vun Behrend Böckmann

Nu hemm' wi den Schlamassel: Dei Hushalt is nich hentaukriegen! Frankriek as dei tweitgröttst Volkswirtschaft inne EU gifft dormit an, dat 'n mit Düütschland un Polen — un wat dei Hülp för dei Ukrain angeiht — mit dat britisch Königriek (dat nich mehr tau dei EU hüürt) den Bund vonne Uprechten (Willigen) billt. Fiete Merz — in tweiten Wahlgang wür hei düütsche Kanzler von'n Land mit dei gröttst Volkswirtschaft in Europa — harr dat hild, den franzöös'schen Präsidenten Emmanuel Macron in Paris tau besäuken, un Macron besöcht sienen düütschen Kollegen in Berlin. Man måkt sik gägensiedig den Hoff. So sünd sei œwerein, dat Europa eins sien möt, œwer sei weiten ok, dat disse Einheit in 'n Kampf gägen Putin von all afverlangt, Schullen tau måken. So is dei düütsche Schullenbarch up knapp 2,7 Billjonen € anwussen, wat för jeden Börger so anne 30.000 € utmåkt. Dat is nix gägen Frankriek, dor sünd dei Schullen up rund 3,3 Billjonen € inne Hööchde schåten.

Üm nu keinen Arger mit Brüssel tau kriegen, möt 'n vonne Schullen rünnerkåmen. Œwer wo sall man mit Sporn anfangen? Bi dei Rüstung is dat upstunns utschlåten, kümmt nich in Fraag, denn Europa will sülben inne NATO stark warden un nich mihr in't Schlepptau vonne Staaten mit Trump as Präsidenten Mitlöper sien.

Wieldat taun einen dei Markt 'n Int'ress doran hett, dat dei ümmer ölleren Minschen öllersgerecht wåhnen, medizin'sch behannelt, mit Hülpsmiddel as Rullstäuhl, Rullatoren un Sanitärartikel versorcht warden un sik denn noch würdevull up'e letzt Reis begäben kœnen, — also wieldat dat so is, möt tau annern dei Staat sien Renten- un Sozialsystem nie organisieren. Merz keem inne Kritik, as hei verkünn, dat wi uns dat Sozialsystem as bisher nich mihr leisten kœnen, un hei mösst dat mit Rücksicht up sienen Koalitschonspartner bäten üm- un utdüden.

In Frankriek, wo dei Demokratie kein Koalitschonen kennt, sonnern blot Links, Rechts un Zentrum inne Nationalversammlung (dat franzöös'sche Parlement), in Frankriek also kümmt dat denn ümmer wedder vör, dat 'n sik nich so einigen kann, as dat in'n Bundsdach dei Fall is, un dei Minschen mit ehr südlännisch Temperament denn oft eins gägen dei Regierung up'e Stråt gåhn, demonstrieren un randaliern, wenn 's mit 'n Gesetz nich inverståhn sünd, dat Gesetz denn up eins nich dei nödigen Stimmen för den nödigen Tauspruch finnt un dei Regierung den Haut nähmen möt.

Blot dei Präsdent — in 'n Momang is dat Macron —, hei blifft in't Amt un möt denn dei niege Regierung billen. In Frankriek löppt Regierungsbillung anners: dor schnackt man vonne 17. Legislaturperiod, dei mit 'n niege Verfåten för dei Föfte Republik von 1958 anfüng un bet hüt 46 Regierungen tellte; dei letzt ünner Premierminister François Bayrou hett man gråd 270 Dåch dörchhollen. Œwer Demokratie hier un Demokratie dor is nich gliek, ok wenn dei Sorgen hier un dor dei glieken sünd: Woans is dat mit den Hushalt un den Schullenbarch hentaukriegen?, dörp 'n sik ümmer wieder verschullen?, Fieerdåch strieken un dat Rentenöller an't längere Läbensöller anpassen?, Stüern rup un Sozialhülpen rünner, dei Wirtschaft ankurbeln un dei Inflatschon bremsen, un as gaaanz hittes Thema: Woans mit Frömde, Inwannerers un slecht Integrierte ümgåhn? Ut luder Bang vör Krawalle hett 'n in'n September 2025 in Paris un anner grötter Städte 80.000 Polizisten in Positschon bröcht un Finster un Dören so mit Platten taunågelt, as wenn dat Wåder ut'e dei Seine œwer dei Äuwer stiegen wür. Dat is dei franzöös'sche Demokratie un dei franzöös'sche Oort von Oppositschon up'e Stråt. Un wull noch ümmer gellt dat, wat Charles de Gaulle einst von Frankriek säd: "Woans kann man 'n Land regieren, 'neem dat 246 Sorten Käs gifft?"

