Dat Hotel "Schwerelos"
orrer "Dei Reis in't All"

vun Behrend Böckmann

So männig-ein hett sik vörnåhmen,
hei wull den Månd mål neeger kåmen,
un spoort up sien ganz eigen Oort
för disse grote Weltallfohrt,
denn man schnackt all œwerall
von't ierst Hotel in't Weltenall,
wohen man mit Raketen reist
un denn unse Ierd ümkreist,
kann sei in nich mål twei Stunnen
ümmer äbenwech ümrunnen
un ward so denn sülben wiss,
dat unse Ierd 'n Kugel is,
dat man båben åhn Gewicht
schwäwt as' n Fedder so ganz licht.
Gråd so as eine Fedderpos
schwäwt 'n dor so schwerelos,
kann schwerelos dei Ierd bekieken,
wo süss deit kein Blick henrieken,
wo dat nie nich künn gescheihn
von Berlin bet München seihn,
wo dei Sünn geiht sössteihn mål
an einen Dach denn up un dål.

Los geiht dat up disse Tour
inne Wüst bi Baikonur,
deit viermål dei Ierd ümrunnen
un kümmt an in gaut söss Stunnen
båben in den hogen Häben,
wo all Astronauten läben,
un sei nähmen Gott-sei-Dank
dei Besäuker in Empfang
up einen Hektar ISS,
wo dei Minsch kennt keinen Stress,
un sei lären em ok schnell
in dat "Schwerelos"-Hotel,
wo dei Blick up Mudder Ierd
is twinnigdusend Dollar wiert.

Ein ganze Wäk in Vullpangschon
näben dei IS-Statschon,
dat is hüt dei niege Schrie,
dat is Weltrum-Hotellerie:
Dei Gast sall as 'n Forscher schwäben,
doch komodiger dor läben,
un ihrer dat taun Upfohrt kümmt
ward up "Schwerelos" instimmt:
Schwäwend as'n Kraun tau schnappen
nå ganz fiene Weltrum-Happen,
woans man dor in'n Häben drinkt,
schwerelos dei Nacht verbringt,
as ein Katt sik waschen deit,
wo man lött ut Bang den Schweit,
wat dat tau bedenken gifft,
wo ut dei Näs dei Butze blifft,
dat dat keine Dusch deit gäben
un man möt åhn Tant Meier läben,
wenn ünnen ward all utprobiert
woans man båben uriniert,
denn möt mål einer ut'e Büx,
geiht dat dor båben nich so fix.
Dat is so, as dat so is.
All sünd sik hier ünnen wiss,
dat einer, dei dor båben schwäwt,
nie nich bäten Sex beläwt.

Keen Tö, keen Eten, nix to'n Waschen
un nichmal Sex?! Ja gifft dat denn
dor buten nich en Alien?
Dat wöör ik denn vernaschen!