Dei Audi-Röwerbann'

vun Behrend Böckmann


Von't Safransäuken an'n Wüstenrand
fleigen's in ein anner Land,
üm denn dor in Allahs Nåmen
åhn Arbeit an väl Geld tau kåmen
un sünd bald dei "Audi-Bande"
ut Holland orrer Nedderlande.

So an tweihunnertföftig Måten
knacken düchtig Bankomåten —
un bet 'n Schutzmann sei hett funnen,
sünd's in'n Audi all verschwunnen,
wat ok keinen Minschen wunnert,
denn dei is bannig schnell up hunnert;
sei kœnen in 'n muusten Wågen
fixer as Gendarmen jågen,
un dor man sei nich kreech tau fåten,
säkert man dei Bankomåten.

So wür bald Rietut denn nåhmen,
wull nu in Düütschland tau wat kåmen;
un sei sünd denn taun Nåwern gåhn
un hemm' gliek düchtig dor tauschlåhn:
in Aachen deit man Printen backen,
sei œwer Bankomåten knacken,
ok in Düren, Bonn un Hågen —
tweihunnert mål hett sik't taudrågen,
dat twüschen twei un vier, wenn't gråcht,
dei niege Œwerfall wür wåcht.

Mit'n Gas un Iesen ward hantiert
bet dat Geldschapp explodiert,
un wenn sei dat utnähmen willen
bruken's noch dei Näwelbrillen,
un dor bi't Sprengen Rok upsticht
hemm's 'n Larf oh vör't Gesicht,
an'n Lief bestimmte Kledåschen
as Verstäk hüern's Graragen,
von ehr leiwe Gängsterbrut —
sei spioniert dei Banken ut —
so hemm's sik Milljonen nåhmen
un por blot achter Trallen kåmen.


13.2.2022


na baven