Œwer de Gaulle künn ok ganz gaut mit Adenauer, denn sei hemm' sik an'n 8. Heumånd (Juli) 1962 inne Kathedral von Reims dråpen, dei düütsch-franzöös'sche Utsöhnung in Gang sett't un an'n 22. Hartung (Januar) 1963 mit ehr Ünnerschriften ünnern Elysée-Vertrages verspråken, dei Vergangenheit achter sik tau låten un sik von nu an för den Fräden in Europa intausetten. Un so sünd uns beiden Länner bet hüt in Fründschaft verbunnen un inne EU rinwussen, ok wenn dat nich ümmer up'n iersten Blick tau seihn is un dat dat hier un dor dei ein un anner Ansicht taun Problem in Europa orrer inne Welt gifft. So is Macron dormit inverståhn, franzöös'sche Soldaten as Frädenstruppen inne Ukrain tau schicken, Merz hengägen höllt sik dor bäten taurüch. Un täuwen wi af, wat Macron un Merz von den niegen Vörschlach von von der Leyen hollen, näben den Bund vonne Willigen dei "Drohnenallianz" mit dei Erfohrungen ut'e Ukrain tau billen, nådem Drohnen, von wo dei ok ümmer kåmen sünd, an'n Häben von Polen för väl Upseihn sorcht hemm'.

Un dat gifft plietsche Stimmen, dei glöben, dat dei Ukrainer nich blot den Bågen rut hemm', russ'sche Drohnen aftaufangen orrer ukrainsche Drohnen up'n Wech nå Moskau tau bringen, ne, sei sünd ok inne Låch, ankåmende Drohnen mit elektronisch Hülp so ümtaustüern, dat's wedder dor ankåmen, wo's inne Luft güngen. Kein Wunner, dat dei Strategen un Rüstungsfirmen öwerall bi so'n Vörstellen dat Muul wadert... Drohnenkrieg is dei Taukumst, un dei Ukrain hett dei Näs vörn. Kann ok mal mallöörn: åhn dat dei Regierung wat dorvon mitkreech, hemm' nu wedder weck so as bi Nuurdstream 2 up eigen Fuust dei Drohnen ümstüert, dorbi nich dei richtigen Knööp drückt — un dei Drohnen wüürn denn œwer Polen von'n Häben hålt. Wat wohr un wat nich wohr is, ward dei Taukunft uns wiesen.

Nix miehr inne Kniep...

Wohr is œwer, dat Frankriek dei tweitgröttst Netto-Tåhler nå Düütschland as den gröttsten Geldgäber för den EU-Huushalt is — un liekers sünd Düütschland un Frankriek wägen dei von Brüssel vörgäben Grenzen för 'n Nieverschullung anhollen, düchtig tau spoorn. Un dat taun Arger vonne Minschen in't Land, dei nich ümmer insichtig mit dei oft undörchsichtig Poletik sünd — sünnerlich wenn ehr Alldag kaputtspoort warrt un dei Rüstung Milljarden un Abermilljarden nåschmeten warrn.

Düütschland möt sik Frankriek ok taun Fründ hollen, denn dei franzöös'schen Départements in Œwersee sünd für Düütschland ok von Bedüdung. So gifft dat in Kourou in Südamerika in't Œwersee-Département Franzöös'sch-Guayana den Weltrumbahnhoff von Europa, un Düütschland is ok hier so as in Brüssel dei gröttste Geldgäber, dormit dei europäischen Ariane-Raketen afhäben kœnen. Orrer nähmen wi dei Inseln Réunion un Mauritus, dei gaut 600 km östlich von Madagaskar in'n Indischen Ozean dat Insel-Département Réunion billen un EU-Rebeit sünd, wohen man as EU-Börger mit 'n Utwies orrer 'n Reisepass för knapp 1000 € mit'e Air France fleigen kann un nich mål so deip inne Kniep griepen möt, as wenn't nå Hawai güng.

Un dor is noch wat, wat Düütschland un Frankriek tausåmenhöllt, denn beid Länner willen tausåmen den düütsch-franzöös'schen Kampfpanzer MGCS as Nåfolger von den düütschen Leopard 2 un den franzöös'schen Leclerc bugen, dei denn 2040 in Deinst stellt warden sall.

So hemm' Düütschland un Frankriek väl vör, üm Europa in'n Wettstriet mit China un Amerika taun niege Weltmacht tau måken, un beid möten dorbi höllsch uppassen, dat's nich œwer'n Schullenbarch in't Trudeln kåmen un dei Bevölkerung ut Gnatz nich den Upstand präuwt. Willen wi tauversichtlich sien, dat dei Düütschen wiederhen in Paris vergnäucht up den 330 m hogen Eiffeltorm ut dat Johr 1889 kladdern un dei Franzosen in'n 368 m hogen Fernsehtorm ut dat Johr 1969 in Berlin mit dat glieke Vergnäugen inkieken!

Un bi all dei Fründschaft möt dat nich heiten, dat an't Enn von'n Wech in 'n einig Europa dei Düütschen blot noch dat franzöös'sch witte Stangenbrod (Baguette) un dat franzöös'sche Suppäten "Pot au feu" verlangen un dei Franzosen ganz wild up uns Schwattbrod un düütsche Arftensupp mit 'n Knackwust sünd. Frankriek un Düütschland un Düütschland un Frankriek — Bonne chance orrer väl Glück up den Wech in 't einig Europa, ok mit den MGCS, dei afschrecken sall un doch nie nich dörch Diplomatie un ümsichtig Verhanneln taun Schrecken för Minschen in'n Striet warden süll.