Hebbt Se dormalen ok keen mehr afkregen? 2002 weer dat; de Spaarkassen vun Sleswig-Holsteen harrn den Wettbewerb "Schleswig-Holstein spinnt" utschreven. Dor hett Arne Bruhn ut Moorreeg den Vörslag inbröcht, lütte Anstekers mit de Opschrift Ik snack ok Platt to maken un in de Spaarkassen to verdelen. Dordör, meen Herr Bruhn, köönt sik denn Plattdüütsche al vun Wieden erkennen un glieks mitnanner Platt snacken, wenn se wat to besnacken hebbt. — 30.000 Anstekers woorn maakt — un weern na poor Daag ratzekahl weg. Dor harr nüms mit rekent: De Nafraag weer enorm!

Nu is dat so wiet: De twete Swung vun Piekers warrt rutbröcht! Dütmaal sünd dat glieks 50.000. In de twete Hälft vun'n Sneemaand kunnen de in de Spaarkassen to kriegen ween. Herr Bruhn hett us rechttiedig wohrschuut, dat wi op Plattpartu ok Bescheed seggt — Dank ok, Herr Bruhn!

Wenn Se ok dütmaal dat Nasehn hebbt, köönt Se de Piekers ok bi Arne Bruhn sülven bestelln. Poor hett he jümmers dor. He schickt de denn per Post, wenn Se em dat Porto schickt. Dat lohnt sik vunwegen dat Porto sachs bloots för stückerwat mehr as een Pieker.

Schullen Se also keen afkriegen, mailt Se man an BRUHN.STIFTEN@t-online.de orr ropt se Arne Bruhn an ünner Telefon 04122-82660. He kann Se wiederhelpen.