaft ganz ünnere Räöe. Mähl un Rullen van Papier schläpten gi nao Huus. Wecke wassen all an 'Hamstern. Väle Lüe häbbt sick gägensietig holpen un Maut maokt. Aower dat lätt nu all sinnig nao.

So langsaom häbbt gi jau bekrägen un begräpen, dat 'ne flaue Tied kummp. Dat Rümmeaosen, dat Windken un Pirrewaihen un immer höger rupp, is eierstemaol daon. Jederein drägg nu fuchtig sien Schnuutenpulli up Mund un Näsen. Dat hang jau aale alllange taun Halse rut. 'ne tiedlang knuust gi noch doran. Vör un an väle Dörns staiht nu: "Bloß mit Maske rinkaomen! Affstand 1,5 m holl'n! Bloß bit 3 Lüe in 'n Laoden! Hannen wasken!" Dei välen Tests wiest jau, wor ick äöwerall bin un weckern ick up'n Kieker un tau packen krägen häbb.

Middewiel willt dwerige Klaukschieters nich ümliek. Bi Schluck un Beier vergätet sei drocke, dat ick noch dor bin. Schluck un Beier maokt lichtfarig. Aower ick häbb dormit räket. Un väle fäuhert un fleigt tau ehr Vergneugen in Urlaub. Mit wecker Querköppe bin ick stiekum trüggekaomen.

In Berlin un woänners loopt Paddjacks mit Schiller uppe Straoten, larmt un willt jau wiesmaoken, dat Corona ein "Fake" off Gespenst off Aopenkraom is. Laot jau nich dissen Floh in 't Ohr setten. Ick bin alltied noch dor. Ick kann jau krank un schlapp maoken as'n Plünnen.

Aower ick häbb uck all market, dat gi langsaom strammweg un hölkernd mit Maske un Affstand wieterkaomt.

Laotet nich dei Flittkes hangen! Gi packt dat! Ick weit, dat nimmp jau aale noch 'ne tiedlang heller mit.

Covid 19


Uttoog ut dat Book
"Wat nich is, kann noch wern"
vun Hildegard Tölke.
Mehr vun de Verfatersch hier.

28.12.2020


na baven