Swulkensteert op Wandelröschen

Wenig Bottervagels...

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

"Gifft dat dütt Johr keen Bottervagels?", fraag mi mien Enkeldochter. Wi harrn al de Meern vun den Juli tofaten. In mien Goorn weern blots enkelte Bottervagels to sehn. Mal en lütten Voß or en Ketelböter, dat weer allens.


Swulkensteert op Wandelröschen

Dagpfauenoog op Phlox

An 20. Juli harr ik denn morrns en lustig Beleevnis. Up de Trepp flöög mi wat Düsteres üm den Kopp, en Bottervagel! In de Stuuv flatter he glieks an't Finster. Dat weer ja en smuck Tagpfauenoog. He wull ruut. Gau haal ik en Glas ut de Köök. In dat Glas heff ik em na buten bröcht. Dor weern noch mehr Bottervagels. De seten up den frisch upblöhten Phlox. Na, dat geev ja doch noch mehr Bottervagels.

Bi mien Naver nevenan seten up den Schmetterlingsboom siet twee Daag veel ünnerscheedlich Bottervagels. Besünners veel Pfauenogen kunn ik sehn. Wat dat wull up sik harr, dat se sik nu eerst sehn leten? Leeg dat an den Warmwederinbruch? Dor müss ik doch mal rümfragen, ob de annern Navers dat ok mitkregen harrn.


"Die Geier warten schon"? Nee, de Bottervagels!
Distelfalter

Aver dat is nich bloots mien subjektive Indruck: Düt Johr is en ganz slecht Insektenjohr. Al för verleden Johr harr dat de Nabu faststellt. Kuum wat flüggt dör de Luft. Nümsnich weet genau, wo dat an liggt. Wohrscheinlich warkt mehrere Uursaken tosamen — Verlust un Vergiftung vun Levensruum, Klima- un Wedderbedingungen, jümmer minner Plantenveelfalt usw. usw. Wi all kennt de Problemen, un wi all harrn en slecht Geweten, wenn wi de Industrielandschapen mit giftbesprütte Monokulturen sehn dään. Dor wulln wi ok nich geern Imm orr Falter sien. Un ok keen Vagel, de op Insekten as Nohrn anwiest is.


Swulkensteert op Petunie

Weißling

Nu sünd ja nich all Minschen Insektenfrünnen. Vele misst to'n Bispill dat sommerliche Mückensummen keen beten. Aver dat Problem warrt an uns Minschen wiedergeven, denn ok uns Landweertschap kann nich ahn de Insekten bestahn. Wenn dat de neegsten Johr so wiedergeiht mit luter slechte Insektenjohr, warrt wi lehren: Insekten sünd beter as keen Insekten! Un ok de Insektenhasser warrt bald wedder lengen na de Mückenstiche, dat Krimmeltüüch op de Autoschiev un de Wöpsen op den Botterkoken.

Ossenoog
Zitronenfalter

In de Twischentied harr ik denn aver in mien Book leest, dat de Bottervagels verscheden Floogtieden harrn. Dorna weer dat al de tweete Generatschon, de ik in de Goorns wies worrn weer. Villicht weern dat also nich ganz so wenig Bottervagels, se harrn bloots graad Generatschonenpaus. Je na Wedderlaag kunn ok noch in'n September en dritte Generatschon flegen.

Nu, in de tweete Floogtiet, harr ik in mien Goorn un dat Ümfeld an enen Dag alleen söss verscheden Dagfalter sehn. Meistens weern dat Tagaugenfalter. An den Schmetterlingsboom weer de Parkplatz al knapp woorn. Dat heff ik natüürlich mien Enkeldochter vertellt.


Swulkensteert op Wandelröschen

Distelfalter

De smuckste un gröttste vun de Dagfalter weer de Swulkensteert orr hoochdüütsch Schwalbenschwanz. De is in uns Gegend recht roor. He kümmt ut de Familie vun de Ritterfalter. Dörch sien Grött flüggt he bannig gau un is dorüm ganz swoor to knipsen. Wenn he eerstmal flüggt, geiht dat nich mehr. Sien Flünken sünd bit to 9 cm uteenanner. Up de hellgelen Flünken sünd en ganzen Barg swatte Placken un Adern to sehn. De Achterflünken hebbt söss blaue un enen roden Punkt un dat Enn vun den Flünken löppt spitz to. Süht enen Swulkensteert liek. Dorher hett de Bottervagel ok den Naam.

 

Ik harr Glück, de Swulkensteert harr sik dat Wandelröschen in mien Goorn utsöcht. Ümmer wedder sett he sik up de Bloom.

Hoffentlich kümmt he nochmal wedder. To geern wöör ik em mien Enkeldochter wiesen. Sünst mütt se mit mien Fotos vörleev nehmen, de un all de Kinner un jungen Minschen. Hoffentlich nich för vele Johr...


31.7.2016


na baven