De Krach vun düsse Autobahn
weer lang al bi den Bau to ahn'n.
In't Veh sien ruhige, pleegte Daag
sünd Larm un Stank en deegte Plaag.
De Köh un ok de wille Stier
wünscht sik, dat endlich Stille wier.
Se föhlt ja al as Clown sik dor.
Dat Veh wünscht en Lockdown sik, kloor!

Moinmoin, leve plattdüütsche Maten un Frünnen!

Uiuiui, nu warrt dat hoge Tied, den Rundbreef aftoschicken! Ik heff dat orrig slepen laten. Man verleden Maand weer ok nich allto veel los op uns Websiet; de Stimmung is noch dempt dör den Verlust vun uns Rudi Witzke, de Maand füng an mit de Afscheedsbidrääg vun em un vun de Maten. De jüdisch-christlich Dialoog weer en Levensthema vun Rudi, un de Israelsünndag full in'n August; dorto gifft dat dütmaal en riemelt Nadenksel vun Cord Denker un en Dialoogpredigt vun Sabine Stürzer un mi. Uns' Schwiezer Exilplattdüütsche Günter Schiller vertellt en söte Geschicht vun en Grillfest, Heinz Tiekötter en echte Moritat, Wolfhard Sauerbrey vertellt vun en mallöörten Bedrug, un bi dat Seemannsgarn kannst nu langsam de Folgen vun'n Landgang sehn — Folgen, de ünner de Huut gaht...

Bi de Natuur stellt Thomas Seemann den Fingerstruuk vör un twee kuriose Notizen ut sien Goorn. Wi hebbt ok twee Märken op't Kinnerflack -- noch sommerlich vun den gelen Botterlicker un, al wat harvstlich, vun de Peperlinge. Wi hebbt ok twee niege Riemels to'n Bruken, een för de Holt-Hochtied un een för Richtfest. Un sonst ok noch düt un dat, man alltohoop weer dat en ruhigen Maand. Nich so ruhig, as wenn wi en Lockdown harrn, un den wüllt wi ja ok nich wedder hebben, bloots de Köh un annern Deerten. Bilütten warrt dat harvstlich, wi wünscht Se schöne Ollwieversommerdaag! Neegst Maand leest wi uns wedder.

---

Nu de Linkliste. Op de Links bruukt Se bloots klicken, dat Se henkaamt.

Plattdüütsch Künst:

Notizen ut'n Sneemaand. Fotos un Verse vun Marlou Lessing (2.8.)

De Welt un Gott:

Seemannsgarn: Landgang, Deel 3. Vun Günter Sohnemann (29.8.)
Dat Grillfest. Vun Günter Schiller (29.8.)
De nee Klederschrank. Moritat vun Heinz Tiekötter (26.8.)
Volksledertext is överhaalt! Vun Helmut Marxen (16.8.)
Israelsünndag 2020. Dialogpredigt vun Sabine Stürzer un Marlou Lessing (16.8.)
Juden un Christen. Vun Cord Denker (15.8.)
En Schipp geiht up de Reis. Rudi Witzke nimmt Afscheed (2.8.)
Rudi Witzke to'n Afscheed vun sien Plattpartu-Maten (2.8.)

In't lütte Book vun't Nadenken un Beden:

De Reken. Vun Sabine Stürzer (26.8.)

Natuur un Wetenschap:

Planten in Pagels' Goorn: De Fingerstruuk. Vun Thomas Seemann un Marlou Lessing (5.8.)

In't aktuelle Natuurnotizbook:

Wöpsennest?! Vun Thomas Seemann (29.8.)
Veerfleck op Rost. Vun Thomas Seemann (15.8.)

Wat in de Welt vörgeiht:

Gedopte Fisch. Vun Wolfhard Sauerbrey (16.8.)

...un 1 niege Indraag in Marlou Lessings plattdüütsch Notizbook.

För Kinner:

Modder Sünn ehr Kinner: Familie Peperling. Märken vun Sophie Reinheimer, överdragen vun Klaus-Dieter Tüxen (27.8.)
Modder Sünn ehr Kinner: De gele Botterlicker. Märken vun Sophie Reinheimer, överdragen vun Klaus-Dieter Tüxen (15.8.)

Platt to Hand:

To Richtfest. Vun Sibilla Frerich (27.8.)
Hollten Hochtied. Vun Ewald Eden (2.8.)

---

Hartlich grööt

Marlou Lessing un dat lütte Plattpartu-Team