Akupunkturpünkt an en minschlich Ohr. Op de Rüchsiet vun't Ohr sünd ok noch welk!

Akupunktur

vun Heinz Tiekötter


Vele Krankheiten kannst goot mit Akupunktur behanneln. Dat is männichmool en wirkungsvulle Therapie. Keen Chemikalien belast dien Binnenleben, dien Body ward nich stresst un meist hölpt dat beter as annere Anwennungen. Du muss di ober en Akupunktöör seuken, de wat vun sien Fack versteiht. Mien Spezi för de dünnen Nodeln kummt ut Korea. He is een vun de ganz Goden. Wat jümmers ik heff, toeerst wend ik mi an mien koreonschen Fründ un bit to düssen Dag hett he mi jümmers holpen.

De Lehr vun de Akupunktur meent jo, dat diene Energie öber ganz bestimmte Stroten, de nöömt de Fachmann "Meridiane", dörch dienen Körper suust. Gifft dat in düsse Stroten Blockaden, denn mööt de wegrüümt warrn. Ansünsten ward de Energiefluss in dien Körper ünnerbroken un du warrst krank.


Akupunktur an'n Buuk. Üm den Buuknavel wimmelt dat vun Meridiane

Du musst di vörstellen, dörch diene Figur löppt düsse Linien jüst so, as de Autobohnen sik öber uns Land verdeelt. Wenn du nu an'ne bestimmte Stell 'n Engpass hest, denn deit di wat weh, dien Bloot kummt in Stocken, diene Organe ward nich goot versorgt un wat weet ik, wat sünst noch all passiert. Op de Autobohn kummt de Kroonwogen un rüümt allens an de Siet, so dat de Verkehrsfluss wedder ingang koomt. Süh, dat sülbige mookt mien koreonsche Fründ op miene Meridiane. Blots nich mit 'n Kroonwogen. Nee, he nümmt Nodeln un reegt de minschlichen Autobohnen an, dormit allns wedder free löppt.


Akupunkturnodeln

Meist fangt he mit lütte Nodeln in de Ohrmuschel an un geiht denn wieder öber den Arm or den Rüch, männichmool dool bit ünnen an de Feut. He weet öber all diene Stroten Bescheed un weet, wo di dat piert un wo he meent, dat he noch wat an de Siet schuben mutt.

Dat, wat he mit di mookt, hett Sinn un Verstand un is siet öber 4000 Johr de Heilkunst in Asien. Ik heff mol tellt: Bi miene letzte Sitten weern dat veerundottig Nodeln in miene perseunliche Autobohn. Vun mien Ohr bit an mien Knöchel is oprüümt un wegschoben worrn. Weh deit sowat nich, du muss bloots oppassen, dat dien Spezi denn ok, as bi mi, alle veerundottig Nodel wedderfindt. Ansünsten geiht di dat as nüülich de hübsche junge Fro.

De hett mit ehren Scharm mienen "Meister der Nadeln" woll 'n beten aflenkt. Un so hett he ene Nodel öbersehn. De seet achtern bi ehr. Wo genau, dat vertell ik nich.
Se weer all in'n Bus un wull sik grood hensetten, as de vergetene Nodel sik bi ehr in dat Sittfleesch bohrt hett. Mit'n Schree jumpt se wedder hooch un kiekt orrnlich beus op ehren Sitznober. Se dach, de harr ehr knepen. Un all de annern Fohrgäst keken em genauso beus an, as wenn he tomindst 'n Sittenstrolch weer. He hett 'n roten Kopp kregen un wuss nich, woneem he henkieken sull.


Allns wedder ruthalen!

Denn full de junge Fro in, dat se jo grood vun de Akupunktur keem, un dor wuss se miteens, wat de Ursook vun den Piekser weer un woneem de heerkeem. Nu weer dat bi ehr, 'n gleunigen Kopp to kriegen. Bit to de neegste Haltestell weer se dörch de Nodel bannig unruhig. Denn is se gau rut un in dat neegste Cafe lopen, hett sik in Vörbilopen fix wat an Tresen bestellt un sik denn op Tante Meier de Nodel ut de Wäsche puult.

As se wedder in den Loden trüchkeem, lacht de Verköpersche un meen: "Na Se hebbt dat ober neudig hat. So, as Se hier dörch den Loden peest sünd!"

De Nodel hett uns Hübsche annerwekens trüchgeben. Se tellt de Nodeln nu jümmers mit.


5.3.2017


na baven